Ikipe ya Kigali Titans BBC yegukanye shampiyona y’icyiciro cya kabiri ikanabona itike yo kuzakina shampiyona y’icyiciro cya mbere umwaka utaha (2022-2023) yabonye umuterankunga “Afwego Inc” mu gihe cy’umwaka umwe aho iyi kipe izahabwa miliyoni 30 z’amafaranga y’u Rwanda.
Kuri uyu wa Gatanu taliki 29 Nyakanga 2022 ni bwo hasinywe amasezerano y’ubufatanye hagati y’ikipe ya Kigali Titans BBC na Afwego Inc, umuhango wabereye ku cyicaro cya Afwego Inc muri Tele 10 ku Gishushu.
Aya masezerano yasinywe n’umwe mu bashinze akaba n’Umuyobozi mukuru wa Afwego Inc, Azizi Kafiro na Perezida w’ikipe ya Kigali Titans BBC, Ruboneza Eugene Junior.
Nyuma yo gusinya aya masezerano, Umuyobozi mukuru wa Afwego Inc, Azizi Kafiro yavuze ko Kigali Titans BBC yabagejejeho igitekerezo bagasanga ari ikipe nziza ifite intego zihamye bagahitamo kuyifasha kugira ngo izatere imbere mu buryo bw’ikoranabuhanga.
Yakomeje avuga ko Afwego Inc yakoreraga muri USA n’i Dubai ariko bifuje kuza mu Rwanda gufasha abakora ubushabitsi kubikora neza bifashishije ikoranabuhanga rigezweho kugira ngo babone umusaruro.
Perezida w’ikipe ya Kigali Titans BBC, Ruboneza Eugene Junior atangaza ko aya masezerano azatuma ikipe imenyekana kuko bazabafasha mu buryo bw’ikoranabuhanga rigezweho. Yakomeje avuga ko ikipe izajya yambara ku myenda ibirango bya Afwego Inc mu kibuga no hanze y’ikibuga.
Yagize ati : “Ibikorwa byabo tuzajya tubigaragaramo na bo bagaragare mu byacu”.
Ruboneza Eugene avuga ko Afwego Inc izabafasha kubona abandi baterankunga yaba ab’imbere mu gihugu ndetse no hanze. Yagize ati : “Hari abo turimo kuvugana, buriya nibirangira twamaze kumvikana tuzabamenyesha.”
Nelson Nwankwo ushinzwe ibijyanye na Tekinike muri Afwego Inc yavuze ko bakora ibijyanye no gufasha abantu bakora ubushabitsi kubaka imbuga bashobora no gukoresha mu bucuruzi n’ibindi kandi mu buryo bworoshye. Akomeza avuga ko icyicaro cyabo muri Afurika kizaba kiri i Kigali kuko basanze mu Rwanda bitabira gukoresha ikoranabuhanga mu bintu bitandukanye.
