Abakoresha imihanda ijya mu Majyepfo barasabwa kwitwararika

  • AKIMANA JEAN DE DIEU
  • Ukuboza 6, 2023
  • Hashize amezi 6
Image

Hashize igihe umuhanda Kigali-Muhanga werekeza i Huye haberamo impanuka zikorwa n’imodoka nto ndetse n’imodoka z’amakanyo.

Mu mpera z’icyumweru gishize mu Karere ka Kamonyi mu Murenge wa Gacurabwenge ahazwi nk’i Gihinga ikamyo yataye icyerekezo cyayo igonga Ipikipiki yo mu bwoko bwa TVS hapfa abantu 2 naho batatu barakomereka umwe ajyanwa ku bitaro bya Kanombe naho 2 bajyanwa ku bitaro bya Kaminuza bya Kigali (CHUK).

Umuvugizi wa Polisi mu Ntara y’Amajyepfo, SP Iyamuremye Emmanuel yabwiye Imvaho Nshya ko iyi mpanuka yatewe n’uko iyi kamyo yari ifite ibirango RAG 608 L yagenderaga ku muvuduko mwinshi ita umukono wayo igonga ipikipiki yo mu bwoko bwa TVS yari yambaye ibirango RG 595 S yari iriho Twagirimana Emmanuel na Uwiringiyimana Evangeline.

Ati: “Ni byo habaye impanuka yatewe n’ikamyo yataye icyerekezo cyayo igonga ipikipiki kubera umuvuduko mwinshi yagenderagaho ariko ntawapfuye ku bari bahekanye ku ipikipiki”.

Akomeza avuga ko byaturutse ku kugenda nabi mu muhanda ndetse no kutaringaniza umuvuduko bituma iyi kamyo iva mu cyerekezo cyayo igonga     moto, irakomeza iragenda igonga igiti abari bayirimo Maniragaba Valens na Dushimiyimana utaramenyekanye andi mazina bombi bahise bapfa naho Mushimiyimana Innocent wari utwaye iyi kamyo ajyanwa ku bitaro bya Kanombe.

Yibukije abakoresha uyu muhanda kujya baringaniza umuvuduko kandi bagakurikiza amategeko n’amabwiriza yo gukoresha umuhanda kugira ngo hirindwe impanuka zitwara ubuzima bw’abantu baba bagenda ku muhanda cyangwa bari mu bindi binyabiziga.

Umuvugizi wa Polisi mu Ntara y’Amajyepfo avuga ko mu kwezi gushize k’Ugushyingo habaye impanuka  zateye imfu  zabaye  17.64% naho  izikomeye zabaye ku kigero cya 21.56% naho izoroshye zigira ikigero cya  60.8%.

Kugeza iyi nkuru yandikwa, amakuru ahari ni uko Twagirimana Emmanuel na Uwiringiyimana Evangeline bari bakiri kwa muganga mu bitaro bya Kaminuza bya Kigali (CHUK).

  • AKIMANA JEAN DE DIEU
  • Ukuboza 6, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE