Koga: Ikipe y’u Rwanda yatangiye umwiherero yitegura shampiyona y’Isi

  • Imvaho Nshya
  • Gicurasi 20, 2022
  • Hashize imyaka 2
Image

Ikipe y’Igihugu mu mukino wo Koga “Swimming” mu bagabo yatangiye umwiherero aho irimo kwitegura kuzaserukira u Rwanda muri shampiyona y’Isi “FINA World Championships 2022” izabera i Budapest muri Hongrie kuva taliki 17 Kamena kugeza 03 Nyakanga 2022” ndetse n’ imikino ihuza ibihugu bikoresha ururimi rw’Icyongereza  “Commonwealth Games 2022”  izabera  mu Mujyi wa Birmingham mu Bwongereza taliki 28 Nyakanga kugeza 08 Kanama 2022.

Iyi kipe igizwe n’abakinnyi babiri ari bo Maniraguha Eroi na Irankunda Isihaka “Bebeto” ariko bakaba bari kumwe n’abandi bakinnyi babiri babafasha gukora imyitozo ari bo Iradukunda Eric na Dusabe Claude.

Kuva taliki 18 Gicurasi 2022, aba bakinnyi bari muri La Palisse Hotel i Nyamata aho bagiye bamaze gihe gisaga ukwezi bakora imyitozo bataha iwabo aho bakoreraga muri Nyarutarama Sports Centre.

Umuyobozi wa Tekinike mu ishyirahamwe ry’umukino wo Koga mu Rwanda “RSF” akaba n’umutoza mukuru w’ikipe y’Igihugu, Rukundo Patrick yatangaje ko imyiteguro muri rusange irimo kugenda neza kuko kugeza ubu nta mbogamizi barahura nazo.

Umuyobozi wa Tekinike akaba n’umutoza mukuru w’ikipe y’Igihugu, Rukundo Patrick

Rukundo avuga ko  batoranyije aba bakinnyi kuko ari bo barushaga abandi hanyuma banongeraho aba bandi bari inyuma yabo  kugira ngo babafashe imyitozo. Akomeza avuga ko na bo birimo kubafasha kuko mu minsi iri imbere hari amarushanwa menshi arimo ay’Akarere ka 3 aho bazakenera abakinnyi benshi

Muri aya marushanwa abiri ari imbere nta bwo hazitabira umukinnyi mu cyiciro cy’abagore.  Umutoza Rukundo asobanura ko muri iki cyiciro nta mukinnyi babonye uri ku rwego rwiza rwo kwitabira amarushanwa akomeye nk’aya bafata umwanzuro wo guhitamo abahungu gusa.

Akomeza avuga ko barimo gutegura abakinnyi mu cyiciro cy’abagore ku buryo  mu minsi iri imbere bazaba bafite abakinnyi bari ku rwego rwiza.

Mu mikino ya shampiyona y’Isi, Maniraguha Eroi  azoga muri  “Freestyle” muri metero 50 aho asanzwe akoresha amasegonda 25 n’ibice18  na metero 100 aho akoresha amasegonda 56 n’ibice 70.

Irankunda Isihaka we azasiganwa muri “Butterfly” metero 50 aho akoresha amasegonda 26 n’ibice 37 ndetse na metero 100 aho akoresha amasegonda 58 n’ibice 63.

Umutoza Rukundo Patrick avuga ko intego bazajyana ari ukwitwara neza bakagerageza kugabanya ibihe.

  • Imvaho Nshya
  • Gicurasi 20, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE