Abanyakigali basabwe kurangwa n’urukundo n’ubumwe mu cyunamo

  • NTAWITONDA JEAN CLAUDE
  • Mata 6, 2022
  • Hashize imyaka 2
Image

Guhera kuri uyu wa Kane taliki 07 Mata 2022 mu Rwanda no ku Isi haratangira gahunda y’icyumweru cyo kwibuka ku nshuro ya 28 Jenoside yakorewe Abatutsi.

Imibare igaragazwa n’inzego zitandukanye zirimo n’Umuryango w’Abibumbye (UN), Abatutsi basaga miliyoni bishwe mu gihe cy’iminsi 100 bazira ko ari Abatutsi.

Imibare yagarajwe mu gitabo ‘Inzira ya Jenoside yakorewe Abatutsi mu Rwanda’ cyanditswe na Minisitiri Dr. Jean Damascène Bizimana, yerekana ko mu Mujyi wa Kigali hishwe Abatutsi 56,052.

Ubuyobozi bw’Umujyi wa Kigali busaba awutuye ko mu gihe cyo kwibuka ku nshuro ya 28 Abatutsi bazize Jenoside mu 1994, barangwa n’urukundo ndetse n’ubumwe.

Meya w’Umujyi wa Kigali, Pudence Rubingisa, asaba abaturage kurangwa n’ubumwe n’urukundo.

Ati: “Mu gihe cyo kwibuka twegera incike za Jenoside yakorewe Abatutsi ndetse no kugaragara mu kubungabunga bimwe mu bimenyetso ariko tunarandura burundu ingengabitekerezo n’aho yarangwa hose”.

Akomeza agira ati: “Turasabwa cyane cyane gukurikirana gahunda za Leta zose zirimo kwitabira ibiganiro nkuko byateguwe, tunagira uruhare rwo kwegera imiryango yabuze ababo muri Jenoside yakorewe Abatutsi aho tugomba kugaragaza rwa rukundo”.

Bimwe mu biganiro bizatangwa, ubuyobozi bw’Umujyi wa Kigali buvuga ko hari amasomo azagarukwaho mu biganiro bizatangwa ku bakiri bato.

Amasomo agaragaza ipfobya, abayikora ndetse n’abayigiramo uruhare, bugasaba ko buri wese agira uruhare mu kurwanya abahakana Jenoside yakorewe Abatutsi.

Ubuyobozi busaba abatuye Umujyi wa Kigali kwitabira ibiganiro. Buti “Twese kwibuka tubigire ibyacu bibe ibintu bizahera mu isibo, mu mirenge ndetse no ku rwego rw’igihugu”.

Meya Rubingisa yagaragaje ko Akarere ka Kicukiro kakomeje kuza ku isonga muri gahunda za Ndi umunyarwanda mu Mujyi wa Kigali.

  • NTAWITONDA JEAN CLAUDE
  • Mata 6, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE