MINAGRI yatangaje amabwiriza ku nyongeramusaruro zunganiwe na Leta

  • NYIRANEZA JUDITH
  • Mutarama 12, 2024
  • Hashize amezi 2
Image

Minisitiri w’Ubuhinzi n’Ubworozi ashingiye kuri Gahunda yo kwihutisha Iterambere ry’Igihugu NST1, hagamijwe kongera umusaruro n’ishoramari mu buhinzi, yatangaje amabwiriza yerekeranye n’itangwa ry’inyongeramusaruro z’ubuhinzi.

Amabwiriza ya Minisitiri w’Ubuhinzi n’Ubworozi No. 009/2024 yo ku wa 12 Mutarama 2024 yerekeranye n’itangwa ry’inyongeramusaruro z’ubuhinzi (Ifumbire mvaruganda n’imbuto z’indobanure) harimo nkunganire ya Leta mu gihembwe cy’ihinga cya 2024B, kuva ku itariki ya 12 Mutarama kugera ku ya 30 Kamena 2024.

Ayo mabwiriza agaragaza ko hagamijwe kongera umusaruro w’ubuhinzi mu gihembwe cy’ihinga 2024 B, Leta izunganira ku ifumbire ibihingwa byatoranyijwe ari byo ibigori, ibishyimbo, ingano, soya, umuceri, ibirayi, imyumbati, urutoki, imboga n’imbuto.

Muri ayo mabwiriza hanagaragaramo ibiciro by’inyongeramusaruro, harimo ikiguzi cyose cy’imbuto, uruhare rwa Nkunganire ya Leta n’igiciro ntarengwa ku muhinzi.

DAP ni imwe mu mafumbire mvaruganda Leta yunganira

Urugero ku mbuto y’ibigori ya Hybrid iterwa mu misozi miremire, WH605/508 ikiguzi cyose ni amafaranga y’u Rwanda 2700, Nkunganire ya Leta ni 1700Frw naho umuhinzi akaba atagomba kurenza 1000 Frw.

Abahinzi bazagura ifumbire ku bacuruzi b’inyongeramusaruro (Agrodelears) bo mu Mirenge yabo ku giciro kiriho Nkunganire ya Leta. Hagaragazwa igiciro cyose cy’ifumbire, Nkunganire ya Leta n’igiciro umuhinzi atarenza.

Urugero nko ku ifumbire ya UREA igura amafaranga y’u Rwanda 1000, Nkunganire ya Leta ni 340Frw naho umuhinzi we akazishyura 660Frw.

Ibihingwa Leta izunganira ku mbuto z’indobanure mu gihembwe cy’ihinga 2024 B ni ibigori, soya n’ingano.

 Hanagaragajwe urutonde rw’ibigo 5 bifitanye amasezerano n’Ikigo cy’Igihugu gishinzwe iterambere ry’Ubuhinzi n’Ubworozi RAB, akaba ari byo byonyine byemerewe gucuruza ifumbire mvaruganda muri gahunda ya Nkunganire ya Leta mu gihembwe cy’ihinga 2024 B.

Ibigo by’abikorera 29 kandi bifitanye amasezerano n’Ikigo cy’Igihugu gishinzwe iterambere ry’Ubuhinzi n’Ubworozi RAB ni byo byonyine byemerewe gucuruza imbuto y’indobanure ku bahinzi muri gahunda ya Nkunganire ya Leta mu gihembwe cy’ihinga 2024 B.

  • NYIRANEZA JUDITH
  • Mutarama 12, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE