Abanyamakuru n’abandi batangaza amakuru barasabwa gushishoza

  • ZIGAMA THEONESTE
  • Gashyantare 23, 2024
  • Hashize amezi 2
Image

Ihuriro ry’imiryango ifasha abantu mu by’amategeko (LAF) ritangaza ko muri iki gihe abantu bakomeje gutangaza amakuru yiganjemo ibihuha ari yo mpamvu risaba abanyamakuru n’abandi bakwirakwiza amakuru, kubanza gushishoza mu kwirinda gutangaza ibihuha.

Byagarutsweho ku wa Kane tariki ya 22 Gashyantare 2024, mu biganiro nyunguranabitekerezo byahuje abanyamakuru n’izindi nzego zirimo iz’umutekano, Urwego rw’Igihugu rw’Ubugenzacyaha (RIB) n’abandi, baganira ku buryo bwo kunoza gutanga ibitekerezo bitabangamiye rubanda kandi bifite umumaro.

Itegeko Nshinga rya Repubulika y’u Rwanda mu ngingo ya 38, ritanga uburenganzira bwo gutanga ibitekerezo mu bwisanzure bw’itangazamakuru, ubwo kugaragaza ibitekerezo n’ubwo guhabwa amakuru.

Ni ingingo kandi ivuga ko ubwisanzure bw’itangazamakuru, ubwo kugaragaza ibitekerezo n’ubwo guhabwa amakuru bwemewe kandi bwubahirizwa na Leta. 

Icyakora iri Tegeko Nshinga rishimangira ko nubwo hari ubwisanzure bwo kugaragaza ibitekerezo na bwo ntibugomba kubangamira ituze rusange rya rubanda n’imyifatire mbonezabupfura, ukurengera urubyiruko n’abana, n’uburenganzira bw’umwenegihugu bwo kugira icyubahiro n’agaciro, ubwo kutagira uwivanga mu mibereho ye bwite n’iy’umuryango we. 

Ashingiye kuri iyi ngingo y’amategeko, Kananga Andrews, Umuyobozi Mukuru wa LAF, yatangaje ko muri iki gihe kubera imbuga nkoranyambaga zabaye nyinshi n’ibitangazamakuru bikaba byinshi hakiri ikibazo cy’uko hari abantu bakwirakwiza amakuru y’ibihuha bityo akabasaba gushishoza mu gihe bagiye gutangaza aya makuru.

Yagize ati: “Muri iyi minsi rero hari amakuru y’ibihuha menshi, ari na yo mpamvu twateguye uyu mushinga (Dushishoze mu gutanga ibitekerezo), ni ukuvuga ngo turemera ko abantu batanga ibitekerezo. Nk’uko mubizi ku mbuga nkoranyambaga hari inyandiko zibiba urwango, hari n’ibibazo mu Karere duherereyemo hari ibintu byinshi biza bigera ku baturage.”

Yakomeje agira ati: “Hari n’abakurikiranwa mu nkiko yaba abanyamakuru n’abandi Banyarwanda muri rusange abakoresha imbuga nkoranyambaga nabi byabagizeho ingaruka bamwe hari ibyo barimo kubazwa mu butabera. Icyo rero tugamije ni ukubwira abantu ngo ni byo dufite uburyo buhagije mu kwisanzura ariko dushishoze muri ubwo bwisanzure dufite”.

Umunyamakuru Hakuzwumuremyi Joseph yemeza ko hari abanyamakuru n’abandi bantu muri iyi minsi bakwirakwiza amakuru y’ibihuha cyane cyane mu bihugu bituranye n’u Rwanda bityo ko byakumirwa hakiri kare.

Ati: “Hari aho biri ku buremere ku buryo byagira ingaruka ku mutekano w’Igihugu. Mu buzima bwa buri munsi ibyo abantu babamo hari aho bashobora guhangayikishwa n’ubuzima, ugasanga hari abantu batangaza inzangano, abatangaza abantu bapfuye bakoresha amafoto ya kera. Mbona rero ko mu Rwanda na ho ntabwo abantu bakwicara ngo barambye kuko imigirire mibi, irandura. Ibiba ahandi burya byaba n’iwanyu cyane cyane ko ababifitemo inyungu zishobora kwimuka.”

Yakomeje agira ati: “Imbuga nkoranyambaga zahaye ijambo buri wese ariko buri wese ntabwo ari uko ari umunyamakuru. Itangazamakuru risanzwe rihanganye n’imbuga nkoranyambaga zahaye ijambo buri wese, umuntu utangaza abivuga mu buryo bwe, akaba yarengeje ibyari kuvugwa cyangwa yabitangaje mu nyungu ze”.

Yunzemo ati: “Niba hari ibigo bishinzwe gutanga amakuru bakwiye kwagura ku buryo buri muntu wese abona amakuru kandi mu buryo abantu bashobora kuyabona byoroshye”.

Ayanone Solange, impuguke mu itangazamakuru, we yagize ati: “Hari umuntu uzana amakuru ngo hari akazi muri Canada, hari uburyo kurihira abantu kaminuza mu bihugu byo hanze, ugasanga umuntu ahise abikwirakwiza nta n’amakuru yasuzumye ariko nta bushake bwo gukora nabi afite kuko azi ko ari amakuru y’ukuri, ugasanga hari abatekamutwe bayihishe inyuma bakagenda biba abantu amafaranga. 

Mu by’ukuri ni ikibazo gikomeye bamwe mu Banyarwanda dufite uyu munsi ntabwo bicara ngo basesengure icyo babonye, ese mbere yo gukwirakwiza ku mbuga nkoranyambaga aya makuru ndayizeye, ako kantu ngo akibaze, ahubwo arayobona akabona ni akantu yasangiza abandi agahita agashyiraho.”

Mbungiramihigo Peacemaker, Umuyobozi Mukuru muri Minisiteri y’Ubutegetsi bw’Igihugu ushinzwe Politiki y’Itangazamakuru, asobanura ko nka Minisiteri barimo gushaka umuti urambye wo kwigisha abantu mu ngeri zitandukanye, kwirinda gutangaza ibihuha.

Yagize ati: “Abayobozi mu byiciro bitandukanye bahuriramo ku rwego rw’Intara,  Akarere, Imirenge, Utagari n’Imidugudu bahawe amahugurwa yo kubafasha kugira ngo barangize inshingano zabo, banabaha umwanya wo kuganira kugira ngo bamenye uko baganira n’itangazamakuru, uko bakora itumanaho, gusangira amakuru kugira ngo barusheho kwesa imihigo, bakabihuza n’imikoranire mu gihe bahuye n’itangazamakuru.”

Avuga kandi ko hari gahunda yateguwe na MINALOC yo kwigisha abantu bahereye ku banyeshuri mu mashuri abanza, ayisumbuye ndetse na kaminuza bahabwa ubumenyi bwo kumenya gusesengura, amakuru bumvise yaba ku bitangazamakuru bya Radiyo, Televiziyo cyangwa atangajwe kuri murandasi, bakabasha gukuramo ay’ukuri kandi yanabagirira umumaro.

  • ZIGAMA THEONESTE
  • Gashyantare 23, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE