Abakozi 2 000 bigishirijwe gucukura mine ku murimo  bahawe impamyabumenyi

  • ZIGAMA THEONESTE
  • Ukuboza 7, 2023
  • Hashize amezi 3
Image

Minisitiri w’Abakozi ba Leta n’Umurimo Prof. Bayisenge Jeannette, yasabye abakozi bahuguwe gucukura amabuye y’agaciro bari ku murimo kurushaho kunoza ibyo bakora.

Yabigarutseho ku wa Gatatu tariki ya 6 Ugushyingo, ubwo hatangwaga impamyabumenyi ku bakozi 2 000 bari basanzwe bakora mu bucukuzi bw’amabuye y’agaciro ariko batarabyize.

Ni amasomo bahawe bari mu kazi abafasha gukarishya ubumenyi muri uru rwego ngo banoze akazi nk’intego Leta y’u Rwanda yihaye yo kwimakaza umurimo unoze.

Umuyobozi wa Sendika y’abakora mu bucukuzi bw’amabuye na za Kariyeri, Eng Mutsindashyaka Andre, yagaragaje ko guha impamyabumenyi aba bakozi byongera umusaruro mu kazi.

Yagize ati: “Mu bakozi basaga ibihumbi 72 bari mu bucukuzi bw’amabuye y’agaciro, abenshi ntabwo bashoboye kwiga ngo bagire urwego rwa Kaminuza. Kuba rero barabikoze  kuva ku myaka ibiri kuzamura, abo ni bo Ikigo cy’Igihugu gishinzwe Guteza Imbere Amashuri y’Imyuga n’Ubumenyingiro (RTB), cyarebye bagatoranyamo 2 000 bakaba bahawe impamyabumeyi mu bijyanye n’ubucukuzi. Icya kabiri izi mpamyabumenyi babonye zabafasha kubona umurimo ubabeshaho.”

Yakomeje avuga ko kugira inararibonye muri uru rwego bizakuraho uru rwego ruva mu mirimo itanditse rukaba urwego rw’imirimo yanditse.

Ahamya ko guha impamyabumenyi aba bakozi bizamura urwego rw’ubucukuzi bw’amabuye y’agaciro birushijeho, nk’uko n’abagiye bahabwa aya masomo mu mwaka ushize bashimwa n’abakoresha babo.

Umwe mu bakozi bigishirijwe ku murimo yagaragaje ko nyuma yo guhabwa impamyabumenyi byamwongereye imbaraga.

Ati “Maze guhabwa impamyabumenyi byanteye imbaraga mu murimo w’ubucukuzi bw’amabuye y’agaciro kandi nkanabikundisha n’abandi.”

Yavuze ko nyuma yo guhabwa impamyabumenyi yandikiye Ikigo akorera bamuha amahirwe yo kuyobora abakozi bagenzi be barenga 300.

Minisitiri Prof. Bayisenge Jeannette yashimye intambwe imaze guterwa  mu rwego rw’ubucukuzi bw’amabuye y’agaciro, by’umwihariko ashimira ibigo bikora ubucukuzi bw’amabuye y’agaciro bifatanya mu guteza imbere uyu murimo.

Yagize ati: “Uruhare rw’ibigo by’ubucukuzi bw’amabuye y’agaciro  mu guteza imbere ubumenyi n’ubushobozi bikenewe ku isoko ry’umurimo ni ntagereranwa. Twizeye ko muzakomeza gukorana n’abafatanyibikorwa batandukanye no guteza imbere umusaruro n’umurimo unoze mu bucukuzi bw’amabuye y’agaciro kuko bituma abakozi n’abakoresha babibonamo inyungu. Tukaba twizeye ko bizateza imbere ihangwa ry’umurimo ndetse rigateza imbere n’igihugu cyacu”.

Yanasabye kandi abahawe impamyabumenyi ko ubushobozi bakwiye kuzibyaza umusaruro mu kazi bakora.

Ati: “Guhunda nk’iyi yo guha amahugurwa mu nzego zitandukanye bataba barabyigiye, ni ingenzi cyane kuko ituma abakozi babona iyi mpamyabumenyi bigaragaza ko bazi ibyo bakora kandi babikora neza, akaba ari na yo mpamvu twishimira ko aba barangije, bigiye ku murimo kandi bikaba bizanakomeza kuko hari n’ababanje. Turashimira sendika REWU ikomeje kubafasha”.

Gutanga impamyabumenyi byabanjirijwe n’umukino wahuje abamakipe yo mu bigo by’ubucukuzi bw’amabuye y’agaciro byo mu Turere twa Ruhango na Rubavu aho ikipe y’Akarere ka Ruhango  ari yo yatwaye igikombe ihembwa miliyoni imwe y’amafaranga y’u Rwanda.

  • ZIGAMA THEONESTE
  • Ukuboza 7, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE