Abanyarwandakazi b’Impanga bagaragaje uruhare rwabo mu guteza imbere u Rwanda

  • KAYITARE JEAN PAUL
  • Gashyantare 4, 2024
  • Hashize ibyumweru 4
Image

Rwanda Day ni kimwe mu bikorwa bihuza abanyarwanda batuye mu mahanga bakaganira na Perezida wa Repubulika Paul Kagame. Ni naho kandi abenshi bafatira icyemezo cyo kugira umusanzu batanga mu guteza u Rwanda imbere.

Josephine Murphy Bukuru na Joselyne Alexandre Butoyi ni impanga mu muryango bavukamo, bombi batuye muri Canada akaba ari naho bakorera.

Butoyi yahishuye ko buri mwaka bohereza mu Rwanda ibihumbi 200 by’amadolari ya Amerika (Asaga miliyoni 200 Frw) mu bikorwa by’ubukorerabushake.

Babigarutseho ejo kuwa Gatandatu tariki 03 Gashyantare 2024 muri Rwanda Day yaberaga muri Leta Zunze Ubumwe za Amerika, Washington DC.

Mu byishimo byinshi, bashimiye Umukuru w’Igihugu wabahaye ikibanza ubwo habaga RwandaDay i Toronto muri Canada, muri 2013.

Icyo kibanza kiri mu Karere ka Bugesera, bacyubatsemo ibikorwaremezo bifasha abaturage.

Bahishuye ko icyo gihe bashakaga ikibanza ngo bubakire abaturage, bubake amashuri. Perezida wa Repubulika yavuze ko byoroshye kukibona kandi ko bakwegera Urwego rw’Iterambere (RDB) rukazakibaha.

Bukuru yagize ati “Mwarakiduhaye, icyo kibanza mwarakiduhaye i Bugesera duhamagara Mama ngo turagowe, ubuse ngo aho ahantu hatagira imihanda, hatagira amazi tuzabigira dute?”.

Icyo gihe umubyeyi ubabyara yabasabye gusenga kandi ngo byagenze neza. Ahamya ko bari kumwe n’abaterankunga benshi bo muri Canada mu rwego rwo guteza imbere igihugu.

Nyuma bumvise ko aho i Bugesera ari ho ikibuga cy’indege kizajya babishimira Imana. Kugeza ubu imirimo yo kucyubaka igeze kure.

We n’umuvandimwe Butoyi barahubatse, huzuye inzu bubakiye abaturage, huzuye amashuri ndetse bagaburira abana kandi ngo n’abagize Guverinoma barabasura. Banasabye Umukuru w’igihugu kuzabasura.

Bukuru yavuze ko akora ibikorwa by’ubukorerabushake mu gihugu cya Canada by’umwihariko akora mu burezi, aho yigisha abantu bafite ubumuga bwo kutabona kandi agakora inyandiko z’abafite ubwo bumuga.

Ni mu gihe umuvandimwe we akora mu kigo Gishinzwe abinjira n’abasohoka muri Canada.

Yakomeje agira ati “Ibi ariko ni ukubera ko twavuze ngo tuzahahe neza ariko dufashe ab’iwacu”.

Josephine yavuze ko yashoboye kubona inyandiko ikubiyemo icyerekezo 2050 akaba ayisoma ijambo ku rindi mu byo akora byose.

Izi mpanga zasabye ko ibyo Perezida Paul Kagame akora mu izina rya Guverinoma ko n’abanyarwanda batuye mu mahanga babikora bashyize hamwe.

Butoyi yagize ati “Guverinoma ntikore yonyine, oya”.

Kuva mu 2000 kugeza mu 2005 Abanyarwanda baba mu mahanga bohereje hagati ya miliyoni 3,6$ na miliyoni 8,6$, mu myaka ine yakurikiyeho ava kuri miliyoni 25$ agera kuri miliyoni 98,2$, mu 2010 bohereza miliyoni 65$ mu gihe mu 2017 bohereza miliyoni 176$.

Uyu musaruro wakomeje kwiyongera aho hagati ya 2018 na 2019 Abanyarwanda baba mu mahanga bohereje miliyoni 253$ mu 2021 bohereza miliyoni 377 $, mu mwaka wakurikiyeho zigera kuri miliyoni 444$, mu gihe mu mwaka washize amafaranga yoherezwa mu gihugu bikozwe n’Abanyarwanda baba mu mahanga yageze kuri miliyoni 470$.

Ubwo bari mu Rwanda muri gahunda zo guteza imbere igihugu
Mu bikorwa by’ubukorerabushake bakorera mu Rwanda bagira inshuti z’u Rwanda zibashyigikira
Bukuru na Butoyi basabye abanyarwanda batuye mu mahanga kugira uruhare mu guteza imbere u Rwanda
Abanyarwandakazi b’impanga bita ku miryango itishoboye bakayifasha kuyibonera amacumbi ndetse n’aho abana babo bigira

Amafoto: Internet

  • KAYITARE JEAN PAUL
  • Gashyantare 4, 2024
  • Hashize ibyumweru 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE