Uganda: Umuhungu wa Gen. Muhoozi yasoje amasomo ya gisirikare mu Bwongereza

Ruhamya Kainerugaba akaba Umuhungu w’Umugaba Mukuru w’Ingabo za Uganda (UPDF), Gen Muhoozi Kainerugaba, yasoje amasomo ya gisirikare mu ishuri rikuru rya gisirikare rya Royal Military Academy riherereye i Sandhurst mu Bwongereza.

Ruhamya Kainerugaba ni umwe mu basirikare babiri ba Uganda basoje amasomo muri iri shuri, mu muhango wabaye kuri wa Gatatu tariki ya 5 Kanama 2026.  Aba basirikare bahawe amasomo y’ibanze ku miyoborere, amayeri ya gisirikare n’ubumenyi bwo kuyobora ingabo.

Mu 1999 ni bwo Gen. Muhoozi yinjiye mu Ngabo za Uganda, mu 2000 arangiza amasomo yakurikiranaga mu iri shuri rya gisirikare ryo mu Bwongereza rizwi nka ‘Royal Military Academy Sandhurst’ ahabwa ipeti rya Sous-Lieutenant.

Iri shuri ryigisha amasomo mu bya gisirikare, rifite ibigwi mu gutoza abasirikare bakuru, bo mu gihugu cy’u Bwongereza, by’umwihariko ingabo z’i Bwami mu Bwongereza, aho bongererwa ubumenyi mu kuyobora ingabo.