Volleyball: U Rwanda rwageze muri ¼ cy’Igikombe cya Afurika

Ikipe y’Igihugu y’u Rwanda y’Abagore muri Volleyball yatsinze iya Burkina Faso amaseti 3-0 mu mukino wa ⅛ cy’Igikombe cya Afurika, ibona itike yo kwerekeza muri ¼.

Uyu mukino wabaye kuri iki Cyumweru, tariki ya 30 Kanama 2026, muri Kasarani Indoor Arena y’i Nairobi muri Kenya ahari kubera iri rushanwa rihuza amakipe akomeye ku Mugabane wa Afurika.

U Rwanda rwageze muri iki cyiciro nyuma yo gusoreza ku mwanya wa mbere mu Itsinda D n’amanota icyenda ku icyenda, nyuma yo gutsinda imikino yose uko ari itatu rwakinnye.

Muri uyu mukino wa ⅛ wakinwe uyu munsi, abakinnyi b’u Rwanda bawutangiye neza batsinda iseti ya mbere ku manota 25 kuri 19 ya Burkina Faso. Mu iseti ya kabiri na bwo Abanyarwandakazi bakomeje gusatira, bayitwara ku manota 25-16, mbere yo gusoza umukino batsinda iseti ya gatatu ku manota 25-8.

Muri rusange umukino warangiye u Rwanda rwatsinze Burkina Faso amaseti 3-0, rukatisha itike yo kwerekeza mu mikino ya ¼ aho ruzakina na Ghana yasezereye Zambia.