U Rwanda rwatangiye gushaka abazaruhagararira muri Shampiyona y’Isi ya Special Olympics

Amakipe 12 yo mu mikino itandukanye yaturutse mu Ntara zose z’u Rwanda, ni yo yitabiriye Shampiyona y’Igihugu y’imikino y’abafite ubumuga bwo mu Mutwe, mu rwego rwo gushaka abakinnyi bazajya mu Ikipe y’Igihugu iri kwitegura Shampiyona y’Isi izabera muri Chile mu mwaka utaha wa 2027.

Iyi mikino yakinwaga ku nshuro ya 10, yabaye ku wa Gatandatu, tariki ya 19 Nzeri 2026, ibera muri Imbuto Hub iri i Nyamata mu Karere ka Bugesera.

Yakinwe n’amakipe arimo Gasabo, Muhanga, Ngoma, Huye, Rubavu, EP Karwasa, VDOS, Burera, Tubiteho, Amizero, HVP Gatagara, Face of Love, GS Kabirizi na Izere Mubyeyi bahatana mu mikino itandukanye irimo, Umupira w’amaguru, Basketball, Bocce ndetse n’imikino ngororamubiri (Athletisme).

Mu mupira w’amaguru ikipe yahize izindi ni Izere Mubyeyi yatsinze Amizero ibitego 2-1 mu mukino wa nyuma, muri Basketball HVP Gatagara ni yo yegukanye Umudali wa Zahabu nyuma yo gutsinda Face of Love amanota 15-10.

Abasiganwa ku maguru basiganwe mu cyiciro cya metero 100 mu bakobwa n’abahungu, Ngiruwonsanga Alex wa Ngoma na Uwingeneye Thérèse wa Muhanga begukana imidali ya Zahabu.

Imidali ya Zahabu muri Bocce ikinwa mu byiciro bitatu, mu bakobwa yegukanywe n’abarimo Irafasha Patience wa Gasabo, Nyiramatabaruka Alphonsine wa Huye na Muteteyimana Alia wa Amizero.

Mu bahungu hitwaye neza Manizabayo Eric wa EP Karwasa, Ndayizeye Pacifique wa VDOSE na Ishimwe Jean de la Croix wa GS Kabirizi.

Abahize abandi muri iri rushanwa, bahabwa amahirwe yo kuba bazahagararira u Rwanda mu mikino ya Shampiyona y’Isi ‘Special Olympics World Summer Games 2027’.

Perezida wa Special Olympics Rwanda, Ambasaderi Karabaranga Jean Pierre, yavuze ko nyuma y’iyi mikino hari gutegurwa indi na yo izahuriza hamwe abafite ubumuga bwo mu mutwe, kugira ngo abazahagararira igihugu bazabe ari abeza mu beza ndetse ashimira ababyeyi bahisemo kudahisha abana babyabye, ahubwo bakabafasha kwitabira iyi mikino ndetse no kubageza mu bigo bitandukanye byita ku mibereho y’ubuzima bwabo bwa buri munsi.

Inzobere mu myitozo ngororamubiri n’iterambere rya siporo muri Minisiteri ya Siporo, Habyarimana Florent, yavuze ko ubufasha bwa Minisiteri buhari mu kwitegura iyi mikino.

Ati: “Abantu bafite ubumuga bwo mu mutwe ni abantu nk’abandi, bashyigikiwe bagirira igihugu akamaro. Tuzakomeza gukora ibishoboka byose ngo iyi mikino ishyigikirwe, yaba imbere mu gihugu ndetse no ku rwego mpuzamahanga.

Harimo gukora ubuvugizi hakaboneka ibikoresho bifasha abakinnyi no kuzashyigikira ikipe y’Igihugu izitabira imikino ya Shampiyona y’Isi izakinirwa i Santiago muri Chile.”

Umuryango wa Special Olympics watangiye gukorera mu Rwanda kuva 2002, wagize uruhare rudashidikanywaho mu kwita ku buzima bw’abantu bafite ubumuga bwo mu mutwe by’umwihariko binyuze mu mikino. Mu myaka hafi 25 imaze ishinzwe, imaze kugera ku bana barenga ibihumbi 20 kugeza ubu ifite abatoza barenga 1000 bafasha abana gukina imikino itandukanye.