Basketball: APR WBBC na REG WBBC zageze muri ½ cya Zone V

APR WBBC na REG WBBC zihagarariye u Rwanda mu mikino ya Zone V yageze muri ½ muri iyi mikino iri kubera mu kirwa cya Zanzibar muri Tanzania.

Ikipe y’Ingabo yabigezeho nyuma yo gusezerera Gladiators y’i Burundi iyitsinze amanota 78-55.

APR WBBC yayoboye neza uduce twose tw’umukino kuko aka mbere yakarangije ifite amanota 25-14, igice cya mbere cyarangiye ikomeje kuyobora n’amanota 38-31mu gihe utwa nyuma na two yatwitwayemo neza umukino warangiye ifite amanota 78-55.

Muri uyu mukino wa Italee Lucas wa APR WBBC ni we watsinze amanota menshi (23).

Undi mukino Abanyarwanda bari bategereje ni uwa REG WBBC yagombaga gukina na JKL Lady yo muri Uganda.

Uyu mukino warangiye REG WBBC isezereye JKL Lady yo muri Uganda iyitsinze amanota 67- 52.

Muri uyu mukino Kristina Morgan King wa REG WBBC yatsinze amanota 16.

Ayo makipe ahagarariye u Rwanda muri iyi mikino izahura mu mukino wa ½ uteganyijwe ku wa Gatanu tariki 1 Ugushyingo 2024.

Amakipe abiri azagera ku mukino wa nyuma, azabona itike y’Imikino ya ‘Africa Women Basketball League’ izahuza amakipe 10 yo hirya no hino kuri uyu mugabane, mu mikino iteganyijwe mu Ukuboza.