Miss w’u Bubiligi na Miguel uyobora Atlético Madrid ni bamwe mu byamamare bizita izina abana b’ingagi

Ibyamamare 22 bazitabira umuhango wo Kwita Izina abana b’ingagi muri uyu mwaka bamaze kumenyekana. Barimo umuririmbyi w’indirimbo zo kuramya no guhimbaza Imana, Israel Mbonyi, uwahoze ari myugariro ukomeye w’Ikipe y’Igihugu y’u Bufaransa Patrice Evra, Miss w’u Bubiligi Kenza Johanna ndetse n’Umuyobozi Mukuru (CEO) wa Atlético de Madrid, Miguel Ángel Gil Marín.

Urwego rw’Igihugu rw’Iterambere (RDB) rwatangaje ko aba bari mu bantu 22 bazita Izina abana b’ingagi mu muhango uteganyijwe ku wa 4 Nzeri 2026, mu Kinigi mu Karere ka Musanze.

Muri abo harimo Kenza Johanna Ameloot, wabaye Nyampinga w’u Bubiligi mu 2024, akaba afite nyina w’Umunyarwandakazi.

Harimo kandi Kelly O’Meara, Umuyobozi Nshingwabikorwa w’Umuryango Pan African Sanctuary Alliance (PASA), ukora mu rwego rwo kurengera ibiri mu murwango w’inkende,inguge n’ingagi no guteza imbere imibereho yazo.

Undi uzitabira uyu muhango ni Alastair Fothergill, Umwongereza wamenyekanye cyane mu gukora filimi zerekeye ibidukikije n’inyamaswa. Yagize uruhare mu gukora filimi mbarankuru zamamaye ku rwego mpuzamahanga zirimo Planet Earth na Blue Planet.

Abakinnyi b’umupira w’amaguru mu bazita Izina

Mu bazita Izina abana b’ingagi harimo kandi Patrice Evra, wahoze ari myugariro w’Ikipe y’Igihugu y’u Bufaransa, akaba yarakiniye amakipe akomeye arimo Manchester United, Marseille yo mu Bufaransa na Juventus yo mu Butaliyani.

Hari kandi Mamadou Sakho, wahoze ari myugariro w’Ikipe y’Igihugu y’u Bufaransa, wakiniye amakipe arimo Paris Saint-Germain na Liverpool.

James Chester na we ari mu bazita Izina abana b’ingagi. Uyu wahoze ari myugariro wo hagati yakiniye amakipe arimo Manchester United, Hull City, West Bromwich Albion, Aston Villa, Stoke City, Derby County, Barrow na Salford City.

Abanyarwanda bari mu bazita Izina

Muri aba bantu 22 harimo n’Umunyarwandakazi Uwimbabazi Jeannette, umukozi ushinzwe kurinda Pariki y’Igihugu ya Nyungwe.

Uwimbabazi yashimiwe ubwitange yagaragaje mu kurinda urusobe rw’ibinyabuzima no kubungabunga Pariki y’Igihugu ya Nyungwe.

Umuhango wo Kwita Izina abana b’ingagi ni umwe mu bikorwa bikomeye u Rwanda rukoresha mu guteza imbere ubukerarugendo, kubungabunga urusobe rw’ibinyabuzima no gukangurira abantu kugira uruhare mu kurinda ingagi zo mu Birunga.

Kuva umuhango wo Kwita Izina watangira mu 2005, hamaze kwitwa amazina abana b’ingagi 438, ndetse ingagi zakomeje kwiyongera kuko ubu mu misozi y’Ibirunga habarurwa izirenga 1 100 zivuye kuri 430 zariho mu 2005.

Kwita ku ngagi ntibyasiganye no guteza imbere ubukerarugendo bw’u Rwanda kuko mu 2025 abasuye igihugu bageze kuri miliyoni 1, 49, bakaba bariyongereyeho 9% nkuko Urwego rw’Igihugu rw’Iterambere, RDB rubigaragaza.

Raporo y’ibikorwa by’umwaka wa 2025, ya RDB igaragaza ko muri rusange ubukerarugendo bw’u Rwanda bwinjije miliyoni 685$, umusaruro ukaba warikubye hafi kane ugereranyije n’ayo uru rwego rwari rwinjije mu myaka itanu ishize.