Abanyamakuru bo mu Majyepfo bagabiye inka Sendakize warokotse Jenoside

  • Imvaho Nshya
  • Nyakanga 19, 2023
  • Hashize amezi 10
Image

Sendakize Joseph warokotse Jenoside yakorewe Abatutsi mu 1994 utuye mu  Mudugudu wa Kabambati, mu Kagari ka Rwoga, mu Murenge wa Ruhango, mu Karere ka Ruhango, mu Ntara y’Amajyepfo yagabiwe inka n’abanyamakuru bakorera muri iyo Ntara ku gicamunsi cyo kuri uyu wa 18 Nyakanga 2023.

Aba banyamakuru bagize iki gitekerezo bagambiriye gutanga umusanzu wabo mu mibereho myiza y’Abanyarwanda bagera ikirenge mu cya Perezida Paul Kagame  washyizeho gahunda ya Girinka Munyarwanda.

Sendakize yagize ati: “Nkurikije uburyo nagabiwe inka n’abanyamakuru ndishimye, nkurikije uburyo twahingaga ntitweze kubera ikibazo cy’ifumbire. Ku bwange ndumva byandenze. Mumpaye inka nziza, rwose pe! Murakoze. Sinibagiwe no gushima n’Akarere n’Umurenge bantekerejeho bati umuturage wacu akwiye korora”. 

Yongeyeho ko akurikije amahirwe yo kuba abonye inka igiye kuzagira ikindi imugezaho, akazatera imbere kandi akoroza n’abandi. 

Ati: “Nk’abanyamakuru kuba barateguye kumpa inka, byanshimishije cyane nta n’urugero nabona nabishyiraho […] kandi nzaziturira abandi, nk’uko mumpaye nanjye”.  

Undi muturage yongerewe igishoro mu bucuruzi asanzwe akorera mu isoko rya Ruhango, Nyiramana Jannine ucumbitse mu Mudugudu wa Kigabiro, mu Kagari ka Nyamagana ufite ubumuga bw’ingingo yavuze ko afite ikibazo cyo kurera abana 3 kuko umugabo yabamutanye.

Nyiramana Jeannine ashyikirizwa ibahasha irimo amafaranga yo kumwongerera igishoro

Yagize ati: “Kuba mundemeye ndishimye, ndanezerewe bitewe nuko ubu nabasha kugira icyo mbona bakarya. Ubundi barya ku manywa cyangwa nijoro, ubundi umugiraneza akampa umwenda wo kwambara ni uko tubayeho. 

Mu duke nari mfite ndashakisha ngo ndebe ko abana barya. Ikingoye ni ukutagira aho kuba no gutunga abana bikangora no kuba ntazongera kugurirwa  ubwisungane mu kwivuza, nkibaza ukuntu nzajya nivuza n’abana bikanyobera”. 

Umuyobozi w’Akarere ka Ruhango wungurije ushinzwe imibereho myiza y’Abaturage, Mukangenzi Alphonsine yashimiye abanyamakuru igikorwa cyiza cyo kugabira inka umuturage waho. 

Yavuze ko abanyamakuru ari abafatanyabikorwa kuba dusanzwe dufatanya mu gukora inkuru  mu Karere na byo ni ubufatanyabikorwa ariko uyu munsi hiyongereyeho igikorwa cyiza cyo kugabira inka umuturage w’Akarere ka Ruhango. 

Yagize ati: “Ni igikorwa cyadushimishije nk’ubuyobozi bw’Akarere. Abanyamakuru twari dusanzwe duhurira mu bindi bikorwa, ni ubwa mbere tubonye itsinda ry’abanyamakuru bakorera mu Ntara y’Amajyepfo bagira igitekerezo cyo kugabira umuturage. Ubundi kugaba inka ni umuco mwiza twatojwe na Perezida wa Repubulika Paul Kagame, ariko kuba abanyamakuru bagize iki gitekerezo ni umuco mwiza tubashimira”.

Yongeyeho ko igikorwa abanyamakuru bakoze kigiye gutuma umuryango, utekana kandi ko ari igikorwa cy’urukundo.

Koroza abaturage ni umuhigo w’Akarere biradufasha kwesa imihigo kandi Sendakize yavuze ko ari ibyiza bitashye iwe, ntako bisa tugiye kugira wa muryango utekanye, unezerewe kuko worojwe inka , kugabirwa inka mu muco nyarwanda ni igikorwa cyiza cyane, ni ighango, ni urukundo”. 

Uhagarariye abanyamakuru mu Ntara y’Amajyepfo, Muhizi Elisee yavuze ko uretse akazi kabo ka buri munsi ko gutara no gutangaza inkuru, gukora ubuvugizi no kuba abafatanyabikorwa ari n’abaturage na bo ubwabo bagira uruhare mu mibereho myiza y’Abanyarwanda.

Ati: “Iki gitekerezo cyatujemo dushaka gusohoka mu mwambaro atari ukubakorera ubuvugizi mu nkuru, ahubwo bikaba nk’umuhigo, umuhigo wo gushyigikira gahunda za Leta mu gushumbusha no kuremera  abaturage batishoboye ngo tubazamurire imibereho yabo, ibe myiza”.

Yongeyeho ati: “Iki gikorwa kiri mu rwego rwo gushyigikira gahunda ya Nyakubahwa Perezida wa Repubulika yo kuremera abaturage muri gahunda ya Girinka”.

Yakomeje avuga kandi ko ari umuhigo abanyamakuru bihaye y’uko buri mwaka bazajya bagira igikorwa bakora, bagafata umuntu umwe mu Karere ndetse ubushobozi bwakwiyongera bagafata abarenze umwe.

Uretse kuba abanyamakuru bagabiye inka umuryango banamuhaye bimwe mu by’ibanze nk’imiti n’umunyu, banongereye igishoro undi muryango kandi bombi banagenewe ibiribwa n’ibikoresho by’isuku.

Yakanguriye abo mu yindi myuga kwishyira hamwe  kugira ngo baremere abatishoboye.

Yanditswe na NYIRANEZA Judith

  • Imvaho Nshya
  • Nyakanga 19, 2023
  • Hashize amezi 10
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE