Umuyobozi wa Polisi y’u Rwanda mu ruzinduko rw’iminsi 3 muri Namibia

  • NTAWITONDA JEAN CLAUDE
  • Kanama 31, 2022
  • Hashize imyaka 2
Image

Umuyobozi Mukuru wa Polisi y’u Rwanda IGP Dan Munyuza, ari mu ruzinduko rw’akazi rw’iminsi itatu  mu gihugu cya Namibia aho yasuye Polisi y’iki gihugu ku butumire bwa mugenzi we, Lt. Gen Sebastian Haitota Ndeitunga.

Kuri uyu wa Kabiri taliki ya 30 Kanama, IGP Munyuza yitabiriye umuhango wateguwe na Polisi y’iki gihugu wo kuzenguruka mu muhanda ukorwa hagamijwe guhindura ubuyobozi bwa Polisi ya Namibia, umuhango biteganijwe ko uba kuri uyu wa Gatatu taliki ya 31 Kanama, ukabera muri Kaminuza ya Polisi ya Isiraheli Patrick Iyambo, iherereye mu Mujyi wa Windhoek muri Namibia.

Uwo muhango biteganyijwe ko uberamo ihererekanya bubasha hagati y’Umuyobozi wa Polisi ya Namibia Lt. Gen Sebastian Haitota Ndeitunga umaze imyaka isaga 17 ku buyobozi, ugiye mu kiruhuko cy’izabukuru n”Umuyobozi mushya umusimbura, Maj. Gen. Joseph Shimweelao Shikongo.

Umuhango wo kuzenguruka imihanda ukorwa hagamijwe ko abaturage basezera Umuyobozi wa Polisi ucyuye igihe, banakira Umuyobozi wa Polisi mushya.

Uyu munsi kandi IGP Munyuza, yanasuye icyicaro gikuru cya Polisi ya Namibia giherereye mu Murwa Mukuru Windhoek, aho yagiranye ibiganiro n’abayobozi bombi ba Polisi, Lt. Gen Sebastian Ndeitunga ugiye mu kiruhuko cy’izabukuru n’umuyobozi mushya, Maj Gen Joseph Shikongo.

Muri ibyo biganiro kandi hari Umuyobozi Wungirije wa Polisi ushinzwe imiyoborere (Deputy IGP for Administration) Maj Gen Anne-Marie Nainda, n’abandi bayobozi batandukanye muri Polisi ya Namibia.

Umubano wa Polisi y’u Rwanda n’iya Namibia   uhera  mu kwezi k’Ugushyingo 2015, aho Polisi zombi zishimira umubano mwiza zifitanye muri gahunda zitandukanye mu bijyanye no gucunga umutekano, no guhanahana abarimu n’abatozwa mu nzego zitandukanye, abapolisi  bakuru 15 ba Namibia ni bo bamaze gusoza amasomo ya ba Ofisiye Bakuru mu Ishuri Rikuru rya Polisi y’u Rwanda, mu gihe umupolisi umwe akaba ari kwiga amasomo nk’aya muri iri shuri, abapolisi babiri ni bo basoje amasomo abinjiza mu rwego rwa ba Ofisiye Bato mu Ishuri Rikuru rya Polisi y’ u Rwanda.

Ku rundi ruhande, abarimu ba Polisi Band ya Namibia  bagize uruhare runini rwo guhugura abapolisi b’u Rwanda  bo mu Ishami rya Polisi rya Muzika (Police Band) kugeza ku rwego rwa gatanu.

  • NTAWITONDA JEAN CLAUDE
  • Kanama 31, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE