Umugore warwaniye FDLR imyaka 25, yatunguwe n’urugwiro RDF yamwakiranye

  • Imvaho Nshya
  • Nzeri 28, 2023
  • Hashize amezi 8
Image

Premier Sergent Nizane Anne Marie w’imyaka 39 y’amavuko, aricuza imyaka 26 yamaze arwanira umutwe w’iterabwoba wa FDLR mu ntambara atari asobanukiwe kuko yayitangiye afite imyaka 13, igihe yari agikeneye uburere bw’ababyeyi.

Kimwe mu byamutunguye ni urugwiro Ingabo z’u Rwanda zamwakiranye ubwo yatahukaga mu Rwanda, kandi we yarumvaga ko zibabona nk’abanzi nta neza yabavaho.

Uyu mugore ukomoka mu yahoze ari Komini Rwerere, ubu ni mu Karere ka Rubavu, yinjiye mu mutwe w’Abacengezi mu mwaka wa 1997, bidatinze akomereza mu mashyamba ya Repubulika Iharanira Demokarasi ya Congo (RDC), ahari indiri y’umutwe w’iterabwoba wa FDLR n’uyu munsi.

Mu mwaka wa 2022 ni bwo yagarutse mu Rwanda, ariko ahageze yasanze ibyo yabwirwaga byose byari ibinyoma ahamya ko yapfunyikiwe ikibiribiri, kuko ubuzima bwahindutse agasanga n’abo yitaga abanzi akiri mu mashyamba bari za baringa batabaho.

Premier Sergent Nizane Anne Marie ni umwe mu bagore bitandukanyije n’umutwe w’iterabwoba wa FDLR, akaba ari mu basoje amasomo y’uburere mboneragihugu n’ay’imyuga mu cyiciro cya 69  yatanzwe n’Ikigo cyo gusezerera no gusubiza mu buzima busanzwe abahoze mu mitwe yitwaje intwaro, i Mutobo mu Karere ka Musanze.

Avuga ko yicuza igihe yataye abuyera mu mashyamba ya RDC bamubeshya ko azabohora u Rwanda, atazi ko ari we wari uboshye kuko yasanze abari urungano rwe baramaze gutera imbere kandi babayeho mu mahoro.

Kuri we, imyaka 25 yamaze mu mashyamba ya RDC ari umusirikare wa FDLR ni igihombo gikabije kuko yaruhiye ubusa cyane ko nta kibazo yari afitanye na Guverinoma y’u Rwanda.

Mu kiganiro yagiranye n’Imvaho Nshya, Nizane yagize ati: “Ninjiye muri FDLR ndi umwana muto ku myaka 13, nta kibazo nari mfitanye n’ubuyobozi nari ndi umwana nkwiye kwiga. Tekereza ko kuba mfite imyaka 39 bivuze ko namaze imyaka 25 yose nzerera mu mashyamba kandi abo tungana barize, barubatse, abandi ni abayobozi; ibi iyo mbyibutse birambabaza.”

Premier Sergent Nizane Anne Marie avuga ko yinjiye intambara atari yasobanukirwa, kuko yabonaga Rwerere yavukiyemo Inkotanyi zirasana n’Abacengezi, abasivili bo bakicwa n’abo bacengezi batazi icyo bazira, cyangwa ari uko banze gucengerwa n’ingengabitekerezo yabo.

Avuga ko kugira ngo yinjire mu mutwe w’Abacengezi, abakuze bari bawurimo babanje kumwumvisha ko adashobora kuba mu Rwanda mu gihe rwaba rukirimo uwitwa Umututsi wese.

Ati: “Na n’ubu ni we mwanzi FDLR ivuga ko ifite. Nkanjye nta n’ubwo nari nzi ibyo by’amoko ku buryo byageze no mu myaka yose nkubwira namaze muri Congo ntarabona Umututsi ngo mbe nahamya ko ari we. Ndasaba ababyeyi  gutoza abana babo urukundo.”

Nyuma y’imyaka mike yashatswe n’umugabo w’inyeshyamba muri FDLR babyarana abana babiri ariko yicirwa ku rugamba.

Kuva ubwo yatangiye kwirwanaho n’abana be, ubuzima buramusharirira cyane kuko yumvaga u Rwanda atarugarukamo rukibamo uwitwa Umututsi.

Yagize ati: “Natangiye akazi k’ingufu nkiri muto, kurya byari ikibazo byadusabaga kujya mu mirima y’Abanyekongo. Urumva imyambaro byari ikibazo, kwivuza ni ugukoresha ibyatsi mu gihe hano bafite Mituweli… Aho mariye gushaka na bwo ntabwo byampiriye kuko umugabo wanjye yaguye ku rugamba.”

Premier Sergent Nizane avuga ko kuva aho agereye mu Rwanda asanga muri FDLR baramupfunyikiye amazi kuko bajyaga bamubwira ko aramutse ageze mu Rwanda atamara amasaha abiri.

Ati: “Ubundi njyewe nkimara kubona umupaka, natekereje ko ngiye gupfa, ariko abaje kutwakira barimo n’Ingabo z’u Rwanda twahoraga twumva twazikura muri iki gihugu. Ni zo zaje kutwakira ziduha amazi yo kunywa no koga, ziduha ibiribwa, kugeza ubwo ngeze i Mutobo ngatangira kuryama kuri matora, nkanywa icyayi yemwe bakampa inyama n’amagi.”

Mbere yabanje gutekereza ko ari amayeri y’Inkotanyi yo kugira ngo bazamwice atakibitekereza, ariko uko bamweretse urukundo bakamwigisha ari na ko bamwereka iterambere abandi bagezeho, yagiye yumva akunze u Rwanda.

Premier Sergent Nizane yavuze ko yatunguwe no kubona yakiriwe n’abasirikare ba RDF avuye muri FDLR

Uyu musirikare ashimira Perezida wa Repubulika y’u Rwanda Paul Kagame wirengagije ibyo FDLR yakoreye Abanyarwanda n’ibibi itegura ku Rwanda akakira abasirikare bayo, akabigisha umwuga, akabaha ibikoresho n’ibindi biborohereza kwisanga mu Muryango Nyarwanda no gusubira mu buzima busanzwe.

Anamushimira kandi ko abakeneye gukora igisirikare cy’umwuga bahabwa amahirwe yo gukorera Igihugu binjira mu Ngabo z’u Rwanda (RDF) zimaze kuba ubukombe mu ruhando mpuzamahanga.

Yashimiye nanone Guverinoma y’u Rwanda yamwigishije umwuga w’ubudozi ndetse ikanamuha ibikoresho by’ibanze bimufasha gutangira kuwubyaza umusaruro; mu byo yahawe amaze gusoza amasomo harimo n’imashini.

NGABOYABAHIZI PROTAIS

  • Imvaho Nshya
  • Nzeri 28, 2023
  • Hashize amezi 8
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE