RSSB Tigers yabonye intsinzi ya mbere mu mikino mpuzamigabane ya FIBA

Ikipe ya RSSB Tigers BBC ihagarariye u Rwanda n’Umugabane wa Afurika mu irushanwa rihuza amakipe ahagarariye imigabane ku Isi rya ‘FIBA Intercontinental Cup 2026’, yabonye intsinzi ya mbere nyuma yo gutsinda Shanghai Sharks yo mu Bushinwa amanota 117-115 hitabajwe iminota y’inyongera.

Uyu mukino wa kabiri wo mu itsinda A wakinwe mu gitondo cyo kuri uyu wa Gatatu, tariki ya 23 Nzeri 2026, mu nzu y’imikino ya National Indoor Stadium iri mu Mujyi wa Beijing mu Bushinwa.

Iyi kipe y’Urwego rw’Ubwiteganyirize mu Rwanda, yagiye gukina uyu mukino isabwa gutsinda kugira ngo yiyongerera mahirwe yo gukomeza mu kindi cyiciro. Ni nyuma y’uko yari yatsinzwe umukino wa mbere na Rytas Vilnius yo muri Lithuania amanota 107-89.

Ni umukino Shanghai Sharks yatangiye neza cyane Brandon Goodwin na Tianrong Li batsinda amanota menshi. Agace ka mbere karangiye iyi kipe ifite amanota 30 kuri 17 ya RSSB Tigers.

Mu gace ka kabiri, RSSB Tigers yagarukanye imbaraga nyinshi itangira kugabanya ikinyuranyo ibifashijwemo na Ntore Habimana, Axel Mpoyo bayitsindira amanota.

Ku rundi ruhande Shanghai Sharks yakomeje gukina nk’ikipe nkuru itemera ko ikinyuranyo kivamo binyuze mu bakinnyi barimo Zhenlin Zhang na Zhelin Wang.

Igice cya mbere cyarangiye Shanghai Sharks ikomeje kuyobora umukino n’amanota 60-46.

Mu gace ka gatatu, umukino wegeranye cyane, amakipe yombi agendana mu gutsinda amanota abarimo Brandon Goodwin na Shema Osrbon bayitsindira.

Aka gace karangiye amakipe yombi anganya amanota 25-25, bituma Shanghai Sharks ikomeza kuyobora n’amanota 85 kuri 71 ya RSSB Tigers.

Mu gace ka nyuma, RSSB Tigers yagarukanye imbaraga itangira kugabanya ikinyuranyo ibifashijwemo n’abakinnyi barimo Teafale Lenard Jr n Craig Randall ll watsindaga amanota mensi ndetse iyobora umukino n’amanota 93-91.

Mu minota itatu ya nyuma, Shanghai Sharks yongeye kuzamura ikinyuranyo abarimo Liyongwei Xie na Tianrong Li bayitsindira amanota menshi.

Habura amasegonda 10 Craig Randall ll yatsindiye RSSB Tigers amanota atatu y’ingenzi yatumye iminota isanzwe y’umukino irangira amakipe yombi anganya amanota 103-103, hitabazwa iminota itanu y’inyongera.

Muri iyo minota umukino wakomeje kwegerana cyane, ariko Trey Bey na Craig Randall II bafasha RSSB Tigers kongera ikinyuranyo ndetse batsinda umukino ku manota 117-115, ibona intsinzi ya mbere mu mikino mpuzamigabane ya FIBA.

Gutsinda uyu mukino byatumye RSSB ikatisha itike yo gukina imikino ½ cy’irangiza muri iri rushanwa.

Muri uyu mukino Craig Randall II wa RSSB Tigers yatsinzemo amanota 30, ni mu gihe Brandon Goodwin wa Shanghai Sharks yatsinze amanota 37.