Abanyeshuri bo muri Sudani bishimiye gusoreza amasomo mu Rwanda

  • NTAWITONDA JEAN CLAUDE
  • Kanama 3, 2023
  • Hashize amezi 10
Image

U Rwanda rwugururiye amarembo abanyeshuri barenga 200 bo muri Sudani bigaga ubuvuzi bikaba baracikishirije amasomo kubera intambara yadutse i Khartoum mu Murwa Mukuru w’icyo gihugu guhera muri Mata 2023.

Ababarirwa 160 muri bo bamaze kwakirwa muri Kaminuza y’u Rwanda, aho bakomeje kugaragaza ko bishimiye uburyo bakiranywe urugwiro bikaba bagiye gusoreza amasomo mu gihugu kidahwema gufasha impunzi n’abimukira mu bihe bikomeye.

Abo banyeshuri baturutse muri Kaminuza y’Ubumenyi  n’Ikoranabuhanga mu Buvuzi ya Sudani (UMST), bagaragaje umunezero ubwo bakirwaga muri Kaminuza y’u Rwanda.

Iman Osman Abufatima Adam w’imyaka 23 y’amavuko yagaragarije itangazamakuru ko kuza mu Rwanda bisobanuye byinshi kuri we kuko nyuma y’amakimbirane yavutse hagati y’abasirikare i Khartoum batekereje ko ahabo harangiye.

Yagize ati: “Twakiriwe neza muri iki gihugu. Ikirere ni cyiza, abantu b’aha ni beza, twanejejwe no kubona ibice nyaburanga by’u Rwanda. Kuza mu Rwanda bisobanuye byinshi kuri twe, biduhaye amahirwe yo gukomeza uburezi bityo tugasoza. Mfite icyizere gikomeye, ntekereza ko nzaryoherwa n’urugendo, nizeye ko tuzasoza amasomo nta nkomyi maze tukaba abaganga b’umwuga.

Iryo tsinda ry’abanyeshuri uko ari 160 bitezweho gutangira amasomo muri uku kwezi. Abenshi muri bo bagaragaje ko icyizere cyo gukomeza amasomo yabo cyari gitangiye kuyoyoka kuko babonaga intambara yadutse i Khartoum ikomeje kuyogoza ibintu.

Lojain Dafaalah Mohamed Alkhair yasobanuye uburyo yoherejwe mu Rwanda akuwe mu Misiri aho yari yarahungiye, ati: “Twanejejwe no kuza hano muri Kigali kugira ngo dusoze amasomo yacu, cyane cyane amahugurwa. Turanezerewe birenze kuba turi hano, kubera ko mu by’ukuri intambara yatumye duhunga Igihugu cyacu ariko ubu twabonye ahari ubwatsi butoshye.”

Yavuze ko amaze hafi icyumweru mu Rwanda, ati: “Niteze byinshi byiza mu gihe tugiye gutangira amahugurwa. Ndashaka kumenya byinshi birebana n’abarwayi hamwe n’ubuvuzi. Gusa by’umwihariko nahise nkunda Abanyarwanda n’ikirere cya hano.”

Bashimye ko uko bakiriwe mu Rwanda byari bikwiye guha isomo abaturage ba Sudani na bo bakiga kubana mu mahoro bagasangira akabisi n’agahiye.

Uwitwa Homeida yavuze ko u Rwanda rwubatse izina ryiza muri Afurika no ku Isi yose. Ati: “Bigaragaza ko Isi ishobora komorana ibikomere. Iki ni cyo abaturage ba Sudani bakeneye…”

Umuyobozi wa Kaminuza y’u Rwanda Didace Kayihura Muganga, yatangaje ko hari n’abarimu bazana n’abo banyeshuri aho bazaba baje gutanga umusanzu wabo mu Rwanda.

Yanashimangiye ko Kaminuza y’u Rwanda yari yatangiye ibiganiro n’iyo Kaminuza mbere y’uko amakimbirane anavuka, ariko intambara yatumye ibiganiro byo guhererekanya abanyeshuri byihutishwa.

Yagize ati: “Nyuma y’aho ibikorwa bya Kaminuza bihagarara n’abanyeshuri bagahunga, Kaninuza ya Sudani yasabye Guverinoma y’u Rwanda kwakira abanyeshuri barenga 200 biga ubuvuzi rusange n’abaturuka mu ishami ry’ubuvuzi bw’amenyo mu kwirinda ko bacikwa n’amasomo mu gihe cy’umwaka wose. Ubu turabikora mu rwego rw’ubutabazi ariko turanareba no ku bufatanye burambye bushobora kuzatuma dutangiza gahunda zo guhererekanya abanyeshuri n’abarimu igihe amahoro azaba agarutse i Khartoum.”

Intambara yo muri Sudani yavutse ku ya 15 Mata 2023, nyuma y’ubushyamirane bwavutse hagati y’Ingabo za Sudani (SAF) n’Inkeragutabara zo muri icyo Gihugu (RSF). Intambara yibanze mu Murwa Mukuru Khartoum ikomereza i Darfour nk’umusaruro w’ubwumvikane buke hagati y’abayobozi b’izo nzego zombi z’umutekano.

Iyo ntambara bivugwa ko imaze guteza ubuhunzi bw’abantu barenga miliyoni 4, aho abarenga 1,800 bahasize ubuzima mu gihe abandi barenga 5,100 bakomerekeye muri iyo ntambara.

Amatoto: TNT

  • NTAWITONDA JEAN CLAUDE
  • Kanama 3, 2023
  • Hashize amezi 10
TANGA IGITEKEREZO
Rinda says:
Kanama 3, 2023 at 1:41 pm

Nukuri ibi bikwiriye kubera isomo abanyarwanda twese cyane cyane abirirwa basebya u Rwanda, abatarwifuriza ibyiza n abirirwa basakuza ngo bazakuraho ubuyobozi. Niba igihugu nk u Rwanda kiba igitekerezwa ho kwakira abanyeshuri bangana kuriya, ntibatekereze kujya Europe, USA, Asia cg ibindi bihugu biratwa ko biteye imbere cg byirata ko Ari binini kw isi, sinumva ukuntu buri munyarwanda aho Ari hose igihugu cye atacyumva nk ishema rye, n ubuyobozi bwacyo ngo abufate nk agaciro ke.

Andika igitekerezo

AMATEGEKO AGENGA IYANDIKA RY'IGITEKEREZO CYAWE