Abafite ubumuga bahabwe agaciro nabo barashoboye-Visi Meya Uwihoreye

  • NYIRANEZA JUDITH
  • Ukuboza 3, 2023
  • Hashize amezi 6
Image

Umuyobozi w’Akarere ka Ngororero wungirije ushinzwe Iterambere ry’Ubukungu Uwihoreye Patrick yibukije ko abafite ubumuga bakwiye gukomeza guhabwa agaciro, kuko na bo bashoboye.

Ni ubutumwa yagejeje ku bari bitabiriye ibirori byo kwizihiza Umunsi Mpuzamahanga wahariwe abantu bafite ubumuga wabaye kuri iki Cyumweru tariki ya 3 Ukuboza 2023.

Yagize ati: “Uyu munsi hizihizwa Umunsi Mpuzamahanga w’abantu bafite ubumuga, ni ugukomeza kububaha kuko na bo bashoboye”.

Uwo munsi wari ufite insanganyamatsiko igira iti ‘Dufatanye n’abantu bafite Ubumuga tugere ku ntego z’Iterambere rirambye’.

Ku rwego rw’Akarere ka Ngororero wabereye mu Murenge wa Ngororero.

Visi Meya Uwihoreye  yari kumwe n’Umuyobozi w’Akarere wungirije ushinzwe Imibereho Myiza Mukunduhirwe Benjamine, inzego z’umutekano zikorera mu Karere n’abandi.

yakomeje akangurira abitabiriye ibirori kandi gutanga amakuru y’ahantu hose hari abantu bafite ubumuga kugira ngo bitabweho banafashwe kwikura mu bwigunge no mu bukene.

Yabakanguriye kwibumbira mu makoperative kugira ngo biborohere kubona  inkunga  yo kwiteza imbere.

Bimwe mu byaranze kwizihiza uyu munsi harimo kumurika bimwe mu bikorwa abafite ubumuga bamaze kwigezaho nk’ububoshyi, gukora ibikomoka ku mpu nk’inkweto n’ibindi, ubudozi, gutunganya imisatsi n’inzara

Hanatambukijwe ikinamico irimo inyigisho zo kudaha akato abafite ubumuga, kuko ari abantu kandi bafite ibyo bashoboye.

Mu biganiro byatanzwe hagaragajwe ishusho y’uko abafite ubumuga bahagaze no gushima ubufatanye bw’inzego z’ubuyobozi mu gufasha abafite ubumuga kwiteza imbere no kwikura mu bwigunge byatanzwe n’abahuzabikorwa b’Inama y’Igihugu y’abafite Ubumuga ku rwego rw’Intara y’Iburengerazuba Hatangimbabazi Theodore n’uwo ku rwego rw’Akarere Iyakaremye Emmanuel, n’abandi bakozi bafite inshingano zo kwita no gukurikirana abafite ubumuga.

Bashimye uburyo Leta ibitaho, batangaza ko na bo batazahwema gukomeza guharanira ko abafite ubumuga bagira ubuzima bwiza, bagaharanira gukora kugira ngo bagaragaze uruhare rwabo mu iterambere ry’igihugu.

Bimwe mu bibazo bagarutseho harimo kuba batoroherwa kubona insimburangingo n’inyunganirangingo, kuko zitaboneka ku bigo bitanga ubuvuzi ndetse na bumwe mu bumuga butavurizwa ku bwisungane mu kwivuza (Mituweli).

Hatanzwe ibikoresho by’inyunganirangingo ku bafite ubumuga  burimo imbago  n’inkoni yera.

  • NYIRANEZA JUDITH
  • Ukuboza 3, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE