USA: Perezida Joe Biden yongeye gusangwamo COVID-19

Perezida wa Leta Zunze Ubumwe z’Amerika (USA) Joe Biden yasanzwemo virusi ya COVID-19 mu gitondo cyo ku wa Gatandatu taliki ya 30 Nyakanga 2022, umuganga umwitaho witwa Dr Kevin O’Connor akaba yemeje ko ari ubwandu bwagarutse (rebound) nyuma yo kugaragara bwa mbere mu minsi ishize.

Biden w’imyaka 79 y’amavuko byatangajwe ko yanduye COVID-19 bwa mbere ku itariki ya 21 y’uku kwezi kwa Nyakanga ubwo byahishurwaga ko agaragaza ibimenyetso byoroheje.

BBC itangaza ko muri iki cyumweru, nta COVID-19 bari bamusanzemo mu nshuro enye yafashwemo ibipimo hagati yo ku wa Kabiri no ku wa Gatanu.

Ku wa Gatandatu, Biden yavuze ko yasanzwemo ubwandu ariko nta bimenyetso yari arimo kugaragaza, ariko avuga ko azishyira mu kato ku bw’umutekano wa buri muntu wese mu bamukikije.

Umuganga wa Perezida Biden Dr Kevin O’Connor, yavuze ko bidakenewe ko asuzibwa ku miti nubwo akomeza “gukurikiranirwa hafi”, mu gihe amaze igihe afata umuti wica virusi witwa Paxlovid.

Dr O’Connor yavuze ko uwo muti watumye “ijanisha ritoya” ry’abarwayi ba COVID-19 bagira “igaruka” ry’ubwandu.

Ibiro by’Umukuru w’Igihugu (White House) byatangaje ko Perezida Biden amerewe neza kandi nta kimenyetso na kimwe agaragaza, gusa ngo hatangiye gukurikiranwa abahuye na we kuva ku wa Gatatu ubwo yavaga mu kato ka mbere.

Ubushakashatsi bwakozwe muri Gicurasi bwagaragaje ko abantu bigeze kurwara COVID-19 bashobora kongera kugaragaraho ubwandu kabone nubwo baba barakingiwe cyangwa baravuwe n’imiti ikomeye nka Paxlovid.

Joe Biden yakingiwe byuzuye, ndetse akaba yaramaze no gufata inkingo ebyiri zishimangira. Yongeye kugaragaraho ubwandu bwa COVID-19 mu gihe abayobozi bo muri White House bemezaga ko we icyo kibazo gishobora kutazamubaho bitewe n’ubwirinzi afite mu mubiri.