Abahuje ubutaka buhingwaho barahabwa ifumbire ku buntu

  • NTAWITONDA JEAN CLAUDE
  • Ugushyingo 8, 2022
  • Hashize umwaka 1
Image

Abahinzi batangiye gushyikirizwa ifumbire bagenewe na Leta nta kiguzi hagamijwe kongera umusaruro by’umwihariko muri iki gihe Uturere tumwe na tumwe twugarijwe n’izuba muri iki  gihe cy’Umuhindo, igihembwe cy’ihinga 2023A,aho imvura yabaye nke.

Umuyobozi Mukuru w’Ikigo cy’Igihugu Gishinzwe Guteza imbere Ubuhinzi n’Ubworozi RAB Dr. Karangwa Patrick yatangaje ko ku bantu bahinga bahuje ubuso by’umwihariko muri iki gihembwe cya 2023 A cyaranzwe n’ibura ry’imvura mu duce tumwe na tumwe tw’igihugu, Leta irimo itanga ifumbire ku buntu ku bahinzi bahuje ubutaka hagamijwe kuzamura umusaruro.

Yabigarutseho mu kiganiro kuri RBA, asobanura ko Leta irimo gutanga iyo fumbire ku buntu aho imvura irimo kugenda igwa, ariko igahabwa abahuje ubuso.

Yagize ati: “Duhereye uko iteganyagihe rimeze ubona muri uku kwezi hari uko bitandukanye n’ukwa 10, […] Ikibazo cy’imvura ntikizakubita hose kuko hari Uturere twagize imvura nziza kandi ahongaho Leta yafashe ingamba zizatuma umusaruro uboneka. Ntihakwiye gucika igikuba ko hazaba inzara. Leta yashyizemo ingamba kugira ngo umusaruro uziyongere”.

Dr. Karangwa yakomeje agaragaza ibikorwa by’ingenzi Leta irimo gushyiramo imbaraga kugirango abahuje ubutaka bagezweho ifumbire n’ibindi bikoresho bifasha mu kuzamura umusaruro.

Ati: “Ibikorwa by’ingenzi mu guhangana n’ikibazo cy’imvura biri mu byiciro 3: Icya mbere ni ukongera ubuso bwuhirwa, ahari amazi  hose nko hafi y’ibiyaga hose Leta irahashyira ibikoresho byo kuhira ku bahuje ubutaka cyane cyane nk’ahari amakoperative, hari ubutaka buhujwe, hari amazi.

Icya kabiri ni ukwita ku guhinga ibihingwa bishobora kuba byafasha guhangana n’ibura ry’imvura, hari ibyihanganira izuba.

Icya gatatu ibice by’igihugu bifite imvura idahagije  nko mu Burasirazuba  n’Amayaga bagira izuba  [….] Leta irimo irabaha ifumbire ya nkunganire 100% ku ya UREA NA DAP Ndetse ku bahinga ibirayi ibaha iya NPK”.

Mu kwihutisha igikorwa cyo gutera ifumbire birakurikiranwa n’inzego z’ubuyobozi zitandukanye, kugira ngo kigende neza.

Dr. Karangwa yagize ati: “Abayobozi batandukanye bakurikirana amakoperative kimwe n’ahari ibyanya byuhirwa ahari ibishanga, ahakoreshwa moteri bakuhira. Ifumbire n’ibindi bibazo byaba bihari nabyo  ngo bikemurwe.

Inzego z’ubuyobozi zirakurikiranira hafi iki gikorwa ngo umusaruro uboneke, ingamba zafashwe  zirakurikirana kuva mu nzego zo hejuru, turagira ngo ibikorwa bikorwe kandi bikorwe neza, kuko iyo utinze gutera ifumbire usanga ntacyo ikiramiye igihingwa kimwe no kuhira ni ukubikora vuba”.

Yongeyeho ko ifumbire itagomba guterwa mu zuba.

Ati: “Ifumbire ntigomba guterwa mu zuba, ishyirwamo babagaye, naho ubundi ibyatsi byakurura intungagihingwa. ubushakashatsi bugaragaza ko bishobora gutwara hejuru ya 60%. Ni ngombwa gushyiramo ifumbire babagaye ngo umusaruro wiyongere. Icyo gihe banasuzuma ko nta byonnyi birimo”.

Uwabajije ikibazo wo mu Karere ka Nyagatare, mu Murenge wa Kiyombe cyo kuba ifumbire ya UREA n’iya DAP bishobora gushyirirwamo icya rimwe yamusubije ko bishoboka mu gihe mu itera atashoboye kubanza gushyiramo DAP.

Ati: “Ahantu hatatewe ifumbire na mbere hanatangwa ifumbire ya DAP ku batari barashyizemo ifumbire batera. Nibura 30% batera ifumbire basabwa gushyiramo UREA na DAP ku bihingwa byatoranyijwe nk’ibishyimbo, soya naho NPK yo ishyirwa mu birayi. Iyo utayishyizemo nta fumbire ufite mu gutera, ushyiramo DAP na UREA mu kubagara byombi nta kibazo”.

Ikindi cyagarutsweho ni uko n’abantu bafite ubutaka bunini budahuje hagenzurwa niba bahabwa ifumbire ku buntu, kuko ikigamijwe ari ukongera umusaruro.

Umuyobozi Mukuru wa RAB yagize ati: “Imbaraga zatangiye gushyirwamo no ku bikoresho byo kuhira ku bantu bashyize hamwe[…] Ahari amazi bafite uburengenzira igihe bishyize hamwe, n’abahinzi bahinga ubuso bunini n’iyo baba batarishyize hamwe tugamije kongera umusaruro. Ubuyobozi bubegereye bw’Akarere burakurikirana. Ibyo bikoresho ntacyo basabwa gutangaho, kuko ubusanzwe batangaga 50%”.

Abadahuje ubutaka ariko ari umuhinzi uteye imbere uhinga hanini  inzego ziragenzura hakarebwa niba yujuje ibisabwa kuko nk’ahari Hegitari 3 naho hongewemo.  Ikindi kandi n’ufite hanini hagenzurwa niba nta bundi bushobozi yari afite kuko ifumbire yazamutse, Leta irabafasha gusa hakagenzurwa ko hatarimo ababa bashaka gukora uburiganya.

Iki gikorwa cyo gutera ifumbire kirimo gukorwa hirya no hino mu gihugu, aho imvura irimo kugwa.

  • NTAWITONDA JEAN CLAUDE
  • Ugushyingo 8, 2022
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE