Abahinzi b’urusenda mu Rwanda babonye amahirwe muri EXPO mu Bushinwa

  • Imvaho Nshya
  • Ugushyingo 9, 2023
  • Hashize amezi 4
Image

U Bushinwa ni isoko rikomeye ry’urusenda rwera mu Rwanda, ari na yo mpamvu rutagombaga kubura mu bikucuruzwa byaturutse mu Rwanda birimo kumurikwa mu Imurikagurisha Mpuzamahanga rya 6 ry’u Bushinwa ry’ibyinjizwa mu gihugu (CIIE).

Abahinzi b’urusenda bo mu Rwanda bishimiye kumurika umusaruro wabo muri iryo murikagurisha ririmo kubera i Shanghai guhera tariki ya 5 rikazageza kuri uyu wa Gatanu tariki ya 10 Ugushyingo 2023.

Abamurika baturutse mu Rwanda ni bamwe mu bahagarariye ibihugu 65 byohereza ibicuruzwa mu Bushinwa bitabiriye iryo murikagurisha.

Bavuga ko iryo murikagurisha ryabongereye amahirwe yo kwagura isoko ry’umusaruro wabo haba mu masoko atandukanye yo mu Bushinwa ndetse no hanze yabwo. 

Rwibasira Emmanuel, Umuyobozi w’Ikigo cy’Ubucuruzi bushingiye ku buhinzi cyitwa Rusango Real, yavuze ko Abanyarwanda bamurika ibicuruzwa byabo babonye amahirwe yo kwagura isoko, ari na yo mpamvu iryo murikagurisha ari ingenzi cyane kuri bo.

Rusango Real ni ikigo gihinga urusenda kuri hegitari 360 mu bice bitandukanye by’u Rwanda, kikaba kinateganya kongera ubuso gihingaho mu isizeni y’ubutaha.

Yagize ati: “Turimo kwagura ubuhinzi bwacu ari ko tunashyira imbaraga mu kongera umusaruro w’urusenda dufatanyije n’abafatanyabikorwa bacu b’abahinzi. Twongera umusaruro tuzirikana no kuwongera ku isoko ry’u Bushinwa.

Rwibasira Emmanuel, Umuyobozi w’Ikigo cy’Ubucuruzi bushingiye ku buhinzi cyitwa Rusango Real

Iryo murikagurisha ribaye ku nshuro ya 6 ryitabiriwe n’abantu baturuka mu bihugu, Intara n’Imiryango Mpuzamahanga birenga 154.

Rwibasira yavuze ko abahinzi nyarwanda banabonye urubuga rwo kugaragaza umwihariko w’umusaruro w’u Rwanda n’uwo mu bindi bihugu bikiri mu majyambere.

By’umwihariko yashimangiye ko ikigo abereye umuyobozi cyifuza ko Abanyarwanda bamenya ko urusenda nyarwanda rwihariye ku buryohe kubera ko rudashyirwamo imiti n’amafumbire mvaruganda.

Ati: “Dukoresha gusa ifumbire y’imborera ari na yo iha urusenda rwacu uburyohe bwihariye.”

Kompanyi zirenga 10 zo mu Rwanda ni zo zitabiriye iryo murikagurisha aho barimo kumurika ibicuruzwa bitandukanye byakorewe mu Rwanda, harimo ikawa, icyayi n’ubuki.

Mu mwaka w’u Rwanda n’u Bushinwa basinyanye amasezerano y’ubucuruzi ashimangira gahunda yo kohereza umusaruro w’urusenda wumishijwe.

Abasura iryo murikagurisha bishimira ko bahabona ibicuruzwa bishya, serivisi n’amahirwe y’ishoramari mu nzego zitandukanye zirimo ubuhinzi, gutunganya umusaruro, inganda, ubuzima, ikoranabuhanga no guhanga ibishya, n’ibindi.

NTAWITONDA JEAN CLAUDE

  • Imvaho Nshya
  • Ugushyingo 9, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE