Urwego rw’Ubugenzacyaha rwagaragaje amayeri akoreshwa mu icuruzwa ry’abantu

  • KAYITARE JEAN PAUL
  • Mutarama 30, 2024
  • Hashize amezi 4
Image

Mu gitondo cyo kuri uyu wa Kabiri tariki 30 Mutarama 2024, Urwego rw’Ubugenzacyaha (RIB), ruri mu gikorwa cyo gusoza ubukangurambaga ku icuruzwa ry’abantu no gushakira inyungu ku bandi.

Ni igikorwa kirimo kubera muri Kigali Pele Stadium i Nyamirambo mu Karere ka Nyarugenge mu Mujyi wa Kigali.

Cyitabiriwe na Minisitiri w’Ubutabera akaba n’Intumwa Nkuru ya Leta, Ugirashebuja Emmanuel, inzego z’umutekano, Iz’ibanze mu Mujyi wa Kigali ndetse n’urubyiruko rusaga 2 000 rurimo gususurutswa n’abahanzi barimo Intore Tuyisenge na Real Lim.

Christine Kayirebwa, Umuyobozi w’ishami rishinzwe kurwanya ibyaha byihariye n’ibyaha by’inzaduka muri RIB, avuga ko abantu bakora icuruzwa ry’abantu bakoresha imyirondoro itari iyabo.

Akomeza agira ati: “Bakoresha uburyo bwo gushyira mu madeni abo batwaye babwirwa ko babashakira viza n’urwandiko rw’inzira, Passport”.

Kayirebwa asobanura ko ugiye gucuruzwa, iyo agezeyo adahembwa ahubwo abwirwa ko yishyura viza n’ibindi bityo agatangira gukora adahembwa.

Abenshi batwarwa mu mabisi kandi bakanyura ku mipaka itemewe bakabarinda kugira abo bavugana ndetse bakanabakuraho telefoni.

Urwego rw’Ubugenzacyaha rwavuze ko hakiri imbogamizi zo kutamenya icyaha cy’icuruzwa ry’abantu n’amayeri abarikora bakoresha.

Umuryango w’uwagiye gucuruzwa, iyo ubimenye uraceceka kuko ngo uba wumva ko bagiye gukorera amafaranga menshi.

Indi mbogamizi RIB igaragaza. Ni ukutamenyesha inzego z’umutekano mbere yuko ajya gucuruzwa.

Urwego rw’Ubugenzacyaha ruvuga ko ingamba mu kurwanya iki cyaha ari ugukomeza guhugura, ubufatanye n’abafatanyabikorwa, ibigo bya Leta ndetse n’ibigo mpuzamahanga.

Icyakoze hashyirwa imbaraga mu gukurikirana abakora iki cyaha kandi abagiye gucuruzwa bagacyurwa ku bufatanye na Ambasade z’u Rwanda mu bihugu biba byatujwemo Abanyarwanda.

Kayirebwa agira ati “Turasaba umuturarwanda wese, urubyiruko, gutangira amakuru ku gihe igihe cyose babonye ufite uwo mugambi”.

Icyakoze Urwego rw’Ubugenzacyaha ngo rufite umurongo utishyurwa watangirwaho amakuru kandi umuntu agahabwa ubufasha.

Ubuhamya bw’abacurujwe mu mahanga

Mu buhamya bwa Mukamana Claudine (Izina ryahinduwe) avuga ko yacurujwe mu gihugu cya Uganda.

Avuga ko yajyanywe n’umugabo wo mu Ruhango mu Ntara y’Amajyepfo.

We na mugenzi we, uwo mugabo yabahaye itike abasezeranya ko abajyanye mu kazi ko muri Alimention, bagezeyo bisanga mu kabari.

Hashize iminsi bari mu kazi, basabye uwabatwaye kubaha amafaranga yo kugura ibikoresho by’isuku.

Ati: “Ntayo yaduhaye ahubwo yaratubwiye ngo nta mukobwa ukora mu kabari ugira ikibazo cy’amafaranga”.

Mukagasana Claire (Izina ryahinduwe) avuga ko yacurujwe mu gihugu cya Malaysia ku mugabane wa Azia.

Uwamutwaye yamwijeje ko azajya ahembwa neza kandi ko na we yemeye gusiga abana be akajya gukorera amafaranga.

Yagiye azi ko agiye gukora muri Supermarket ariko agezeyo yakwa urwandiko rw’inzira nyuma aza gutwarwa n’abagabo.

Ati “Naribajije nti ubu buzima nibwo njemo nsize umwana wanjye. Hari umugabo wari ugiye kundoha, ndangije ndamubwira nti mbabarira ibyo ushaka byose ndabigukorera”.

Kwisaba Emmanuel (Izina ryahinduwe) umuhungu wagaruwem agiye gucuruzwu gihugu cya Uganda.

Mu rugendo rwe avuga ko bagiye muri gare bagatega bisi mu masaha y’umugoroba.

Bagombaga kugera Kisoro muri Uganda bagahura n’undi muntu ubageza Kampala.

Ati: “Twageze ku mupaka tuhasanga Polisi y’u Rwanda iturebye iratubaza ngo mugiye he, twababwiye ko tugiye mu kazi Kampala.

Baratubwiye ngo tubereke umuntu utujyanye tumurebye turamubura, ni uko twagaruwe mu Rwanda”.

  • KAYITARE JEAN PAUL
  • Mutarama 30, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE