Umuhanda w’igitaka wanduza Umujyi wa Rusizi uteje inkeke

  • BAHUWIYONGERA SYLVESTRE
  • Mutarama 30, 2024
  • Hashize amezi 4
Image

Abatuye n’abakorera mu Mujyi wa Rusizi bavuga ko babangamiwe n’umuhanda w’igitaka uri muri mikeya isigaye itarashyirwamo kaburimbo, bavuga ko ubateza umwanda n’umutekano muke mu gihe bari bamaze kugira icyizere cy’impinduka mu isuku n’umutekano uhamye.

Barasaba ko uyu muhanda usigaye washyirwamo kaburimbo nk’uko byagenze ku yindi mihanda myinshi yagiye ikorwa ibibazo nk’ibyo bigakemuka.

Uyu muhanda wa metero zitarenga 400 uva ku Rusengero rw’Inkuru Nziza, ukaba uhanamye cyane, ufite igitaka cyinshi, utagiraho amatara ndetse urangwaho utubari twa make dushinjwa kuba intandaro y’umutekano muke.

Abaturage bo mu Mujyi wa Rusizi bahangayikishwa cyane n’abana b’inzererezi bambura abari mu mujyi bakawumanukiramo berekeza mu bishanga biri hepfo yawo, biyongera ku bajura bakuze bamburira muri iyo karitsiye.

Babona uwo muhanda ukozwe wanafasha  abinjira mu Mujyi bakoresheje ibinyabiziga, baturutse ku biro by’Akarere ka Rusizi, ku mipaka ya Rusizi ya mbere n’iya 2 ihuza uRwanda na RDC, mu Bugarama n’ahandi, kuko ubu bagomba kuzenguruka ibindi bice ngo bagere mu mujyi rwagati.

Harindintwali André uturiye uyu muhanda akanawukoreraho imirimo ya buri munsi, avuga ko uri mu mihanda mike cyane isigaye ibangamiye uyu mujyi mu buryo bugaragara.

Ahamya ko uramutse ushyizwemo kaburimbo baba batabawe mu buryo bwinshi, cyane cyane ku isuku n’umutekano w’abahanyura.

Ati: “Ni umuhanda mu by’ukuri w’ibitaka byinshi binyerera cyane, ucuramye, bikabangamira abahatuye n’abahanyura n’amaguru kuko nta kinyabiziga na kimwe cyahanyura. Haba mu mvura, haba mu izuba utera ibibazo binyuranye bijyanye n’umwanda mu mujyi, ku buryo ubundi wagombye kuba uri mu yakozwe mbere mu rwego rwo gutunganya umujyi.”

Yarakomeje agira ati: “Ikindi kibangamye cyawo ni uko nta matara awucanira ugira. Iyo bwije, kuhanyura biba ari nko kwihara amagara kubera abajura bashikuza amatelefoni n’udukapu tw’abagore, baba biriwe banywera ibiyobyabwenge mu Rushakamba n’ahandi, kimwe n’utwana tw’inzererezi duturuka hirya no hino twarataye amashuri tukaza kuwutezamo umutekano muke.”

Banavuga ko ubangamira abaturage mu gutaha nijoro nk’iyo imvura yaguye ari nyinshi, kubera n’uburyo ucuramye cyane kandi unyerera mu buryo budasanzwe.

Isimbi Aimée na we ucururiza muri uyu mujyi, yagize ati: “Turashimira cyane Perezida wacu Paul Kagame imbaraga yashyize mu mpinduka mu iterambere, isuku n’umutekano muri uyu mujyi, biciye cyane cyane mu gushyira kaburimbo muri imwe mu mihanda iwinjiramo.

Ariko ikibazo cy’uriya muhanda cyo turibaza ko atakizi kuko akimenye warara ukozwe bitewe n’ingorane uteza, kuko uhanyuze icyondo cyose azanye acyinjiza mu mujyi, ugasanga kinasiba inzira z’amazi ziri mu mihanda yawo, ari bwo wumva ngo imihanda yo muri uyu mujyi yasenyaguritse,ibibazo byinshi bituruka aho.”

Umuyobozi w’Akarere ka Rusizi Dr Kibiriga Anicet, avuga ko  ibyo abaturage bavuga ari byo kuko uwo muhanda uri mu mihanda mibi cyane uyu mujyi usigaranye, ariko ko uzakorwa nyuma y’indi ibiri minini igiye gutangira uyu mwaka.

Ati: “Kuba uteye ikibazo byo n’umwana muto arabibona, ariko waratekerejwe. Uzakorwa mu mihanda izakorwa ku bufatanye na banki y’Isi nyuma y’indi ibiri minini ihuza Umujyi n’Imirenge iwukikije izatangira uyu mwaka. Sinabaha igihe ntarengwa ariko uri mu mihanda izatunganywa neza icyo gihe kuko ikorwa ryawo rivuze ikintu kinini cyane ku mujyi wacu.”

  • BAHUWIYONGERA SYLVESTRE
  • Mutarama 30, 2024
  • Hashize amezi 4
TANGA IGITEKEREZO
lg says:
Mutarama 31, 2024 at 7:55 am

abantu bajye bashima ibikorwa Leta niyo ifite ijisho rinini rireba imibereho yabatutage nibyo bakeneye umujyi wa Rusizi imihanda yaho ili gukorwa twagombye kubanza gushima ibyo ubuyobozi budukorera aliko ntitwumve ko buli wese aho atuye aho akorera hagomba gushyirwa kaburembo ahandi ubu abaturage bishyira hamwe mumudugudu aho batuye bagatanga buli wese umusanzu Leta ikabaha inkunga naho kubona ko abandi bayifite wowe ntayo nishyari ntitwatura kuli kaburembo twese umuhanda ukenewe cyane ubu ni Nyakarenzo Mibilizi Hôpital kurusha ahandi kandi ufitiye buli wese umumaro kandi imiterere yaho nimyiza niho honyine mu gihugu utabona umuntu numwe wimurwa kubera ikorwa ryawo mugihe ahandi usanga bisaba gusenya amazu cyangwa ingo byubatswe mumuhanda basaba kwishyurwa nabo basaba wasanga bisaba gusenya bimwe ngo hakorwe

Andika igitekerezo

AMATEGEKO AGENGA IYANDIKA RY'IGITEKEREZO CYAWE