2017-2024: U Rwanda rwarengeje intego yo gutunganya amazi

  • ZIGAMA THEONESTE
  • Mutarama 25, 2024
  • Hashize amezi 4
Image

Hasigaye intego yo kuyageza ku baturage bose bitarenze uyu mwaka, mu gihe Guverinoma y’u Rwanda yemeza ko mu myaka igera kuri irindwi ishize yageze ku ntego yo gutunganya ingano y’amazi ikenewe kugira ngo agezwe ku baturage 100%.

Minisitiri w’Intebe Dr. Ngirente Edouard, yatangaje ko kuva mu mwaka wa 2017 kugeza muri uyu mwaka ingano y’amazi yiyongereye igera kuri meterokibe 330,000 mu gihe intego yari ukugera kuri meterokibe 303,000.

Iyo urebye ingano y’amazi meza atunganywa ku munsi, usanga yarikubye inshuro ebyiri ugereranyije n’ingano yari ahari mu mwaka wa 2017, ubwo hatangiraga ishyirwa mu bikorwa rya Gahunda ya Guverinoma y’imyaka 7 yo kwihutisha Iterambere (NST1).

Mu kiganiro yahaye abitabiriye Inama y’Igihugu y’Umushyikirano ya 19 cyagarukaga ku byagezweho muri iyo gahunda, Minisitiri w’Intebe Dr. Ngirente, yavuze ko ubwiyongere bw’ingano y’amazi bwajyanye no kongera ibikorwa remezo biyageza ku baturage.

Yavuze ko mu kwegereza amazi meza abaturage, Leta y’u Rwanda yubatse inganda zirindwi ziyatunganya ari zo uruganda rwa Kanzenze, urwa Gihira, Kanyonyomba, Mwoya, Nkombo na Nyankora.

Yagize ati: “Ibi byatumye ingano y’amazi atunganywa yiyongera ku munsi hafi inshuro ebyiri, ku buryo twarengeje intego twari twihaye, yari kuri meterokibe ibihumbi 303 ariko twageze ku bihumbi 330.”

Hubatswe kandi imiyoboro y’amazi afite kilometero zisaga 1800 mu mijyi na kilometero zisaga 2,000 hanasanwa imiyoboro y’amazi 191, mu bice by’icyaro.

Guverinoma yizeza ko izakomeza gusana imiyoboro y’amazi mu rwego rwo kwimakaza isuku n’isukura kugira abaturage bagire imibereho myiza.

Mu gukwirakwiza amashanyarazi, Minisitiri w’Intebe Dr Ngirente, yagaragaje ko muri iki gihe cy’imyaka irindwi, ingo nshya zirenga zirenga miliyoni n’igice zagejejweho amashanyarazi.

Ni ibyatumye ingo zifite amashanyarazi ziyongera zigera kuri 34% zariho muri 2017 ubu zigeze kuri 74%.

Minisitiri w’Intebe Dr. Ngirente yavuze ko intego y’uko u Rwanda rwihaye ko amashanyarazi azagera kuba Baturarwanda bose 100% igikomeje kandi izagerwaho.

Mu rwego rwo koroshya ubuhahira no gukura abaturage mu bwingunge, Leta y’u Rwanda yubatse imihanda ifite uburebure bwa kilometero zirenga 1600 ihuza Uturere dutandukanye.

Mu mihanda yubatswe ikanashyirwamo kaburimo, harimo uwa Base-Rukomo-Nyagatare, uwa Kagitumba-Kayonza-Rusomo, uwa Ngoma-Busegesera Nyanza, uwa Huye-Kibeho n’uwa Pindura-Bweyeye.

Guverinoma kandi itangaza ko hari n’imihanda ifite ibirometero 237 yubatswe mu Mujyi wa Kigali.

Hagamijwe gukomeza gufasha abahinzi n’aborozi kugeza umusaruro ku isoko, hirya no hino mu gihugu hubatswe kandi hanasanwa imihanda y’imihahirano (Feeder Roads) ifite ibilometro 3 700.

Minisitiri w’Intebe akagamya ko mu ntego u Rwanda rwari rwihaye yo kubaka iyo mihanda rwayigezeho.

Ati: “Twari twariyemeje ko mu myaka irindwi tuzaba tumaze kubaka ibilometero ibihumbi bitatu ariko twashoboye kubirenzaho dufatanyije n’Abanyarwanda.”

Kuri iyo mihanda kandi kimwe n’iyindi na yo yari yarubatswe hamaze gushyirwaho amatara ari ku bilometero bisaga ibihumbi 2 by’umwihariko ku mihanda minini  n’iyo mu mijyi.

  • ZIGAMA THEONESTE
  • Mutarama 25, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE