Abanyeshuri bazindukiye mu bizami bahamya ko biteguye gutsinda

  • Imvaho Nshya
  • Nyakanga 25, 2023
  • Hashize amezi 10
Image

Kuri uyu wa Kabiri taliki ya 25 Nyakanga 2023, abanyeshuri 212 399 bo mu mashuri yisumbuye bazindukiye mu bizami bisoza icyiciro rusange n’abarangije amashuri yisumbuye, bavuga ko biteguye neza, ku buryo bizeye gutsinda.

Ku Rwunge rw’amashuri rwa Kigali, ruherereye mu Murenge wa Kigali mu Karere ka Nyarugenge, ahakoreye abanyeshuri 395, hatangirijwe ibizami n’Umunyamabanga Uhoraho muri Minisiteri y’Uburezi, Karakye Charles yavuze ko abanyeshuri badakwiye kugira ubwoba bw’ikizami cya Leta, ko ari ikizami nk’ibyo basanzwe bakora.

Ati: “Ibizami bitangiye abanyeshuri bariteguye uko bikwiye, abarimu bashinzwe kubategura barabateguye kandi n’ibizamini biteguye neza, ababyeyi brabafashije kwitegura neza nk’uko bisanzwe. Icyo dusaba abanyeshuri ni ukumva ko ikizami cya Leta nk’ikingiki ari ikizami gisanzwe nk’ibindi basanzwe bakora, ntigikwiye kubatera ubwoba ngo bumve ko bashobora gutsindwa ngo ni uko ari kizami cya Leta. Ikindi ni uko bakomeza gusubira mu masomo kugira ngo bazakore ikindi kizami cy’umunsi ukurikiyeho biteguye”.

Yongeyeho ati: “Ibizamini bya Leta bitegurwa bikurikira ibindi biba bisanzwe  bikorwa tureba ikigero cy’anbana, mu byiciro byose bitandukanye, mu gihembwe cya mbere, mu gihembwe cya kabiri, mu ihembwe cya agatatu, tujya kugeza muri ibi bizami bisoza umwaka twaramaze kumenya abana bose ikigero cy’uko baba bagiye biga ku  buryo ibizami tuba twateguye nta we biba  byasize inyuma”.

Umwe mu banyeshuri yavuze ko bagize igihe cyo kwitegura  ku buryo bizeye gutsinda.

Ati: “Twagize igihe gihagije cyo kwitegura batubwira itariki tuzakoreraho, turitegura uyu munsi tugiye gukora imibare n’isomo ryo kwihangira imirimo (Entrepreneurship).

Dufite icyizere, twese intego dufite ni ugutsinda. Mbere bakibitubwira twumvaga biteye ubwoba, ariko twagiye tuganira n’abarezi n’ubuyobozi ndetse n’abakoze ibizami batubwira ko ari ibintu bisanzwe.”

Mu myiteguro nta kibazo abiga mu myaka igomba gukora ikizami cya Leta twakoze ibizami bisoza umwaka mbere kugira ngo twitegure icya Leta.

Nsengimana Emmanuel wiga mu Cyiciro rusange na we yavuze ko bateguwe kabakaba bagiye kugaragaza umusarur w’imyaka 3.

Yagize ati: “Twarize, abarimu baraduteguye, imyaka itatu yose, ubu ni bwo tugiye kugaragaza ibyo twakoze. […] Twize neza dufite laboratwari dukora imyitozo ngiro, abarimu baradufasha cyane, tugerageza buri kimwe cyose nta munyeshuri wagombye gutsindwa keretse ari we warangaye ntategure neza ibizami naho abarimu batugiriye inama buri munsi, gusubira mu masomo baradufashije cyane”

Umuyobozi Mukuru w’Ikigo gishinzwe ibizamini bya Leta n’ubugenzuzi bw’amashuri (NESA), Dr Bernard Bahati, yavuze ko ibizami byatangiye uyu munsi ari igice kimwe cy’ibindi bizamini bya Leta bikorwa buri mwaka, abanyeshuri basoza, amashuri mu byiciro bitandukanye, amashuri abanza, icyiciro rusange n’amashuri yisumbuye.

Abanyeshuri bakoze ikizami bisoza icyiciro rusange n’abasoza amashuri yisumbuye bakoze uyu munsi ni 212 399.

Aha ni kuri Santere y’ibizami bya Leta kuri G.S  Kigali

Yanditswe na NYIRANEZA JUDITH

  • Imvaho Nshya
  • Nyakanga 25, 2023
  • Hashize amezi 10
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE