Urwego rw’imitangire ya serivisi rwagabanyutseho 2,9%- RGB

Ubushakashatsi ku ishusho y’uko abaturage babona imiyoborere n’imitangire ya serivisi mu nzego zibegereye (CRC) bwa 2026 bwagaragaje ko urwego rwa serivisi zegerejwe abaturage rwagabanyutseho 2,9% ugereranyije ibipimo by’uyu mwaka n’ushize.

Imibare y’Urwego rw’Igihugu rw’Imiyoborere, RGB, iri muri raporo y’ibikorwa by’umwaka wa 2026 igaragaza ko abaturage bishimiye imiyoborere n’imitangire ya serivisi ku mpuzandengo ya 73,8%, ivuye kuri 76,7% mu 2025.

Ibi byagaragajwe kuri uyu wa Gatatu, tariki ya 11 Ugushyingo 2026 ubwo Umuyobozi Mukuru w’Urwego rw’Igihugu rw’Imiyoborere (RGB), Dr. Doris Uwicyeza Picard yagezaga ku Nteko Ishinga Amategeko, Imitwe yombi raporo y’ibikorwa bya RGB by’umwaka wa 2025/2026 n’igenamigambi ry’ibikorwa by’umwaka wa 2026/2027.

Depite Mukabunani Christine yabajije impamvu yaba yaratumye icyo gipimo kigabanyuka, asubizwa ko abaturage badahabwa serivisi ku gihe, bagasiragira kimwe no kudasobanukirwa aho basaba serivisi.

Dr. Uwicyeza yagize ati: “Hari aho usanga abaturage badakemurirwa ibibazo ku gihe, ahandi bagasiragizwa, ikindi hakaba hari abaturage baba batazi aho basabira serivisi runaka baba bakeneye.”

Mu gushakira igisubizo icyo kibazo cy’uburyo abaturage bashima imitangire ya serivisi, Dr. Uwicyeza yavuze ko abatanga serivisi mu nzego zitandukanye cyane cyane mu Nzego z’ibanze bagomba kongeramo imbaraga.

 Yagize ati: “Serivisi zihabwa abaturage ndetse no kugira uruhare mu bibakorerwa byagabanyutseho amanota 2.9%. Birakwiye ko abayobozi b’Inzego z’ibanze ndetse n’izindi nzego zishinzwe guha serivisi umuturage bashyiramo imbaraga ngo icyo gipimo kizamuke.”

Yakomeje agaragaza ko ibipimo nk’ibi biba bigamije gutuma ahagaragaye icyuho cyangwa intege nke bifasha inzego kwikubita agashyi,hakanozwa imikorere bigashakirwa ibisubizo.

Mu zindi nzego, umutekano ukomeje kuza ku isonga, nubwo igipimo cyawo cyagabanyutseho 0,6%, kuko cyavuye kuri 92,1% mu mwaka ushize kigera kuri 91,5%.

Urwego rw’ubuhinzi ruri ku mwanya wa nyuma, rwagabanyutseho 8,6% kuko bwagize amanota 62%, buvuye kuri 70,6%.