Abana b’ingagi 20 bagiye guhabwa amazina mu Kwita Izina 2022

  • NTAWITONDA JEAN CLAUDE
  • Kanama 19, 2022
  • Hashize imyaka 2
Image

Taliki 2 Nzeri 2022, mu Rwanda hagiye kuba umuhango wo Kwita Izina abana b’ingangi 20 bavutse muri uyu mwaka, umuhango ngarukamwaka ugiye kuba imbonankubone nyuma y’imyaka ibiri ukorwa hifashishijwe ikoranabuhanga mu rwego rwo gukumira ikwirakwira ry’icyorezo cya COVID-19.

Ubuyobozi bw’Urwego rw’Igihugu rw’Iterambere buvuga ko uyu muhango uzabera mu Murenge wa Kinigi, Akarere ka Musanze nk’uko byahoze mbere y’uko hatangizwa gahunda yo kuwukorera ku ikoranabuhanga kubera icyo cyorezo cyibasiye isi yose.

RDB ivuga ko urwego rw’ubukerarugendo rutangiye kwijajara nyuma yo gushegeshwa n’icyorezo cya COVID19 muri iyi myaka 2 ishize.

Umuyobozi ushinzwe ubukerarugendo no kurengera urusobe rw’ibinyabuzima muri RDB Ariella Kageruka, uyavuze ko mu mwaka ushize w’ingengo y’imari warangiye muri Kamena 2022, ubukerarugendo bwinjirije igihugu asaga miliyoni 160 z’amadolari y’Amerika, ni ukuvuga hafi miliyari 170 z’amafaranga y’u Rwanda.

Ni mu gihe muri 2019 uru rwego rwari rwinjirije u Rwanda asaga miliyoni 200 z’amadorali, ni ukuvuga asaga miliyari 200 z’amafaranga y’u Rwanda.

Kwita izina muri uyu mwaka bizaba mu gihe ubukungu bukomeje kuzahuka kubera ibihe bya COVID-19, byatumye inyungu ivamo yaragabanyutse ku kigero cya 70%.

Guverineri w’Intara y’Amajyaruguru, DanciIlle Nyirarugero, yavuze ko abantu baturiye Pariki y’Igihugu y’Ibirunga bishimira umusaruro uva mu kurengera ingagi n’urusobe rw’ibinyabuzima.

Ati: “Kuba umuhango wo Kwita Izina buri mwaka ubera mu Ntara y’Amajyaruguru, ni ishema ku baturage n’amahirwe yo gusurwa n’abantu baturutse imihanda yose.”

Yavuze ko kuva mu 2005 abaturiye Pariki y’Ibirunga bamaze guhabwa inkunga hafi miliyari 3 z’amafaranga y’u Rwanda binyuze mu mishinga irimo amashuri, amazi, amavuriro n’ibindi.

Umunyamabanga Nshingwabikorwa w’Intara y’Amajyaruguru, Dr. Mushaija Geoffrey yavuze ko umuhango wo Kwita izina ari amahirwe yo gucukumbura umwihariko w’ubwiza bw’Intara y’Amajyaruguru.

RDB yo ikomeza itangaza ko Kwita Izina bisanisha n’umuco gakondo umaze ibinyejana aho Abanyarwanda bita abana babo imbere y’umuryango n’inshuti. Mu 2005, u Rwanda rwatangiye kwita izina ingagi zo mu misozi ndetse byahindutse ibirori bizwi ku rwego mpuzamahanga.

Ikindi uyu muhango ni umwanya wo gushimira abaturage batuye hafi ya Pariki y’Igihugu y’Ibirunga, abafatanyabikorwa mu bushakashatsi, abaveterineri n’abashinzwe kubungabunga ibidukikije, abashinzwe umutekano ndetse n’abakurikirana ingagi (kuzirinda).

Kuva umuhango wo kwita izina abana b’ingagi watangira izigera kuri 354 ni zo zahawe amazina.

  • NTAWITONDA JEAN CLAUDE
  • Kanama 19, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE