Abana bagaragarijwe ibyo bakwirinda banizezwa gukemurirwa ibibazo bikibugarije

  • NYIRANEZA JUDITH
  • Ukuboza 28, 2023
  • Hashize amezi 5
Image

Abana bitabiriye Inama y’Igihugu y’abana ku nshuro ya 16 bari mu Kigo cy’Ubutore cya Nkumba mu Karere ka Burera bagaragaje ibibazo bibangamiye uburenganzira bwabo, bizezwa ko bigiye gushakirwa ibisubizo.

Iyi nama ifite insanganyamatsiko igira iti “Ejo Ni Njye”.

Minisitiri w’Uburinganire n’Iterambere ry’Umuryango MIGEPROF, Dr Uwamariya Valentine yasabye abana bitabiriye Inama Nkuru y’Igihugu y’Abana ya 16 kwirinda ibyabangiriza ejo heza hazaza habo, anabizeza ko imbogamizi bagaragaje ku burenganzira bwabo zigiye gushakirwa ibisubizo.

Minisitiri w’Uburinganire n’Iterambere ry’Umuryango Dr Uwamariya Valentine

Yagize ati: ” Mwirinde ibisindisha birimo n’inzoga, kuko bituma mudakura neza ntimugere no ku byo mwifuza kugeraho no kugeza ku gihugu”.

Minisitiri Dr Uwamariya yavuze ko kubaka umunyarwanda wifuzwa bitangira kare uhereye ku bana bato, agaragaza ko iri huriro rigamije kubaka ubushobozi bw’abana.

Abana batanze ibitekerezo byibanze ku bibazo bifuza ko byakwihutishwa mu kubikemura kuko bibangamira uburenganzira bwabo.

Bagarutse ku kibazo cy’abana bafite ubumuga batabona serivisi zose nk’abandi, basabye ko ibibazo birimo amakimbirane yo mu miryango n’ifunguro rihabwa abana ku ishuri ridahagije byakwitabwaho n’ibindi kuko biri mu bikibabangamiye.

Dr Uwamariya yabijeje ko bigiye gushakirwa ibisubizo.

Ati: “Mu byifuzo mwagaragaje birimo n’abagihohoterwa n’ababyeyi kubera amakimbirane yo mu ngo bigiye gushakirwa ibisubizo”.

Nyiricyubahiro Umushumba wa Diyoseze Gatulika ya Ruhengeri, Musenyeri Vincent Harorimana yibukije abana uburenganzira bwabo, agaruka no ku nshingano zabo ababwira ko bagomba kwemera kurerwa, kumvira ababyeyi n’abarezi no kudapfusha ubusa impano.

Minisitiri w’Uburinganire n’Iterambere ry’Umuryango Dr Uwamariya yavuze ko Inama Nkuru y’Igihugu y’Abana ari ikimenyetso cy’umuhate w’Ubuyobozi Bukuru bw’Igihugu mu kubaka umunyarwanda ufite ubumenyi buhamye, ubuzima bwiza mu mubiri no mu mutwe kandi abayeho mu muryango utekanye.

Mu butumwa bw’umwana uhagarariye abandi, Sarah Asiimwe yasabye ababyeyi gukomeza kuba hafi y’abana babatoza uburere bwiza, asaba abayobozi gukomeza gushyiraho gahunda n’ingamba ziteza imbere uburenganzira bw’abana, asaba abarezi kubaha ubumenyi buzabafasha gutegura ejo heza habo.

Byari ibyishimo ku bana bitabiriye Inama Nkuru y’Igihugu y’Abana ubwo basusurutswaga n’umuhanzi kandi banafashe umwanya wo kwidagadura babifashijwemo n’itsinda rya Kanazi Talent Kids.

  • NYIRANEZA JUDITH
  • Ukuboza 28, 2023
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE