Abakozi b’Umujyi wa Kigali bashashe inzobe bavuga ahari ruswa

  • NTAWITONDA JEAN CLAUDE
  • Gicurasi 5, 2022
  • Hashize imyaka 2
Image

Umuryango Urwanya Ruswa n’Akarengane Ishami ry’u Rwanda (TI-Rwanda), mu kwezi k’Ukuboza 2021 wagaragaje ko kwaka ruswa mu bice bigize imijyi biri ku kigero cya 33,47%.

Mu kiganiro cyihariye Imvaho Nshya yagiranye n’Umuyobozi w’Umujyi wa Kigali Pudence Rubingisa, yavuze ko ruswa ari kirazira ari yo mpamvu Inzego z’ibanze mu Mujyi wa Kigali zashashe inzobe ahari icyuho cya ruswa.

Byagarutsweho mu nama nyunguranabitekerezo yahuje Inzego z’ibanze mu Mujyi wa Kigali, inzego z’umutekano, Urwego rw’Umuvunyi na TI-Rwanda kuri uyu wa Gatatu taliki 03 Gicurasi 2022 mu Karere ka Kicukiro.

Mu Mujyi wa Kigali hakunze kuvugwa ruswa by’umwihariko muri serivisi z’ubutaka kimwe n’ahasabirwa ibyangombwa byo kubaka, gusana n’ibindi.

Rubingisa agaragaza ko ruswa ari ikizira kandi ko kuyirwanya atari iby’umuntu umwe. Ashimangira ko intego ari ukurandura ruswa.

Ati: “Ruswa ni kirazira kandi ntabwo ari urugamba rw’umuntu umwe, ni twese kandi umurongo twarawuhawe ndetse n’imbaraga zirahari n’ubushake burahari.

Twahagurukiye kurwanya ikintu cyitwa ruswa n’akarengane, ubundi dusanzwe tugira gahunda ngarukamwaka tukagira icyumweru cy’ubukangurambaga bwo kurwanya ruswa n’akarengane.

Uyu mwaka rero twashyizemo imbaraga nyinshi cyane tujya no mu baturage kugira ngo tugire ibyo tubasaba. Tubwira umuturage tuti tanga amakuru ahantu ubona icyuho gishobora gutuma umuntu bamwaka ruswa”.

Abatuye Umujyi wa Kigali basabwa gutanga amakuru ahantu hari serivisi zitanoze ndetse n’ababasaba ruswa.

Ibyuho bya ruswa bigaragara muri serivisi z’ubutaka, serivisi zitanga ibyangombwa cyo kubaka, impushya zo kubaka no gusana inzu.

Iyo umuturage afite ibyo asabwa mu kubaka arabisobanurirwa, iyo asaba ibitemewe n’amategeko nabwo ngo ababishinzwe bagombye kubibasobanurira.

Meya w’Umujyi wa Kigali agaragaza ko hari abatajya gusaba icyangombwa byo kubaka cyangwa icy’ubutaka kuko ngo hari Imirenge runaka haba hari umukozi washyizeho igiciro ku cyangombwa bizwi neza amafaranga umuturage agomba kumuha.

Ati: “Abo turabashakisha, hari ukubaganiriza tukavuga tuti wowe kanaka ko uvugwaho ruswa nubwo itagaragaye ariko abaturage baraguhurizaho kubera iki ari wowe? Tuti isubireho”.

Kurwanya ruswa ngo ntibirangirana n’icyumweru cyari cyarahariwe kurwanya ruswa ahubwo ni gahunda igiye gukomeza kugira ngo bagabanye ruswa cyangwa bayirandure burundu.

Ruswa mu Mujyi wa Kigali inavugwa mu rwego rwa DASSO.

Bamwe mu bitabiriye inama nyunguranabitekerezo, bagaragaje impungenge z’abakozi bashinzwe ubutaka mu Mirenge aho usanga umukozi umwe atanga serivisi mu Mirenge ine mu Karere kamwe.

Mukaruyange Athanasie wo mu Murenge wa Jali mu Karere ka Gasabo, avuga ko hari ingamba akuye mu biganiro byatanzwe ku birebana na ruswa akaba agiye gufatanya na ba Midugudu kuyirwanya.

Ati: “Turabizeza ko nitugaruka muri iki cyumba imibare izaba yaragabanyutse, tugomba kurwanya ruswa igacika”.

Kayumba Bernard wo mu Murenge wa Masaka, Akarere ka Kicukiro, avuga ko ugaragaweho ruswa yajya abibazwa kuko ngo ruswa ari imungu ikomeye mu byiciro byose by’igihugu.

Umuyobozi w’Umuryango Mpuzamahanga Urwanya Ruswa n’Akarengane mu Rwanda (TI-Rwanda), Ingabire M. Immaculée, ashima itangazamakuru rikora neza mu gutangaza inkuru zivuga kuri ruswa.

Ashimangira ko hari abayobozi mu Nzego z’ibanze batinya itangazamakuru kubera ko ritangaza amakosa yabo.

Ruzayire Prosper, wari uhagarariye Urwego rw’Igihugu rw’Ubugenzacyaha (RIB) muri iyi nama, yasobanuye ko mu gihe utanze amakuru kuri ruswa icyaha kikaba kitaratangira gukurikiranwa, icyo gihe ufatwa nk’umutangabuhamya aho guhanwa n’itegeko.

Asaba abaturage by’umwihariko abo mu Mujyi wa Kigali kudahishira ruswa anasaba ubuyobozi gukomeza kwigisha ububi bwa ruswa.

Bizimana Patrick, Umuyobozi w’agateganyo w’Ishami rishinzwe kurwanya ruswa mu Rwego rw’Umuvunyi, agaragaza ko kwigwizaho umutungo udashobora gusobanura bigenzurwa.

Ati: “Harebwa ko bitakomotse kuri ruswa no guhabwa ibyo utemerewe guhabwa kubera icyubahiro cyangwa ubundi bubasha ufite”.

  • NTAWITONDA JEAN CLAUDE
  • Gicurasi 5, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE