Abanyarwanda barasabwa kwisuzumisha no kwirinda ibibazo byo mu mutwe

  • NTAWITONDA JEAN CLAUDE
  • Kamena 1, 2022
  • Hashize imyaka 2
Image

Hatangijwe umushinga ‘Baho neza- Twite ku buzima bwo mu mutwe’; mu Karere ka Nyaruguru, aho abantu bashishikarizwa kwitabira kwisuzumisha bakamenya uko ubuzima buhagaze, bakirinda ibibazo byo mu miryango kuko ari byo biteza ibibazo by’ubuzima bwo mu mutwe.

Uyu mushinga ‘Baho neza- Twite ku buzima bwo mu mutwe’ uzita ku bibazo by’ubuzima bwo mu mutwe watangijwe n’Umuryango Imbuto Fondation waziye igihe nk’uko byagarutsweho n’Umunyamabanga wa Leta ushinzwe imibereho myiza y’abaturage muri Minisiteri y’Ubutegetsi bw’Igihugu, Ingabire Assumpta washimiye umuryango Imbuto Fondation kuri iyi gahunda ije ikenewe.

Ni igikorwa cyabereye mu Murenge wa Mata, mu Karere ka Nyaruguru kuri uyu wa Kabiri taliki 31 Gicurasi, aho Ingabire yibukije ko Leta y’u Rwanda ishyira imbere umuturage, ikifuza ko abaturage bagira ubuzima bwiza, bagasobanukirwa iby’ubuzima n’imibereho yabo cyane n’ubuzima bwo mu mutwe.

Umunyamabanga wa Leta ushinzwe imibreho myiza y’abaturage muri Minisiteri y’Ubutegetsi bw’Igihugu, Ingabire Assumpta yasabye abaturage kwitabira kwisuzumisha.

Ati: “Mwitabire kwisuzumisha munegere abahanga mu ndwara zo mu mutwe mwegerejwe kandi munakemure ibibazo biri mu miryango kuko biri mu biteza ibibazo byo mu mutwe”.

Ndejuru Radegonde wari uhagarariye Imbuto Foundation yavuze ko uyu mushinga ugamije kongera ubumenyi bw’ubuzima bwo mu mutwe wibanda ku muryango nk’igice cy’ibanze cy’umuryango, hitawe cyane cyane ku bantu bafite ibyago byo kuba bagirwaho ingaruka z’ubuzima bwo mu mutwe, ababyeyi n’abana babo, ingimbi, urubyiruko kimwe n’abacitse ku icumu rya Jenoside.

Abaturage bashishikarijwe kuzitabira serivisi zita ku buzima bwo mu mutwe begerejwe ( Foto MINALOC)

Ati: “Amateka y’Igihugu cyacu agaragaza ko umuryango washegeshwe n’ingaruka za Jenoside yakorewe Abatutsi mu 1994, ndetse n’imibereho muri rusange. Ni yo mpamvu kuva mu 1994 igihugu cyacu cyashyize ingufu mu kongera gusana umuryango n’Igihugu muri rusange. Umuryango rero ni ryo shingiro ry’Abanyarwanda, ni ryo shingiro ry’Igihugu cyacu.”

Yongeyeho ati: “Mu kureba rero no kwita ku muryango twasanze bimwe mu byo twakora byawufasha kurushaho ari ukwita ku buzima bwiza bwo mu mutwe bw’abawugize. Baho Neza rero ni gahunda igamije guteza imbere ubuzima bwiza bwo mu mutwe, duhereye ku kwita ku buzima bw’umubyeyi n’umwana no kugira umuryango ushoboye kandi utekanye.”

Abari bitabiriye icyo gikorwa bibukijwe ko kwita ku buzima bwo mu mutwe bihera mu muryango bityo bahamagarirwa kwirinda icyo ari cyo cyose cyabangamira imibereho, imitekerereze harimo amakimbirane yo mu muryango, inda zitateguwe, igwingira ry’abana, ihohoterwa, ibiyobyabwenge n’ibindi.

Ikindi ni uko uyu mushinga uzakorwa binyuze mu bukangurambaga, hagamijwe guhindura imyumvire iganisha ku buzima bwiza bwo mu mutwe, kandi serivisi zizajya zitangwa mu buryo umuntu abyifuza, haba mu matsinda cyangwa umuntu ku giti cye.

Ndejuru yasobanuye ko izo serivisi zizajya zitangwa n’Abajyanama ku buzima bwiza bwo mu mutwe bazabihugurirwa. Ayo matsinda azajya yunganirwa n’impuguke mu kwita ku buzima bwiza bwo mu mutwe ndetse n’abaganga bo ku bigo nderabuzima.

Hazanitabwa ku byiciro byihariye byugarijwe n’ibibazo by’ihungabana n’izindi ndwara zizahaza ubuzima bwo mu mutwe.

Bamwe mu baturage bo mu Murenge wa Mata i Nyaruguru bagaragaje ko bafite ibibazo bitandukanye bituma babaho bahangayitse badatekanye, nk’abangavu baterwa inda bigatuma bacikiriza amashuri, hari abatereranwa n’imiryango bakagira ibikomere,  ibyo bikabatera ibibazo by’ihungabana.

Umunyamabanga wa Leta Ingabire Assumpta yasabye abayobozi kurushaho kwegera abaturage bakabumva kandi bakanabakemurira ibibazo, kuko iyo bidakemuwe bishobora kubatera guhungabana mu buzima bwo mu mutwe.

Uyu mushinga uzamara imyaka itatu (3) uzakorerwa mu Turere twa Nyamasheke, Musanze, Bugesera, Nyagatare, Gasabo na Nyaruguru ari na ho watangirijwe mu Murenge wa Mata kuri uyu wa Kabiri taliki ya 31 Gicurasi 2022.

Umunyamabangawa Leta muri Minisiteriy’Ubutegetsi bw’Igihugu ushinzwe imibereho myiza ‘abaturage, Ingabire Assumpta, yasabye abaturage kwitabira gahunda zo kwisuzumisha begerejwe (Foto MINALOC)
  • NTAWITONDA JEAN CLAUDE
  • Kamena 1, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE