Ghana 120-58 Nigeria
Rwanda 155-29 Cameroun
Taliki 01-04-2023
Cameroun-Sierra Leone (10h30)
Nigeria-Rwanda (14h30)
Mu irushanwa mpuzamahanga mu mukino wa Cricket mu cyiciro cy’abagore “NCF Women’s T20 International Cricket Tournament 2023” ririmo kubera i Lagos muri Nigeria, ikipe y’u Rwanda na Nigeria zitwaye neza mu mikino y’umunsi wa 4 bituma zibona itike yo kuzakina umukino wa nyuma wo guhatanira igikombe.
Iyi mikino y’umunsi wa 4 yabaye kuri uyu wa Gatanu taliki 31 Werurwe 2023, ikipe y’u Rwanda yitwaye neza itsinda Cameroun. Muri uyu mukino, ikipe y’u Rwanda ni yo yatangiye ikubita agapira ishaka amanota “Batting” maze mu dupira 120 (20 Overs) ikora amanota 155 mu gihe abakinnyi 9 ari bo basohowe mu kibuga.
Mu gice cya kabiri, ikipe ya Cameroun yasabwaga amanota 156 yatangiye gukubita agapira ishaka amanota “Batting” maze ubwo hari hamaze gukinwa udupira 63 (Overs 10.3) abakinnyi 10 basohowe mu kibuga mu gihe yari imaze gukora amanota 29. Ikipe y’u Rwanda yahise yegukana intsinzi ku kinyuranyo cy’amanota 126.
Ishimwe Henriette ukinira ikipe y’u Rwanda ni we wabaye umukinnyi witwaye neza muri uyu mukino aho yatsinze amanota 43 mu dupira 33 ndetse anasohora abakinnyi 5 ba Cameroun mu kibuga (5 Wickets).
Mu wundi mukino, ikipe ya Nigeria yitwaye neza itsinda Ghana ku kinyuranyo cy’amanota 62.
Nyuma y’iyi mikino y’umunsi wa 4, ikipe y’u Rwanda iyoboye urutonde n’amanota 6 inganya na Nigeria iri ku mwanya wa kabiri ndetse aya makipe yombi akaba yahise anabona itike yo gukina umukino wa nyuma wo guhatanira igikombe.
Ku mwanya wa 3 hari Sierra Leone n’amanota 2 inganya na Cameroun iri ku mwanya wa 4. Aya makipe na yo akaba agomba guhatanira umwanya wa 3. Ikipe ya Ghana iri ku mwanya wa nyuma wa 5 aho nta nota na rimwe ifite kuko yatsinzwe imikino yose y’amajonjora uko ari 4.
Harasozwa imikino y’amajonjora
Kuri uyu wa Gatandatu taliki 01 Mata 2023 harakinwa imikino y’umunsi wa 5 ari na yo isoza imikino y’amajonjora.
Mu mikino iteganyijwe, ikipe ya Cameroun irakina na Sierra Leone, saa tatu n’igice (09h30) i Lagos akaba ari saa yine n’igice (10h30) i Kigali. Ikipe itsinda umukino irahita ifata umwanya wa gatatu.
Mu wundi mukino, ikipe y’u Rwanda irakina na Nigeria guhera saa saba n’igice (13h30) i Lagos akaba ari saa munani n’igice (14h30) i Kigali. Ikipe iza kwitwara neza igatsinda ni yo ifata umwanya wa mbere ku rutonde.
Imikino izasozwa taliki 02 Mata 2023 aho ikipe ya Cameroun na Sierra Leone zizahatanira umwanya wa 3 naho ikipe y’u Rwanda na Nigeria zihatanire igikombe.
