Abagabo batinya kuvuga ihohoterwa bakorerwa bakebuwe

  • ZIGAMA THEONESTE
  • Ugushyingo 25, 2023
  • Hashize amezi 6
Image

Minisiteri y’Uburinganire n’Iterambere ry’Umuryango (MIGEPROF) iragaragaraza ko hari abagabo bagitinya kugaragaza ihohoterwa bakorerwa nyamara ko barigaragaje bakwitabwaho, bikabarinda ingaruka zirikomokaho.

Ni ibyagarutsweho kuri uyu wa Gatandatu tariki ya 25 Ugushyingo 2023, mu Karere ka Bugesera mu Ntara y’Iburasirazuba  ahatangirijwe  iminsi 16 y’ubukangurambaga bwo gukumira no kurwanya ihohoterwa rishingiye ku gitsina.

Iki kibazo cy’abagabo bahura n’ihohoterwa mu ngo ariko bagatinya kubigaragaza byagaragajwe ko ahanini bishingiye ku muco nyarwanda utuma abagabo banga kugaragaza akababaro bafite.

Raporo ngarukamwaka y’Ikigo cy’Igihugu cy’Ibarurishamibare (NISR), yo mu 2020, yerekanye ko hagati ya 2016 na 2019, abagabo 7 210 bakorewe ihohoterwa mu gihugu hose.

Bamwe mu baturage bo mu Karere ka Bugesera bahamya ko iri hohoterwa rishingiye ku gitsina riri mu ngo ariko ko n’ubwo abagabo ari bake barikorewe hari abatinya kubivuga.

Munyaneza Filipo yatangarije Imvaho Nshya ko na we hari abo azi bahohoterwa n’abagore babo ariko ugasanga babiceceka.

Yagize ati: “Umugabo usanga iyo hari umugore umuhohotera atatinyuka kubivuga, ahanini usanga banga guseba mu bandi ngo bagende bavuga ngo uriya mugabo ni inganzwa.’’

Mukashema Odile yavuze ko bidakwiye ko umugabo aceceka mu gihe yahohotewe ariko ko n’abagore bacyitwaza uburinganire bagahohotera abagabo babireka kuko byangiza umuryango.

Ati: “Njyewe mbona biterwa n’uko hari abashaka kwireshyeshya n’umugabo, buriya n’iyo yaba atamukubita ariko akaba yamubwira amagabo mabi nk’umugabo byamukomeretsa,  ubwo use  urumva atari ihohoterwa, gusa njyewe nabonye abagabo bashiriramo, ariko ni ukuri bakwiye kubireka pe”.

Yakomeje agira ati: “Ikibazo cy’abagabo banga kuvuga ihohoterwa bakorerwa, niba umugore amukubita ntashobora kubivuga”.

Minisitiri w’Uburinganire n’Iterambere ry’Umuryango Dr Uwamariya Valentine avuga ko kuba abagabo batavuga ihohoterwa bakorerwa ahanini bishingiye ku muco nyarwanda watoje abagabo guceceka akababaro kabo.

Uyu muyobozi ahamya ko mu kwita ku wahohotewe ntawe barobanura yaba umugore cyangwa umugabo, bityo n’abagabo bahohotewe bakwiye kujya babigaragaza kugira ngo bitabweho.

Yagize ati: “Ni bya bindi twese tuzi mu muco wa Kinyarwanda, ngo umugabo ntarira amarira arayamira, ariko ingaruka zivamo ziba ziremereye cyane ku buryo akwiye kumva ko niba ahuye n’ikibazo na we akwiye kukigaragaza”.

Yakomeje agira ati: “Muri Isange One Stop Center ntabwo dutandukanya abagabo n’abagore, ahubwo na bo nibatinyuke , babigaragaze kugira ngo bahabwe ubufasha nk’abandi”.

MIGEPROF isaba abanyarwanda kwirinda ihihoterwa rishingiye ku gitsina kandi bakanagaragaza aho baribonye kugira uwarikorewe yitabweho  cyangwa se rikumirwe hakiri kare.

Umuyobozi w’Akarere ka Bugesera Richard Mutabazi, avuga ko muri aka Karere kimwe n’ahandi mu gihugu ihohoterwa rihagaragara ariko nk’ubuyobozi aho babimenye barikumira.

Yagize ati: “Ikijyanye n’ihohoterwa kiragaragara ubu bukanguramba bwo gukumira ihohoterwa, ni ugufatanya kugira ngo turwanye ihohoterwa ntabwo abayobozi babyifasha n’abaturage birabareba, iyo tubimenye turabikumira. Ingaruka ni nyinshi usanga abana bata amashuri, abana baterwa inda, bisaba ko Abanyarwanda twafatanya tugakumira”.

Raporo ya 2021-2022 ya MIGEPROF igaragaza ko abagore 233 bangana  na 98% bagejeje ibirego byabo muri Isange One Stop Center ziri hirya no hino mu Gihugu, bahawe ubufasha kandi ibibazo byabo bigakurikiranwa mu gihe muri uwo mwaka habonetse ibirego bine bingana na  2% by’abagabo gusa.

Imibare y’Urwego rw’Igihugu rw’Ubugenzacyaha, RIB, yo mwaka wa 2021 yagaraje  ko hagati ya 2015 na 2018 rwakiriye ibirego 1 098 bifitanye isano n’amakimbirane yo mu muryango birimo ibyo gukubita no gukomeretsa, ubwicanyi no kwiyahura.

Imibare ya NISR igaragaza ko mu 2015, hakiriwe dosiye 669 zijyanye no gukubita no gukomeretsa, 89 z’ubwicanyi na 23 zijyanye no kwiyahura. Mu 2016, dosiye zakiriwe ni 641 zo gukubita no gukomeretsa, iz’ubwicanyi ni 97 mu gihe izo kwiyahura ari 17.

Mu 2017 kandi hakiriwe dosiye 784 zo gukubita no gukomeretsa, 86 z’ubwicanyi na zirindwi zo kwiyahura. Mu 2018 yakiriye dosiye 979 zo gukubita no gukomeretsa, 95 z’ubwicanyi mu gihe izo kwiyahura zari 24.

  • ZIGAMA THEONESTE
  • Ugushyingo 25, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE