Umuhanzi Willi yasohoye indirimbo akomoza ku gihembo mpuzamahanga yegukanye

  • NTAWITONDA JEAN CLAUDE
  • Kanama 20, 2022
  • Hashize imyaka 2
Image

Umuhanzi Willy Makuza Gakunzi ubarizwa muri Canada, wamenyekanye mu ndirimbo zo kuramya zirimo; ‘Uri Imana’, ‘Amaraso’, ‘Mu bwiza bwawe’, ‘Uhoraho’ na ‘Iyo nibutse’, yongeye kwibuka abakunzi be bituma ashyira hanze indirimbo y’amashusho yakoranye na Elsa K.

Kuri ubu Willy Gakunzi yashyize hanze indirimbo nshya “Mbayeho” yakoranye na Elsa K. Ni indirimbo ije ikurikira iyo aherutse gushyira hanze taliki 17 Kanama 2022.

Iyi ndirimbo igaruka ku kimenyetso cy’iby’imbabazi Imana ikora, no gukomeza abihebye. Ikubiyemo kandi ubutumwa bw’uko umuntu abayeho ngo yamamaze imbabazi z’Imana.

Willy M. Gakunzi azwi mu bikorwa by’ubugiraneza akorera mu muryango ‘Heart of Worship in Action’ yatangije.

Avuga ko uyu muryango umaze gufasha abatishoboye batandukanye mu Rwanda aho ubongerera ubushobozi ukanabigisha imyuga.

Willy yanakomoje ku gihembo mpuzamahanga aherutse kwegukana cyitwa ‘CEO Award’ [CEO Award Outstanding Leadership].

Mu kiganiro n’itangazamakuru, Willy M. Gakunzi yahishuye ko aherutse kwegukana igikombe gikomeye cya CEO Award kiri ku rwego mpuzamahanga.

CEO Award ni igihembo gihabwa umuyobozi mwiza.

Iki gihembo yagishyikirijwe taliki 04 Kanama 2022 ari naho ahera ashima Imana yamuhesheje iki gikombe. Ati: “Imana yangiriye neza, nahawe igihembo ejo bundi”.

Willy Makuza asobanura ko kugira ngo umuntu ahabwe CEO Award itangwa buri mwaka, binyura mu nzira y’amatora.

Yagize ati: “Abantu baratora, bakabashyira mu byiciro bitandukanye [Nominations], buri muntu wese aba yemerewe gutora, barabisohora bakavuga ko igihe cyo gutora cyageze.

Noneho bakareba umuntu wayoboye neza cyangwa se umuntu wagize akamaro, yaba ari ukuyobora abantu, ndetse no guhanga udushya.

Mbese umuntu wabaye indashyikirwa mu byiciro bitandukanye”. 

Avuga ko yatunguwe cyane no guhabwa iki gihembo kiri ku rwego rwo hejuru.

Ati: “Byari ibintu bitunguranye mu by’ukuri, ntabwo nari mbizi, nagize gutya mbona CEO arampamagaye, uwo ni umuntu uba ukomeye utapfa no kukuvugisha gusa ambwira ko natsindiye icyo gihembo”.

Iyo hamaze gutangazwa abatsinze hakoreshejwe ikoranabuhanga, nyuma hagategurwa ibirori byo kwakira abatsindiye ibihembo bakajya i New York.

Willy M. Gakunzi ni we mwirabura rukumbi mu bantu 23 batowemo bwa nyuma uwegukana CEO Award.

Umuramyi Willy Makuza yahawe igikombe mpuzamahanga
  • NTAWITONDA JEAN CLAUDE
  • Kanama 20, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE