Abanyarwanda 82,7% bamaze gutanga Mituweli 100% -RSSB

  • ZIGAMA THEONESTE
  • Mutarama 9, 2024
  • Hashize amezi 2
Image

Ikigo cy’Ubwiteganyirize mu Rwanda (RSSB) cyatangaje ko abaturage bangana na 82,7% ari bo bamaze gutanga ubwisungane mu kwivuza bwa mutuweli, mu gihe 3% bo bamaze 70% muri uyu mwaka wa 2023/24.

RSSB issaba abaturage bataratanga amafaranga yose asabwa ku musanzu wa Mituweli kuyatanga kuko ari bibaha uburenganzi bwo kwivuza.

Mu kiganiro yagiranye na RBA kuri uyu wa Mbere tariki ya 8 Mutarama 2024, Ntigurirwa Dogratias Umuyobozi ushinzwe ubukangurambaga no kwandika abanyamuryango muri RSSB, yasabye abaturage bose gutanga ubwisungane mu kwivuza kandi ku gihe kugira ngo babone serivisi z’ubuvuzi bitabagoye.

Yagize ati: “Abataratanze na make ntabwo barimo kwivuza kimwe n’abari baratanze 70% mu mwaka ushize, bitewe n’uko itegeko ribiteganya, ribemerera kwivuza bitarenze itariki 31 Ukuboza, guhera ku itariki ya 1 Mutarama baba bagombye kuba bishyuye yose.”

RSSB ivuga ko kugeza ubu ifite abanyamuryango bangana na 3% bivuzaga mu mwaka ushize ariko batabasha kwivuza ubu, kubera ko batabashije kwishyura 100%.

RSSB kandi igaragaza ko abaturage bamaze gutanga amafaranga y’ubwisungane yose asabwa bangana na 82,7% abagera kuri 3% batanze 75% by’umusanzu basabwa, na ho 15% batanze igice cyangwa bakaba nta faranga na rimwe baratanga.

Hirya no hino mu mavuriro atandukanye abaturage bavuga ko gutanga ubwisungane mu kwivuza bwa Mituweli, bibafasha kutarembere mu ngo ndetse n’ukeneye serivisi akagana kwa muganga akazihabwa ndetse ku kiguzi gito ugereranyije n’udafite ubwo bwisungane.

Umwe yagize ati: “Kuba naratanze Mituweli bituma nza hano kwa muganga bakareba uko amaso yanjye ahagaze kuko ndwaye amaso.”

Undi ati: “Nk’ubu ejo navuye muri Rusizi ariko ndi hano i Kigali kandi nashoboye kwivuza, ubwo urumva ko nta kamaro katari ako ngako, umuntu yakagombye gutanga Mituweli atararwara kandi n’ubwo atarwara byafasha n’abandi.”

Ku rundi ruhande ariko, hari bamwe mu baturage batatanze Mituweli bavuga ko iyo bagiye kwivuza basabwa kwishyura 100% y’ikiguzi cya serivisi bahawe kwa muganga.

Bavuga ko ibyo bibagiraho ingaruka zirimo kugorwa no kwivuza. Umwe muri bo yagize ati : “Kudatanga Mituweli ni uko turi abantu benshi,bingiraho ingaruka zikomeye, kuko umwana nk’ubungu arwaye inkorora n’ibicurane iyo mba mfite Mituweli nari kuba naramuvujije hakiri kare none kubera nta Mituweli twaratinze”.

  • ZIGAMA THEONESTE
  • Mutarama 9, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE