Cricket: Irushanwa  “Dafabet RCA T20 League 2022” rigiye gusozwa

Irushanwa  “Dafabet RCA T20 League 2022” ririmo kugana ku musozo aho biteganyijwe ko rizasozwa taliki 02 Ukwakira 2022, imikino ya nyuma ikaba izabera  kuri Sitade Mpuzamahanga ya Gahanga.

Iri rushanwa ryahuzaga  amakipe yo mu cyiciro cya mbere mu bagabo mu mukino wa Cricket  “Dafabet RCA T20 League 2022” ryatangiye  taliki 28 Kanama 2022 aho ryateguwe n’ishyirahamwe ry’umukino wa Cricket mu Rwanda “RCA”  ku bufatanye n’abaterankunga barimo Dafabet, kompanyi yo mu Buhinde ikora ibijyanye no gutega ku mikino ndetse na  Simba Voyages Ltd ikora ibijyanye n’ingendo zo mu kirere.

Mu mpera z’icyumweru gishize taliki 24 na 25 Nzeri 2022  habaye imikino ibanziriza iya nyuma aho ikipe ya Zonic Tigers CC yitwaye neza igatsinda imikino ibiri igahita ifata umwanya wa mbere ivuye ku mwanya wa 3 ndetse inabona itike yo gukina umukino wa nyuma wo guhatanira igikombe.

Taliki 24 Nzeri 2022, ikipe ya Zonic Tigers CC yatsinze  Kutchi Tigers CC, muri uyu mukino, ikipe ya Kutchi Tigers CC yatangiye ikubita agapira ishaka amanota “Batting” maze mu dupira 99 (16.3 Overs)  ubwo yari imaze gukora amanota 124 abakinnyi 10 basohowe mu kibuga (10 Wickets).

Ikipe  ya Zonic Tigers CC yasabwaga amanota 125 yatangiye gukubita agapira ishaka amanota “Batting” maze mu dupira 108 ( 18 Overs) ikora amanota 127 mu gihe abakinnyi 7 ari bo bari basohowe mu kibuga (7 Wickets).

Muri uyu mukino, umukinnyi Ntwali Steven ukinira Zonic Tigers CC ni we watowe nk’uwitwaye neza kurusha abandi “Player of the Match”.

Taliki 25 Nzeri 2022, ikipe ya Zonic Tigers CC   yitwaye neza itsinda Challengers CC yari iyoboye urutonde. Ubusanzwe hakinwaga udupira 120 (20 Overs) ariko hakinwe udupira 54 (9 Overs).

Ikipe ya  Challengers CC ni yo yatangiye ikubita agapira ishaka amanota “Batting” maze mu dupira 54 (9 Overs) ikora amanota 76 mu gihe abakinnyi 8 basohowe mu kibuga ( 8 Wickets).

Ikipe ya  Zonic Tigers CC yasabwaga amanota 77 yatangiye gukubita agapira ishaka amanota “Batting” maze mu dupira 44 (7.2 Overs) ikora aya manota 77  mu gihe umukinnyi umwe ari we wari wasohowe mu kibuga (1 Wicket).

Umukinnyi Asaba Brain ukinira Zonic Tigers CC ni we wahawe igihembo nk’uwitwaye neza muri uyu mukino.

Undi mukino wabaye, ikipe ya Telugu Royals CC yitwaye neza itsinda Spartans CC. Ikipe ya Telugu Royals CC ni yo yatangiye ikubita agapira ishaka amanota «Batting» maze mu dupira 78 (13 Overs) ikora amanota 134.

Ikipe ya Spartans CC yatangiye gukubita agapira ishaka amanota “Batting”  gusa kubera imvura   hitabajwe uburyo  bwo kugabanya udupira tuba  30 (5 Overs) iyi kipe ihabwa  intego yo gukora amanota 72. Gusa nta bwo yabashije gutsinda  aya amanota kuko mu dupira twagenwe n’itegeko 30 (5 Overs), Spartans CC yakoze amanota  44, abakinnyi 6 basohorwa mu kibuga (6 Wickets). Ikipe ya Telugu Royals CC  yahise  yegukana  intsinzi  ku  kinyuranyo cy’amanota 27.

Rogers Mukasa ukinira ikipe ya Telugu Royals CC ni we wabaye umukinnyi witwaye neza muri uyu mukino.

Nyuma y’imikino ibanziriza iya nyuma, ikipe  ya Zonic Tigers CC ni yo iyoboye urutonde n’amanota 8, ikurikiwe na Challengers CC n’amanota 6 inganya na Kigali CC  iri ku mwanya wa 3. Ku mwanya wa 4 hari ikipe ya Kutchi Tigers CC n’amanota 4 inganya na Telugu Royals CC iri ku mwanya wa 5 naho ku mwanya wa nyuma wa 6 hari Spartans CC aho nta nota na rimwe ifite.

Ikipe ya  Zonic Tigers CC izakina umukino wa nyuma

Mu mpera z’iki Cyumweru taliki 01 na 02 Ukwakira 2022 ni bwo hazasozwa irushanwa “Dafabet RCA T20 League 2022” aho taliki 01 Ukwakira 2022 hazaba umukino wa Telugu Royals CC na Kigali CC guhera saa saba n’igice  (13h30) akaba ari bwo hazamenyekana ikipe izakomeza ku mukino wa nyuma aho izakina na Zonic Tigers CC yo yamaze kugera ku mukino wa nyuma. Umukino wa nyuma uzaba taliki 02 Ukwakira 2022 kuri Sitade Mpuzamahanga ya Gahanga.

Iri rushanwa rikaba ryerekanwa ku buryo bw’ikoranabuhanga kugira ngo n’abatabasha kugera ku kibuga babashe gukurikina imikino binyuze kuri “Youtube” ya RCA  https://www.youtube.com/channel/UCpiTPH_ZEiS35qQIfqnhtAg cyangwa https://cricheroes.in/tournament/470023/DAFABET-RCA-T20-LEAGUE-2022?#UPCOMING_MATCH