Abakinnyi batanu bahanzwe amaso muri CAN 2023

  • SHEMA IVAN
  • Mutarama 3, 2024
  • Hashize amezi 2
Image

Igikombe cy’Afurika ni irushanwa riba buri myaka ibiri, rikaba urubuga rwo kureberaho ibyamamare byiyereka Isi yose mu makipe y’Ibihugu bikomokamo ndetse abandi bakavumbuka nyuma yo kwerekana impano ya ruhago bakabengukwa n’amakipe y’ibigugu yo hirya no hino ku Isi.

Iki gikombe cy’abagabo kizatangira tariki 13 Mutarama kugeza tariki 11 Gashyantare 2024 mu gihugu cya Côte d’Ivoire. Abakinnyi baturutse ku migabane itandukanye y’Isi b’Abanyafurika bahagaze neza ndetse n’abakunzi ba ruhago ku Isi yose bategereje guhanga amaso.

Imvaho Nshya yabahitiyemo batanu muri bo bahanzwe amaso kurusha abandi.

1. Victor Osimhen

Rutahizamu w’Umunya-Nigeria, Victor Osimhen ukinira Napoli yo mu Butaliyani ni inyenyeri muri ba rutahizamu ku mugabane w’u Burayi.

Uyu rutahizamu wa Napoli aherutse kwegukana igihembo cy’umukinnyi mwiza w’Afurika wa 2023 nyuma yo gufasha Napoli kwegukana igikombe cya shampiyona nyuma y’imyaka 33 itagikozaho imitwe y’intoki.

Osimhen w’imyaka 24 yatangiye gukinira Ikipe y’Igihugu nkuru ya Nigeria afite imyaka 18 gusa mu 2017 nyuma yo guca mu byiciro bito byayo, akaba amaze kuyitsindira ibitego 20 mu mikino 27 ndetse aza ku mwanya wa kane mu bamaze kunyeganyeza inshundura nyinshi muri Super Eagles nyuma ya Rashidi Yekini ufite 37, Patrick Odegbami ufite 27 na Yakubu Ayegbeni wa 21.

Osimhen amaze gukina Irushanwa ry’Igikombe cy’Afurika rimwe mu 2019, yabuze amahirwe yo gukina irya 2021 kubera icyorezo cya COVID-19 nk’uko byatangajwe n’Ikipe ye ya Napoli ibintu byakuruye impaka ndende iwabo muri Nigeria.

Kuri Osimhen wasoje Shampiyona y’umwaka ushize ahiga abandi mu kunyeganyeza inshundura muri Serie A n’ibitego 26 kuri ubu muri Shampiyona y’u Butaliyani, igeze ku munsi wa 18, Victor Osimhen afite ibitego birindwi.

2. Mohamed Salah

Umwami wa Ruhago ya Misiri ategerejwe n’abatari bake haba iwabo, muri Afurika ndetse n’Isi yose muri rusange.

Nyuma yo gutsindwa na Sénégal ku mukino wa nyuma w’Igikombe cy’Afurika 2022 kuri penaliti 4-2 nyuma y’uko amakipe yombi anganyije 0-0, Mohamed Salah w’imyaka 31 arifuza gusoza mu Ikipe y’Igihugu nibura ayihesheje Igikombe cy’Afurika iheruka muri 2013

Uyu rutahizamu watangiye gukinira Misiri mu 2011 amaze gukinira Igihugu cye imikino 95 ndetse yagitsindiye ibitego 55, arifuza guca agahigo k’umukinnyi watsindiye Les Pharaons ibitego byinshi gasanzwe gafitwe n’Umutoza wa Al Massr, Hossam Hassan n’ibitego 68.

Mohamed Salah amaze gutsindira Liverpool ibitego 204 bimugira uwa gatatu ku rutonde rw’abamaze guca aka gahigo inyuma ya Ian Rush watsinze 336 na Roger Hunt n 261.

Muri Shampiyona y’uyu mwaka Mo Saha ni we uyoboye ba rutahizamu n’ibitego 14 mikino 20.

3. Mohammed Kudus

Umunya Ghana, Mohammed Kudus w’imyaka 23 ukina afasha ba rutahizamu ni umwe mu bakinnyi bari kuvugwa cyane muri Shampiyona y’u Bwongereza nyuma yo gutsinda ibitego bitatu mu mikino ibiri harimo n’icyo yatsinze Ikigugu Manchester United.

Kudus werekeje muri West Ham avuye muri Ajax d’Amsterdam yo mu Buholandi yakuruye amaso y’abakunzi ba ruhago batari bake dore ko kugeza ubu amaze gutsinda ibitego bitandatu muri Shampiyona y’Ubwongereza ndetse na bibiri muri UEFA Europa League.

Uyu musore amaze gutsindira Ghana ibitego icyenda mu mikino 30 amaze gukinira Igihugu cye guhera mu 2019. Nta Gikombe cy’Afurika na kimwe adakina kuko nubwo yari yashyizwe ku rutonde rw’abari gukina icya 2021 yagize ikibazo cy’imvune yatumye atakigaragaramo.

4. Serhou Guirassy

Umunya Guinea, Serhou Guirassy ukinira VFB Stuttgart ni we Munyafurika umaze gutsinda ibitego byinshi muri Shampiyona zo ku mugabane w’u Burayi na 17 mu mikino 14 gusa amaze gukina muri Shampiyona y’u Budage, Bundesliga.

Guirassy w’imyaka 27 wavukiye mu Bufaransa ndetse anakinira Les Blues mu byiciro byose by’abato haba abari munsi y’imyaka 16, 19 na 20 ntafite amateka ahambaye mu Ikipe y’Igihugu ya Guinea yatangiye gukinira mu 2022 kuko amaze kuyitsindira ibitego bitatu mu mikino 12.

Guinea ya Guirassy iri mu Itsinda C ryiswe iry’upfu hamwe na Cameroon, Sénégal na Gambia.

5. Sadio Mané

Umunya Sénégal, Sadio Mané w’imyaka 31 amaze gutsindira ibitego umunani Al Nassr ikina Shampiyona y’Icyiciro cya mbere muri Arabie Saoudite igeze ku munsi wa 19.

Ni Kapiteni wa Intare za Teranga, Ikipe y’Igihugu ya Sénégal ndetse ni na we umaze igihe afite agahigo ko kuyitsindira ibitego byinshi bigera kuri 40 aho akurikirwa na Hanry Camara n’ibitego 31 gusa wasezeye ku mupira w’amaguru.

Mane amaze gutsinda ibitego umunani mu marushanwa atatu y’Igikombe cy’Afurika amaze kwitabira mu 2017, 2019 n’iriheruka rya 2022 ryabereye muri Cameroun, ryegukanywe n’Igihugu cye ku nshuro ya mbere mu mateka yacyo.

Umukino uzafungura igikombe cy’Afurika CAN 2023 ku nshuro ya 34 uzahuza Côte d’Ivoire na Guinea- Bissau tariki 13 Mutarama 2024 saa yine z’ijoro ku isaha ya Kigali.

  • SHEMA IVAN
  • Mutarama 3, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE