Abarimo abanyamahanga 4 bagizwe Abarinzi b’Igihango

  • Imvaho Nshya
  • Ukwakira 30, 2023
  • Hashize amezi 4
Image

Bamwe mu bagize uruhare mu kurokora Abatutsi bahigwaga muri Jenoside yakorewe Abatutsi mu 1994 barimo Abanyarwanda n’abanyamahanga bakomoka mu bihugu by’u Bubiligi, u Bufaransa na Uganda, bashimiwe ubwitange n’ubutwari bwabaranze barwanya ivangura ndetse no kwita ku bahigwaga.

Aba bashimiwe barimo Abanyarwanda 3  n’abanyamahanga 4  kubera ubutwari  n’ubwitange bwabaranze kugeza n’aho bamwe banabizize.

Bashimiwe ku mugoroba wo ku Cyumweru tariki ya 29 Ukwakira 2023, mu gitaramo cyahuriyemo Abanyamuryango ba Unity Club Intwararumuri ndetse n’ abandi bitabiriye Ihuriro rya 16 ry’uyu muryango.

Abitabiriye iki gitaramo bagejejweho ibigwi by’Abarinzi b’Igihango, barimo Mukamunana Nyirambonera Judith wareze abana b’imfubyi mu bihe bya Jenoside yakorewe Abatutsi na nyuma yayo, akaba yashyikirijwe ishimwe.

Mu bandi bahawe ibihembo bakanagirwa Abarinzi b’Igihango kandi harimo Mpirwa Azzaria warwanyije ivangura mu gihe yari Umuyobozi mu Nzego z’ibanze ku rwego rwa Konseye.

Uwo yaje no kubizira yicanwa n’umugore we, azize kwanga ikibi no kukirwanya.

Marie Jeanne Noppen Umubiligikazi wari umurezi ku Kigo cy’amashuri cya Nyundo mu Karere ka Rubavu, yarwanye ku banyeshuri yareraga mu gihe cya Jenoside yakorewe Abatutsi mu 1994, ubwo Interahamwe zashakaga kubica; na we yabishimiwe.

Noppen yanze kenshi ivangura ubwo yangaga ko abana bari mu bwoko bw’Abatutsi birukanwa mu mashuri mu gihe hari ivangura rikomeye mu burezi.

Mu mwaka wa 2007 ni bwo Noppen yatabarutse, abo yafashije bamushimira ibyo yabafashije kugeraho.

Undi ni Padiri Pierre Simons Umubiligi wanze gusiga abana yareraga ngo ahunge mu gihe cya Jenoside, yanahishe Abatutsi benshi bamuhungiyeho.

Nyuma ya Jenoside yakomeje kwita ku mpfubyi, aza gutabaruka mu mwaka wa 2020.

Hari kandi na Furere Pierre Lefloc’h Umufaransa, muri Jenosdie yakorewe Abatutsi yanze gusiga Abatutsi bahigwaga yari umwe na bo 32 abageza mu buhungiro mu gihugu cy’u Burundi.

Na nyuma yaho yakomeje ibikorwa byo kwigisha abana bafite ubumuga bwo kutumva no kutavuga, na we yaje gutabaruka mu mwaka wa 2019.

Undi ni Muhamood Noordin Thobani, Ukomoka mu gihugu cya Uganda washyinguye imibiri irenga ibihumbi 10 y’Abatutsi bishwe bagatabwa mu ruzi rw’Akagera ndetse agira uruhare mu kubaka Inzibutso zitandukanye muri icyo gihugu.

Hari kandi Mutabazi Ally, mbere ya Jenoside yakorewe Abatutsi yahungishije Abatutsi barenga 100 bahigwaga bitwa ibyitso bahungira muri Tanzania. Mu gihe cya Jenoside na bwo yagarutse mu Rwanda afasha abahigwaga guhunga.

ZIGAMA THEONESTE

  • Imvaho Nshya
  • Ukwakira 30, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE