Ubushakashatsi n’ikoranabuhanga mu buhinzi n’ubworozi bizakomeza gushorwamo imari

  • NTAWITONDA JEAN CLAUDE
  • Nyakanga 9, 2022
  • Hashize imyaka 2
Image

Minisitiri w’Ubuhinzi n’Ubworozi Dr. Mukeshimana Gerardine yafunguye ku mugaragaro Imurikabikorwa rya 15 ry’Ubuhinzi n’Ubworozi ririmo kubera ku Mulindi mu Karere ka Gasabo, mu Mujyi wa Kigali, rifite insanganyamatsiko igira iti: “Kubaka ubudahangarwa mu buhinzi n’ubworozi hifashishijwe ikoranabuhanga.

Afungura ku mugaragaro iri murikabikorwa, Minisitiri Dr Mukeshimana yashimiye abahinzi, aborozi, n’abandi bafatanyabikorwa uruhare bagira mu kubonera Abanyarwanda ibiribwa mu gihe Isi yose yugarijwe n’intambara ndetse n’ibyorezo nka Covid-19 bituma ibiribwa biboneka bigoranye.

Yavuze ko Guverinoma y’u Rwanda yifuza ko tugira ibidutunga bihagije, ikaba izakomeza gushora imari mu bushakashatsi bugenda butugeza ku ikoranabuhanga dufite ubu mu buhinzi n’ubworozi.

Dr. Mukeshimana  yagize ati: “Nka Leta tuzakomeza gukorana n’abafatanyabikorwa, tuzagumya gukorana  n’abahinzi- borozi bacu kugira ngo babashe guhangana n’imihindagurikire y’ibihe, babashe guhangana nuko inyongeramusaruro, ubwikorezi bigenda bihenda kurushaho”.

Minisitiri w’Ubuhinzi n’Ubworozi, Dr. Mukeshimana Gerardine yavuze ko Leta izakomeza gushyigikira urwego rw’ubuhinzi n’ubworozi ngo Abanyarwanda babone ibibatunga (Foto MINAGRI)

Yakomeje avuga ko iri murikabikorwa rya 15 ari umwanya mwiza wo kunguka ubumenyi no kwigira ku bunararibonye, bigafasha mu iterambere ry’ubuhinzi n’ubworozi.

Ati: “Iri murikabikorwa ni umwanya mwiza wo gusuzuma aho ikoranabuhanga mu buhinzi n’ubworozi rigeze.[…..] Iri koranabuhanga dukomeza kwerekana mu buhinzi  n’ubworozi rifite akamaro kanini, kuko ni umwanya abahinzi n’aborozi babasha guhura  bagasabana, bagasangira  ubunararibonye n’ubumenyi bwafasha buri wese kuzamura no guteza imbere ibikorwa bye”.

Minisitiri yanavuze kandi ko ari umwanya mwiza ku bakora ubushakashatsi n’abahanga udushya kuko ibivamo ari byo bituma hagira intambwe iterwa mu kongera umusaruro mu buhinzi n’ubworozi

Ati: “Ni umwanya mwiza w’abakora ubushakashatsi n’abahanga udushya mu buhinzi n’ubworozi berekana ibyo bagezeho birimo imashini, imbuto, ibikoresho bigezweho byo mu bworozi. Hari byinshi twabonye uyu munsi muri 2019 tutari twabonye, bivuze ko nubwo twahuye n’icyorezo cya Covid-19, abantu baticaye bakoze”.

Yashimiye buri wese ufite ibikorwa yamuritse anashimira abakomeza kuza gusura iryo murikabikorwa, kuko ni umwanya wo gutuma abantu bahura, ni n’umwanya wo kwiyungura ubwenge, ukavuga uti hari icyo nabonye ntari nzi bityo ubwo buhanga ukaba wabutahana.

Ubuhinzi n’ubworozi bikomeje gutanga umusaruro mwiza

Minisitiri w’Ubuhinzi n’Ubworozi, Dr. Mukeshimana yagaragaje uruhare rw’ubuhinzi n’ubworozi mu bukungu bw’Igihugu aho umusaruro wagiye uzamuka.

Ati: “Mu myaka 5 ishize impuzandengo y’uruhare rw’ubuhinzi n’ubworozi mu musaruro mbumbe rugeze kuri 25%, umusaruro w’ubuhinzi n’ubworozi ukaba waragiye wiyongera ku kigero mpuzangendo cya 5%”.

Yanagarutse ku bibazo byagize ingaruka mu nzego zitandukanye harimo n’ubuhinzi.

Ati: “Isi muri rusange hari byinshi birimo bigerageza kuyijegajeza, ibikorwa nk’intambara hirya no hino ariko cyane cyane iya Ukraine n’u Burusiya, Covid-19 ariko icyari gikomeye cyane cyari gihari na mbere n’imihindagurikire y’ibihe bigenda byototera uburyo  abatuye Isi  babona ibibatunga.

Byanashubije inyuma uburyo bwo kwihaza mu biribwa, hafi miliyoni 150 z’abatuye Isi basubiye mu bukene, basubira mu kutabona ibibatunga kikaba ari ikibazo gihangayikishije Isi”.

Insanganyamatsiko y’uyu mwaka kandi yavuze ko ishimangira byimazeyo intego u Rwanda rwihaye yo kuzamura umusaruro himakazwa ikoranabuhanga mu bikorwa by’ubuhinzi n’ubworozi.

Yongeyeho ko nta kundi ibyo bibazo byasohokwamo hatabaye kwimakaza  ikoranabuhanga mu kongera umusaruro, mu gukora neza ibyo dukora ariko n’ikoranabuhanaga kugira ngo n’ibiba byasaruwe bigere ku cyo bigenewe.

Ibitunga abantu biboneke ariko biboneke bitongera ubukana mu mihindagurikire y’ikirere, biboneke bigire impinduka ku mibereho y’abantu, abantu bagende batera imbere ku buryo buteye imbere.

Leta izakomeza gushyigikira ubushakashatsi n’ikoranabuhanga

Ibindi bibazo yagarutseho bibangamira uru rwego ni izamuka ry’ibiciro by’inyongeramusaruro, ariko ko u Rwanda rutazahwema gukomeza kuba hafi abahinzi- borozi hagamijwe kubona ibiribwa.

Ati: “Umwaka ushize byari bitaragera aho bigeze ubu hari byinshi Leta yakoze kugira ngo ubuhinzi bwe kujegajega, bwe kugira ingaruka bugira, icyo ngicyo ni intego y’u Rwanda yiyemeje. Leta y’ u Rwanda yifuza ko tugira ibidutunga bihagije, tuzakomeza gushora imari mu bushakashatsi ari bwo bubyara iri koranabuhanga turimo dukomeza kuvuga”.

Mu gusoza yavuze ko nta kudohoka, hazakomeza ubufatanye hagati   y’abahinzi, abashakashatsi, abafatanyabikorwa, abatora amategeko kugira ngo hubakwe ubudahangarwa mu kubona ibitunga Abanyarwanda.

Hasuwe ibikorwa bitandukanye mu imurikabikorwa (Foto MINAGRI)

Abamurika ibikorwa by’ubuhinzi n’ubworozi batangaza ko uyu ari umwanya mwiza wo kurushaho kunoza ibyo bakora kuko bahungukira ubumenyi n’ubunararibonye bwa bagenzi babo, ibyo bigatuma ubuhinzi n’ubworozi bikorwa mu buryo bw’ikoranabuhanga, bigatanga umusaruro mwiza.

Ku ruhande rw’Umujyi wa Kigali by’umwihariko kuko hari ibice bikorerwamo ubuhinzi n’ubworozi, Ubuyobozi bwavuze ko iri murikabikorwa ryitezweho gufasha abo mu Mujyi wa Kigali barisura kuhakura ubumenyi butandukanye buzabafasha kunoza ubuhinzi, bagasagurira amasoko ndetse no kuzamura imibereho myiza y’abaturage.

  • NTAWITONDA JEAN CLAUDE
  • Nyakanga 9, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE