Abakoresha barasabwa gushyiraho ahabugenewe umubyeyi yonkereza umwana

  • Imvaho Nshya
  • Ugushyingo 1, 2023
  • Hashize amezi 7
Image

Hatangijwe icyumweru cyahariwe konsa, uhereye kuri uyu 01 Ugushyingo 2023, Ikigo cy’Igihugu gishinzwe Imikurire no Kurengera Umwana kirakangurira abakoresha gushyiraho ibyumba byabugenewe   byo konkerezamo.

Iki cyumweru kikaba gifite insanganyamatsiko igira iti ‘Duharanire ko Ababyeyi bonkereza aho bakorera’.

Ni mu gihe ubushakashatsi bwagaraje ko ababyeyi badohotse konsa aho bari ku kigero cya 84.3% mu mwaka wa 2015 ariko nyuma y’imyaka itanu bagera kuri 80.3%, ahanini bagasanga biterwa no kuba ababyeyi bahugira mu mirimo ntibabone uko bonsa.

Bamwe mu babyeyi baganiriye na Imvaho Nshya bagaragaje ko bishimiye iyi gahunda yo konkereza aho bakorera kuko bizabafasha gukora akazi batekanye badatewe ubwoba n’ubuzima bw’umwana basize mu rugo.

Umuyobozi w’ishuri ribanza n’iry’inshuke rya Rwimbogo Uwimana Annah, atanga ubuhamya bw’uko yari abayeho ataratangira konkereza umwana ku kazi ndetse n’uburyo yatangiye kumva yakunze abantu bose nyuma yaho atangiriye kujya yirirwana n’umwana we.

Ati: “Nkimara kubyara umwana w’imfura numvaga ntamusiga mu rugo kuko yari akiri muto namusiga nkumva ntizeye umutekano we, byatumye umunsi wa mbere nkora ntatekanye kuko nahoraga kuri telefone mbaza uko umwana ameze. Ariko ku munsi wa kabiri nagiye ku kazi mujyanye, narishimye nkora akazi neza ntanga umusaruro naho nakoraga nkumva abana nigisha nabakunze, abarimu nabakunze n’abayobozi nabakunze kuko numvaga umwana wange atekanye”.

Ntagisumbimana Emmanueline avuga ko iyi gahunda izongera urukundo rw’umwana n’umubyeyi kandi bizatuma batanga umusaruro uhagije mu kazi.

Ati: “Twajyaga dusiga abana mu rugo tukajya mu kazi dufite imitima ihagaze ntidukore neza nkuko bikwiye, ariko iyi gahunda izatuma dukora dushyize umutima hamwe kandi dukorane ingufu, kuba twakonsa umwana kandi tumubwira amagambo meza byongera urukundo hagati yacu”.

Umukozi Ushinzwe Imirire y’Umubyeyi n’Umwana mu Kigo cy’Igihugu Gishinzwe Imikurire no Kurengera Umwana Machara Faustin, avuga ko ubu bukangurambaga butangijwe buzagira umusaruro, agarakangurira abakoresha bose guteganya icyumba cyo konkerezamo.

Ati: “Uyu munsi twatumiye Minisiteri y’Abakozi ba Leta ubwo butumwa bwageze mu nzego bugomba kugeraho, twanatumiye kandi uhagarariye Urugaga rw’abikorera kugira ngo turebe ko hari icyakorwa, ni ubukangurambaga dutangiye kuko ntitwavuga ngo ejo buzacya byabaye, gahoro gahoro hari icyo tuzageraho tuzisuzuma umwaka utaha, ni urugendo ariko hari na hamwe hari ibyumba byabugenewe gusa twizeye ko n’ahandi bizahagera”.

Yongeyeho ko ubu bukangurambaga bwo konkereza umwana aho ukorera bwatangiye muri buri Karere mu Rwanda.

Minisitiri w’Uburinganire n’Iterambere ry’Umuryango Dr Uwamariya Valentine yibukije ko abakoresha batekereza ahabugenewe ho konkereza umwana kuko biri mu bizazamura umusaruro w’Ikigo umubyeyi akoramo.

Ati: “Ku babyeyi bonsa bafite akazi usanga umubyeyi amara amasaha arenga atandatu hanze y’urugo kandi kugira ngo umwana yonke bihagije bisaba ko aba yonse hagati nibura y’inshuro ebyiri n’enye, kugira ngo ibi tubigereho ku rugero rwiza birasaba ko aho bishoboka hose abakoresha bashyiraho uburyo bwo gufasha ababyeyi bonsa. Ibi bizafasha kuzamura ubuzima bwiza bw’umwana, umutekano mwiza w’umubyeyi ndetse n’umusaruro w’ikigo umukozi akoramo.”

Yaboneyeho gusaba ababyeyi konsa umwana mu isaha ya mbere akivuka, no kwita ku minsi igihumbi ya mbere y’umwana kandi akamwonkereza igihe.

Ubushakashasti buheruka bwagaragaje ko abana bonka amezi atandatu ya mbere bakivuka bangana na 81%, mu gihe abonsa mu isaha ya mbere umwana akivuka bangana na 85%.

KAMALIZA AGNES

  • Imvaho Nshya
  • Ugushyingo 1, 2023
  • Hashize amezi 7
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE