Abakabakaba 70 biteguye gushinja Dr Munyemana Sosthene ukekwaho Jenoside

  • Imvaho Nshya
  • Ugushyingo 15, 2023
  • Hashize amezi 7
Image

Ku wa Kabiri tariki ya 14 Ugushyingo, Dr. Munyemana Sosthene yitabye Urukiko rwa Rubanda rwi Paris ku byaha ashinjwa kuba yarakoreye i Tumba mu yahoze ari Perefegitura ya Butare, mu gihe cya Jenoside yakorewe Abatutsi mu 1994.

Biteganyijwe ko abatangabuhamya 67 ari bo bazatanga ubuhamya ku byaha Dr Sosthène Munyemana wari umuganga w’abagore yakoze mu gihe cya Jenoside yakorewe Abatutsi haba aho yari atuye, ku bitaro n’ahandi.

Urwo rubanza rwitezweho kumara ibyumweru bitanu, ndetse rukaba rwiyongereye ku zindi manza esheshatu zimaze kuburanishirizwa mu Bufaransa.

Uyu mugabo w’imyaka 68 y’amavuko yageze mu rukiko ku wa Kabiri yakererewe, yambaye ishati y’umweru ifite uturongo tw’ubururu duhagaze, ageretseho ikote rijya gusa n’ivu (gray) n’igitambaro (scarf) mu ijosi.

Yatangiye yisegura kuri ubwo bukererwe mbere yo gutangira avuga imyirondoro, ariko mu iburana yahakanye ibirebo byose ashinjwa ndetse umwunganizi we avuga ko na we yari mu bahigwaga kuko atemeraga imiyoborere ya Leta yariho icyo gihe.

Emmanuel Daoud, Umwunganizi mu by’amategeko w’Umuryango Mpuzamahanga uharanira Uburenganzira bwa Muntu (FIDH), yavuze ko Dr. Munyemana yari umuganga uzwi kandi wari ukunzwe na benshi, ku buryo atavuga ko atari asobanukiwe ibyabaga icyo gihe.

Mu byaha Dr. Munyemana ashinjwa, harimo kuba tariki ya 16 Mata 1994 yaranditse ibaruwa ishyigikira Guverinoma y’Inzibacyuho yongereye ikibatsi mu gushishikariza abaturage kwica Abatutsi mu bice byose by’Igihugu.

Anashinjwa kandi kuba yarafashije mu gushyiraho za bariyeri no gufata Abatutsi bagafungirwa mu biro bya Segiteri Tumba aho bavanwaga bajyanwa kwicwa.

Dr. Munyemana yavuze ko ibiro ashinjwa kuba yari afitiye imfunguzo yabikoresheje mu guhungishirizamo Abatutsi babaga bakeneye ubuhungiro no gucungirwa umutekano.

Umwe mu bamwunganira mu by’amategeko Jean-Yves Dupeux, yavuze ko ibirego bashinja umukiliya we bidafite agaciro kuko byibanda cyane gusa ku buhamya bwatanzwe mu myaka irenga 20 ishize.

Avugana n’abanyamakuru ku wa Kabiri, uwo munyamategeko yavuze ko Dr. Munyemana atigeze agira uruhare na ruto muri Jenoside kuko na we ubwe yari mu byago nk’Umuhutu utaravugaga rumwe na Leta.

Ni mu gihe amakuru ya hafi avuga ko Dr. Munyemana yari inshuti ya hafi ya Kambanda Jean wayoboye Guverinoma y’inzibacyuho yihutishije ibikorwa bya Jenoside yahitanye abarenga miliyoni mu minsi 100 gusa.

Abari baturanye na we i Tumba baracyibuka ubugome bwe

Abari baturanye na Dr. Munyemana Sosthene n’abagituye ahahoze ari Segiteri ya Tumba ubu ni mu Karere ka Huye, bavuga ko bikwiye ko agezwa imbere y’ubutabera kubera amabi bibuka yakoze mu gihe cya Jenoside yakorewe Abatutsi.

Mukankubito Cesarie, umwe mu barokotse Jenoside i Tumba, yagize ati: “Mu bwicanyi yari icyamamare. Nubwo nari nihishe ariko ndabizi kuko yicaga cyane, akajya abishishikariza n’abandi. Kwica, gutera inkunga abicanyi akabaha ibyo banywa bamaze kwica, no ku bitaro barabivuga ko yicanye…”

Perezida wa Ibuka mu Karere ka Huye Siboyintore Theodate, avuga ko kuburanisha Dr Munyemana bitanga icyizere ku barokotse Jenoside bakeneye guhabwa ubutabera kuko ari kimwe mu bibafasha gukira ibikomere.

Ati: “Ni umwe muri ba ruharwa. Abatangabuhamya bamuvugaho byinshi ariko ikitazibagirana ni uko yafungiranaga abantu mu cyari Biro ya Segiteri Tumba, ni ho bicaga abantu babakuye. Rero ikindi murumva ko yari umugabo ujijutse, yitabiraga inama zitegura Jenoside”.

Umuyobozi w’Ihuriro ry’Imiryango iharanira ko abakoze Jenoside yakorewe Abatutsi bagezwa imbere y’ubutabera Alain Gauthier, avuga ko kuba Munyemana agiye kuburanishwa bishimishije cyane nubwo hashize imyaka hafi 30 atarashyikirizwa ubutabera.

Dr Munyemana Sosthene afatwa nk’uwari ku isonga ry’ubwicanyi mu yari Segiteri Tumba, akaba yaravutse mu 1955 avukira muri Komini Musambira mu yari Perefegitura ya Gitarama.

Ibyaha akurikiranyweho birimo gutegura no gushyira mu bikorwa Jenoside mu Mujyi wa Butare, cyane cyane mu bitaro bya Kaminuza aho ashinjwa kwica abana n’abagore, gufungira Abatutsi mu cyumba cy’ibiro bya Segiteri Tumba no gutoranyamo abajyanwaga kwicwa.

Ashinjwa kandi icyaha cyo gukwirakwiza imbunda yahabwaga na Kambanda Jean wayoboye Guverinoma y’inzibacyuho nyuma y’ihanurwa ry’indege ya Perezida Habyarimana Juvenal.

Uru rubanza biteganyijwe ko ruzarangira tariki ya 22 Ukuboza  2023, ruri muri zimwe zimaze igihe zatinze kuburanishwa, cyane ko ikirego cya Dr. Munyemana cyatanzwe mu mwaka wa 1995.

Mu ntangiriro z’umwaka wa 2000 uyu mugabo ufite umugore n’abana batatu ni bwo yatangiye gukora akazi k’ubuvuzi mu Bitaro bya Villeneuve-sur-Lot biherereye mu majyepfo y’uburengerazuba bw’u Bufaransa.

Mu 2008 Dr Munyemana yabanje kwimwa ubuhungiro kubera ibyahwihwiswaga ko yasize akoze amahano mu Rwanda. Impapuro zo kumuta muri yombi zanasabaga ko yakoherezwa kuburanishirizwa mu Rwanda zateshejwe agaciro mu mwaka wa 2010.

Ku ikubitiro, Dr. Munyemana Sosthène yabajijwe n’Ubushinjacyaha mu mwaka wa 2011 ariko hacamo igihe bisa nk’aho byirengagijwe.

Nyuma y’iperereza ryakozwe mu mwaka wa 2018, Umushinjacyaha ushinzwe gukurikirana ibyaha byibasira inyokomuntu yasabye ko akurikiranwa ku byaha bya Jenoside n’ibyibasiye inyokomuntu.

Uwo mwanzuro waje kwemezwa mu 2021, maze muri Werurwe 2022 Urukiko Nyubahirizategeko rwemeza bidasubirwaho ko urubanza rwe rwasubizwa mu Rukiko rwa Rubanda rw’i Paris.

NTAWITONDA JEAN CLAUDE

  • Imvaho Nshya
  • Ugushyingo 15, 2023
  • Hashize amezi 7
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE