Abana bagira inama bagenzi babo banywa inzoga kuzireka

  • KAMALIZA AGNES
  • Mutarama 4, 2024
  • Hashize amezi 2
Image

Hari abana bavuga ko bamwe muri bagenzi babo bishora mu ngeso mbi zirimo kunywa inzoga usanga bibaviriyemo ingaruka zirimo nko kwirukanwa ku ishuri bigatuma batagera ku nzozi zabo, ari naho bahera babagira inama yo kuzireka.

Aba batangaza ko bamwe muri bagenzi babo banyoye inzoga bagira imyitwarire idasanzwe yabagiraho ingaruka ubwabo, ndetse ikabangamira na bagenzi babo.

Abaganiriye n’Imvaho Nshya bavuga ko impamvu bagenzi babo banywa inzoga bababwira ko zituma bashira ubwoba, bakabagira inama yo kuzireka kuko zibicira ubuzima.

Niyomufasha Jesy Kelia wo mu Karere ka Rwamagana avuga ko hari mugenzi we wazinyoye atangira kugira imyitwarire idasanzwe irimo no kurira.

Ati: “Ubundi njye nabonye yahindutse, atangira ambwira inkuru zisekeje ubundi nyuma ararira cyane ariko iyo ku ishuri badufata bari kumwirukana ugasanga ataye ishuri.”

Mugabe Eliane uturuka mu Karere ka Gisagara nawe ati: “Hari abana twigana banywa inzoga batubwira ko zituma bagira ibindi byiyumviro (kujya high) kandi bakagenda bisanzuye nta soni bafite. Nabagira inama yo kuzireka kuko bahora batwigisha ububi bwazo.”

Minisiteri y’Uburinganire n’Iterambere ry’Umuryango MIGEPROF ivuga ko abakiri bato bakwiye kugira uruhare mu kwirinda ibyabicira ubuzima nk’ibisindisha ndetse bagafata n’iya mbere mu kubirinda na bagenzi babo.

Igaragaza ko abana ari bo bazavamo abayobozi bo mu nzego zitandukanye bityo ko badakwiye kwijandika mu byabangiriza ubuzima kuko igihugu kibahanze amaso.

Minisitiri w’Uburinganire n’Iterambere ry’Umuryango Dr Uwamariya Valantine yasobanuye ububi bw’inzoga.

Ati: “Impamvu inzoga zikurura abantu hari uburyo bubiri zikoramo icya mbere ziragutera kwishima kuko utangira unywa gake ukumva ibyishimo ariko uko ugenda unywa byisumbuyeho bigira ingaruka ku buzima, ikinyobwa unyweye kirimo ikinyabutabire cya metanolo, iyo unyoye inzoga 95% by’alukolo biguma mu mubiri mu gihe 5% ari ko gasohoka mu myanda ya 95% isigara mu mubiri ijya mu mutima, mu mwijima, mu bihaha,mu bwonko n’ahandi”.

Yongeyeho ko uko ukomeza kunywa inzoga ikigero cy’alukolo kijya mu maraso kijyana n’ingaruka zitandukanye, ku buryo  ugeze ku kigero cya garama 2 anywa inzoga atangira kugira ingaruka zitandukanye zirimo kwibagirwa, ntabashe kugira igaruriro mu byo akora n’ibyo avuga.

Dr Uwamariya agira inama abakiri bato kwirinda ibyo ari byo byose byabangiriza ubuzima kuko bibabuza kugera ku nzozi zabo ndetse bikadindiza iterambere ry’igihugu.

Mu gitabo cy’amategeko ahana ibyaha mu Rwanda, itegeko No.71/2018 ryo ku wa 31 Kanama 2018 ryerekeye kurengera umwana mu ngingo yaryo ya 27 igika cya 3 rivuga ko umuntu ugurisha umwana inzoga cyangwa itabi, ubimushoramo cyangwa umushishikariza kubinywa cyangwa kujya mu tubari aba akoze icyaha.

Iyo abihamijwe n’urukiko ahanishwa igihano cy’igifungo kitari munsi y’amezi atatu ariko kitageze ku mezi atandatu n’ihazabu y’amafaranga y’u Rwanda atari munsi ya 100 000 ariko atarenze 200 000 Frw.

  • KAMALIZA AGNES
  • Mutarama 4, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE