Abakuru b’Ibihugu bashobora kwemeza RDC nk’umunyamuryango wa 7 wa  EAC

  • NTAWITONDA JEAN CLAUDE
  • Werurwe 28, 2022
  • Hashize imyaka 2
Image

Kuri uyu wa Kabiri taliki ya 29 Werurwe 2022, ahagana saa tanu za mugitondo, Abakuru b’Ibihugu bigize Umuryango w’Afurika y’Uburasirazuba (EAC) bitezwe guhurira mu nama idasanzwe ya 19, izaba mu buryo bw’Ikoranabuhanga , aho byitezwe ko bazongera gusuzuma umushinga wo kwinjiza Repubulika Iharanira Demokarasi ya Congo.

Ku murongo w’ibizigirwa muri iyi nama harimo kurebera hamwe raporo y’inama yahuje Abaminisitiri bo muri uyu muryango n’aba Repubulika iharanira Demukarasi ya Congo, yigaga ku busabe bw’iki gihugu bwo kwinjira muri uyu muryango.

Inama y’Abaminisitiri bo muri uyu muryango wa EAC yateranaga ku nshuro yayo ya 48 ku wa Gatanu taliki ya 25 Werurwe 2022, ikaba yaragaragaje bimwe mu by’ingenzi ngenderwaho kugirango Repubulika iharanira Demukarasi ya Congo yemererwe kuba umunyamuryango wa EAC, ari nabyo bizigwaho n’inama y’Abakuru b’Ibihugu.

Umuryango wa Afurika y’Uburasirazuba ufite icyicaro i Arusha muri Tanzania, ugizwe n’ibihugu bitandatu ari byo u Burundi, u Rwanda, Kenya, Sudani y’Epfo, Tanzania ndetse na Uganda. Sudani y’Epfo ni cyo gihugu giheruka kwemezwa nk’umunyamuryango mushya, mu gihe ubusabe bwa DRC na bwo bumaze iminsi buri ku meza y’uyu muryango.

Muri Nzeri 2021, ni bwo EAC yatangaje ko yamaze gukora raporo igaragaza niba RDC yujuje ibisabwa kugira ngo yemererwe kuba igihugu cya karindwi cy’umunyamuryango ndetse yavuze ko iyo raporo itanga icyizere. Hari mbere y’uko isuzumwa n’Akanama k’Abaminisitiri k’uyu muryango.

Inama idasanzwe ya EAC yo ku wa 27 Gashyantare 2021, ni yo yasuzumye ubusabe bwa RDC bwo kwinjira muri uyu muryango nk’igihugu cyari kimaze imyaka igera kuri itatu gisabye winnira muri uyu muryango umaze kuba ubukombe.

Muri iyo nama idasanzwe ni na ho hashyizweho itsinda ry’impuguke eshatu zo muri buri gihugu kigize Umuryango n’abandi bantu babiri batanzwe na RDC isaba kwinjira mu muryango, batangira gukora ubushakashatsi bwo kugenzura icyo gihugu cyakemererwa kwinjira muri EAC.

Mu byagenzuwe n’iryo tsinda harimo imiterere y’iki gihugu hiherereye mu Burengerazuba bw’u Rwanda, ibijyanye n’ubukungu bwacyo, amategeko mpuzamahanga ndetse n’ay’imbere mu gihugu ndetse n’ibindi bigenga amasezerano ashyiraho EAC.

Iki gihugu gihana imbibi n’ibihugu bitanu muri bitandatu bigize EAC, ari na yo mpamvu kwinjira muri uyu muryango byagura amahirwe y’ubuhahirane bw’ibihugu kandi bikanongerera imbaraga uyu muryango.

Nyuma y’iyo nama igiye guhuza Abakuru b’Ibihugu bigize EAC, biteganyijwe ko Umuyobozi wa EAC Dr. Peter Mathuki azagirana ikiganiro kirambuye n’abanyamakuru kizakorwa mu buryo bw’ikoranabuhanga kizagaruka ku nginro zitandukanye by’umwihariko ijyanye n’iyemezwa rya RDC nk’umunyamuryango mushya wa 7.

Urugendo rwa RDC rwo gusaba kwinjira muri EAC rwatangiye taliki ya 8 Kamena 2019, igihe Perezida wa Repubulika y’u Rwanda Paul Kagame akaba yari n’Umuyobozi Mukuru w’Inama Nkuru y’Abakuru b’Ibihugu bigize uyu muryango, yakiraga ibaruwa ya mugenzi we wa RDC Felix Antoine Tshisekedi Tshilombo wagaragazaga ko yifuza ko Igihugu cye cyakwinjira muri EAC.

Kugeza magingo aya, iki gihugu gikomeje kugaragaza ubushake ntagereranywa bwo kwinjira muri uyu muryango utanga amahirwe menshi y’ubukungu n’ubutwererane mu bya dipolomasi.  By’umwihariko RDC ibonwa nk’ikiraro gikomeye gihuza EAC n’Isi yose, cyane ko ari Igihugu kinini gikora ku Nyanja y’Atlantika, nk’amahirwe yiyongera ku kuba bimwe mu bihugu bigize umuryango byakoraga ku Nyanja y’u Buhinde gusa.

  • NTAWITONDA JEAN CLAUDE
  • Werurwe 28, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE