Miliyari 3 Frw zizifashishwa mu kongerera abaturage ubushobozi bwo kwiyubakira u Rwanda

  • Imvaho Nshya
  • Werurwe 4, 2022
  • Hashize imyaka 2
Image

Kugira ngo bagere ku iterambere rirambye kandi ritagira n’umwe risigaza inyuma, abaturage basabwa kugira uruhare mu bibakorerwa mu buryo bujyana no gusigasira ibyagezweho, nk’uko byagarutsweho mu muhango wo gutangiza umushinga “Dufatanye Kubaka Igihugu” ugamije kubakira ubushobozi abaturage mu rwego rwo kugira uruhare mu bibakorerwa.

Ni umushinga w’imyaka itatu watangijwe n’Umuryango Nyarwanda utari uwa Leta ugamije kubaka amahoro arambye no guharanira uburenganzira bwa muntu mu Rwanda, Never Again Rwanda (NAR), witezweho kuzatwara ingengo y’imari ingana n’amafaranga y’u Rwanda asaga miliyari 3.

Biteganyijwe ko uyu mushinga uzibanda  mu kubakira abaturage ubushobozi bwo gutanga ibitekerezo by’umwihariko, urubyiruko n’abayobozi b’Inzego z’ibanze.

Umunyamabanga Uhoraho muri Minisiteri y’Ubutegetsi bw’Igihugu Dusengiyumva Samuel, yagaragaje ko uruhare rw’abaturage ari ingenzi mu bibakorerwa kandi ko bigenda byigaragaza mu buryo Uturere dutandukanye twesa imihigo buri mwaka.

Yagaragaje ko kugeza ubu uruhare rw’abaturage rugarararira mu bikorwa binyuranye bigamije iterambere rusange birimo umuganda, gutanga ibitekerezo no guharanira kwishakamo ibisubizo ku bibazo byugarijwe umuryango Nyarwanda.

Yagaragaje ko uyu mushinga ugiye gutanga urubuga ku baturage ndetse witezweho umusaruro mu iterambere rusange ry’Igihugu uruhare rw’abaturage rugarararira mu mu nteko zabo, kuva ku rwego rw’Igihugu aho baganira n’abayobozi babo ku bibazo bihari, mu muganda, mu matora no mu bukoranabushake.

Umuyobozi Mukuru wa NAR Joseph Nkurunziza Ryarasa,  yavuze ko nubwo abaturage basanzwe bagira uruhare mu bibakorerwa bidakorwa mu buryo bwuzuye nkuko raporo zitandukanye zigenda zibigaragaza.

Umuyobozi Mukuru wa NAR Joseph Nkurunziza Ryarasa

Yagaragaje ko uturere twatoranyijwe bitewe n’uko twagiye twitwara mu kwesa imihigo ndetse na raporo ya RGB yagiye igaragaza ko icyiciro cyo kugira uruhare mu bibakorerwa iheruka gukorwa mu 2021 hakiri icyuho.

Yakomeje agira ati; “Twasanze rero umusanzu twatanga ari ugukora ibishoboka kugira ngo rwa ruhare rw’umuturage rugere ku rwego rushimishije kubera ko iterambere ryose rigomba kugirwamo uruhare na we.”

Umuyobozi w’ Ikigega Mpuzamahanga cy’Abanyamerika gishinzwe iterambere (USAID) mu Rwanda Jonathan Kamin, yagaragaje ko Leta Zunze Ubumwe z’Amerika zishimiye kugira uruhare mu bikorwa bigamije guha umwanya umuturage mu iterambere ry’igihugu kuko bibafasha kwishakamo ibisubizo.

Biteganyijwe ko mu myaka itatu uyu mushinga uzamara hazakorwa ibikorwa bitandukanye birimo guhugura urubyiruko rusaga 800 ruhagarariye urundi ku bijyanye no kwagura intekerezo no guharanira uburenganzira bwa muntu, kubakira ubushobozi urubyiruko rusanga 2,070 n’abaturage 3,840.

Hari kandi ibikorwa by’ubukangurambaga bizakorwa bigamije gukangurira abaturage kugira uruhare mu bibakorerwa birimo ubukangurambaga bwiswe “Birandeba”, ibiganiro bya buri kwezi bigamije gusuzuma ibiri gukorwa n’amahugurwa ngarukamwaka azahabwa abantu nibura 400 barimo n’abagore n’ibindi.

Ni umushinga byitezwe ko uzakorerwa mu mirenge 5 ya buri Karere mu twatoranyijwe ari two Nyagatare, Kayonza, Burera, Musanze, Ngororero, Nyanza, Huye na Rusizi.

  • Imvaho Nshya
  • Werurwe 4, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE