UEFA Champions League: Liverpool na Barcelona zitwaye neza mu mikino ibanza ya ⅛

Liverpool yatsinze Paris Saint Germain igitego 1-0, FC Barcelona yatsinze Benfica igitego 1-0, mu gihe Bayern Munich yatsinze Bayer Leverkusen ibitego 3-0 mu mikino ibanza ya ⅛ cya UEFA Champions League.

Iyi mikino yabaye mu ijoro ryo ku wa Gatatu, tariki ya 5 Werurwe 2025. 

Umukino wa PSG na Liverpool wari utengerejwe watangiye wihuta ikipe y’i Paris yari mu rugo isatira cyane izamu rya Liverpool binyuze ku mipira myinshi yahindurwaga imbere y’izamu na Ousmane Dembélé igapfa ubusa.

Ku munota wa 22, Khvicha Kvaratskhelia yatsindiye PSG igitego cya mbere ariko umusifuzi nyuma yo kwitabaza VAR, avuga ko Vitinha wamuhaye umupira yari yaraririye.

Iyi kipe yakomeje gusatirana imbaraga, nyuma y’iminota mike Kvaratskhelia yahushije igitego asigaranye n’umunyezamu Allison Becker wakuyemo umupira yamuteye.

Mu minota 35, ikipe y’i Paris yakomeje kotsa igitutu Liverpool ariko umunyezamu Allison akabera ibamba, Dembélé na Bradley Barcola.

Igice cya mbere cyarangiye amakipe yombi anganya ubusa ku busa.

Liverpool yakomeje kugorwa cyane n’uyu mukino ubona idasatira nk’uko isanzwe ndetse Mohammed Salah igendaraho ba myugariro ba PSG bari bamwize neza.

Bitandukanye n’igice cya mbere, icya kabiri cyatuje amakipe yombi akinira cyane mu kibuga hagati, byatumaga n’uburyo bw’ibitego buba buke.

Ku munota wa 86, Harvey Elliott yasimbuye Salah. Nyuma y’umunota umwe gusa yinjiye mu kibuga yacomekewe umupira mwiza na Darwin Núñez atsinda igitego cya mbere cya Liverpool.

Umukino warangiye, Liverpool yatsinze Paris Saint-Germain igitego 1-0.

Indi mikino yabaye ku wa Gatatu yasize, FC Barcelona yatsinze Benfica igitego 1-0 cya Raphinha. Bayern Munich yatsinze Bayer Leverkusen ibitego 3-0, mu gihe Inter de Milan yatsinze Feyenoord ibitego 2-0.

Imikino yo kwishyura iteganyijwe ku wa Kabiri, tariki ya 11 Werurwe 2025.