Perezida Kagame yageze i Riga muri Latvia, mu ruzinduko rw’iminsi 3

Kuri uyu wa Kabiri, Perezida wa Repubulika Paul Kagame yageze i Riga muri Latvia, mu ruzinduko rw’akazi rwa mbere agiriye muri icyo gihugu, ndetse akaba na Perezida wa mbere w’Afurika ugisuye.

Perezida Kagame yagiranye ibiganiro mu muhezo na Perezida wa Latvia Edgars Rinkēvičs, biza gukurikirwa n’ibiganiro nyunguranabitekerezo bihuza amatsinda ahagarariye ibihugu byombi.

Ibiro by’Umukuru w’Igihugu w’u Rwanda byatangaje ko Perezida Kagame na mugenzi we wa Latvia banagirana ikiganiro n’abanyamakuru, cyibanda ku kurushaho kunoza ubutwererane bw’ibihugu byombi.

Perezida Kagame yanasuye Ingoro Ndangamurage Latvia (Occupation of Latvia), Ikibumbano cy’Ubwigenge ndetse akaba anitabira ifungurwa ry’Urwibutso rwa Jenoside yakorewe Abatutsi, aho ari bunavugire ijambo.