Abahanzi basabwe kudashukwa n’ubwamamare ngo biyandarike

  • Imvaho Nshya
  • Ugushyingo 3, 2023
  • Hashize amezi 7
Image

Minisitiri w’Urubyiruko Dr Utumatwishima Abdallah, yasabye abahanzi nyarwanda kwitwararika, ntibashukwe n’ubwamamare aho usanga benshi bahita bishora mu ngeso mbi, ahubwo abasaba kurangwa no kugira uruhare mu butumwa butanga umusanzu mu kubaka  igihugu.

Minisitiri w’urubyiruko yatanze ubwo butumwa mu muhango wo gutangiza ku mugaragaro ikiciro cya gatatu cy’ubuhanzi Art Rwanda. Yaganiriye n’abahanzi banyuze muri Art Rwanda Ubuhanzi barimo abanyarwenya, abanyamakuru ndetse n’ibindi byamamare.

Yagize ati: “hari ubwo usanga abahanzi babaye ibyamamare bakitwara bitandukanye, bakanywa bakarenza urugero rero birakwiye kwitwararika ntimushukwe n’ubwamamare ngo mujye mu mico mibi”.

Minisitiri Dr Utumatwishima kandi yababwiye ko nta rugamba igihugu cyajyamo kidafite abahanzi abasaba kutabura mu gihe igihugu kibakeneye.

Ati: “Iyo dukurikiranye urugamba rwo kubohora igihugu ntabwo haburamo abahanzi, navuga ko nta rugamba twajyamo nk’igihugu tutari kumwe n’abahanzi, muzanagerageze mwebwe abahanzi ntimuzabure mu gihe mukenewe kugira ngo ubutumwa bwiza bw’igihugu butambuke”.

Bamwe mu bahanzi bitabiriye ndetse n’abataritabiriye amarushanwa ya Art Rwanda Ubuhanzi ategurwa na Imbuto Foundation bishimira ko hari aho byabakuye cyane mu kwiyubaka mu buryo bufatika no kuzamura impazo zabo.

Kanyana Hope ni umwe mu bakobwa bitabiriye irushanwa rya Art Rwanda Ubuhanzi, yishimira ko byamufunguye amaso akaba afite inzu y’imideli kandi hari abo yahaye akazi.

Ati: “Nakabije inzozi nshinga inzu y’imideli kubera Art Rwanda Ubuhanzi,ubu mfite abantu 17 nahaye akazi rero nagira inama urubyiruko yo gukora bakitinyuka”.

Amarushanwa ya Art Rwanda Ubuhanzi yatangiye mu 2018.

Kuri ubu azatangirira mu Karere ka Huye guhera ku itariki 15-17 Ugushyingo, tariki 21-23 ni mu Karere ka Kayonza, mu gihe ku ya 28 ari mu Karere ka Rusizi, Rubavu ni ukuva tariki ya30 Ugushyingo kugeza ku ya 01 Ukuboza, mu Karere ka Musanze  ni ukuva ku ya 04-05 Ukuboza 2023,naho mu Mujyi wa Kigali ni tariki 07-09 Ukuboza 2023.

Bamwe mu bahanzi bari bitabiriye ni Bruce Melody, Rider Man, Alyn Sano, Umusizi Rumaga, Andy Bumuntu n’abandi. nHari kandi na bamwe mu bakobwa bitabiriye irushanwa rya Miss Rwanda.

KAMALIZA AGNES

  • Imvaho Nshya
  • Ugushyingo 3, 2023
  • Hashize amezi 7
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE