RSSB Tigers na Patriots zitwaye neza zigera ku mukino wa gatanu

RSSB Tigers BBC yatsinze APR BBC amanota 96-94 naho Patriots itsinda REG amanota 72-61, amakipe yombi anganya intsinzi ebyiri mu mikino ya nyuma ya Shampiyona ya Basketball.

Iyi mikino ya Kane ya ½ yakinwe mu ijoro ryo ku wa Gatatu, tariki ya 12 Kanama 2026 muri Petit Stade i Remera.

Ni imikino yari yitezwe bikomeye kuko APR BBC na REG BBC zasabwaga gutsinda zikagera ku mukino wa nyuma ku nshuro ya kabiri yikurikiranya, mu gihe RSSB Tigers na Patriots BBC na zo zashakaga gutsinda hakitabazwa umukino wa gatanu wa Kamarampaka.

APR BBC yatangiye umukino neza ibifashijwemo n’abakinnyi barimo Adonis Fller na Craig Randall bayitsindira amanota menshi. Agace ka mbere karangiye iyoboye n’amanota 26-15.

Mu gace ka kabiri, RSSB Tigers yagarukanye imbaraga nyinshi itangira kugabanya ikinyuranyo cy’amanota binyuze mu bakinnyi barimo Zouzoua Nisre Mimi na Steve Hagumintwari.

Ku rundi ruhande APR BBC yakomeje gukina nk’ikipe nkuru abarimo Teafale Lenard, Craig Randall na Axel Mpoyo bagaragaza ishyaka.

Aka gace RSSB Tigers BBC yagatsinzemo amanota 30-24,igice cya mbere cyarangiye APR BBC ikomeje kuyobora umukino n’amanota 50 kuri 45 ya RSSB Tigers.

Mu gace ka gatatu, umukino watangiye wegeranye cyane, amakipe yombi agendana mu gutsinda amanota Teafale Lenard na Zouzoua Nisre Mimi batsinda.

Mu minota ibiri ya nyuma, APR BBC yongereye ikinyuranyo cy’amanota ibifashijwemo Craig Randall na Axel Mpoyo, bituma isoza aka gace karangiye iyoboye umukino n’amanota 72 kuri ya 65 ya RSSB Tigers BBC.

Mu gace ka nyuma, umukino wakomeje kwegerana Antino Jackson na Teafale Lenard batsindira amakipe yombi.

Habura umunota umwe, Zouzoua Nisre Mimi na Antino Jackson batsindiye amanota RSSB Tigers bituma umukino urangira batsinze APR BBC amanota 96-94, bityo amakipe yombi anganya intsinzi ebyiri.

Undi mukino Patriots BBC yigaranzuye REG BBC iyitsinda amanota 72-61 amakipe yombi anganya intsinzi ebyiri.

Imikino ya gatanu izagena amakipe abiri yerekeza ku mukino wa nyuma iteganyijwe ku wa Gatanu, tariki ya 14 Kanama 2026 muri BK Arena.