Uburasirazuba: Kuvugurura imiyoboro ikwirakwiza amashanyarazi birarimbanyije

  • Imvaho Nshya
  • Werurwe 30, 2022
  • Hashize imyaka 2
Image

Imiyoboro y’amashanyarazi yubatswe kera mu Turere dutandukanye tw’Intara y’Uburasirazuba ubu yatangiye kongererwa imbaraga ku buryo izahaza abayifatiraho amashanyarazi biyongereye ndetse n’ibikorwa by’ubucuruzi n’inganda ziciriritse ziri muri kariya gace.

Iyi miyoboro irimo kuvugururwa ivanwa kuri “monofaze” (single phase), igashyirwa kuri Tirifaze (Three phases). Biteganyijwe ko uyu mushinga uzavugurura imiyoboro igera ku bilometero birenga 180 mu Turere twa Nyagatare, Gatsibo, Ngoma, Kirehe.

Ni umushinga watewe inkunga n’u Bubiligi binyuze mu kigo cyawo cy’iterambere, (ENABEL), ushyirwa mu bikorwa na Sosiyete y’u Rwanda Ishinzwe Ingufu (REG) binyuze muri sosiyete iyishamikiyeho ishinzwe guteza imbere ingufu (EDCL).

Mu Karere ka Nyagatare, abatuye aho imiyoboro yamaze kuvugururwa, bishimira impinduka babonye kuva aho baherewe umuriro w’amashanyarazi ufite ingufu zisumbuye, bakaba baratangiye kuwubyaza umusaruro binyuze mu bikorwa bibyara inyungu. 

Kabindi ni santire y’ubucuruzi iherereye mu Kagari ka Kijojo mu Murenge wa Musheri. Abahatuye bavuga ko uyu muriro batangiye kuyibyaza umusaruro.

Musafiri Ildephonse afite icyuma gisya imyaka muri iyi santire. Avuga ko mbere y’ivugururwa ry’umuyoboro ubagezaho amashanyarazi, batashoboraga gukoresha urusyo rw’amashanyarazi, bityo bagakoresha urwa mazutu, bikabahenda kandi n’ifu ikaza itameze neza. Ubu yaguze icyuma gishya gikoresha amashanyarazi kandi yishimiye impinduka yabonye.

Hari aho imiyoboro yubatswe bushyashya, ahandi yongererwa ingufu

Yagize ati: ‘’Nk’uko mbere twakoreshaga ibyuma bya gisingisingi bimwe bya Mazutu, watsa ukumva mu ifu y’umukiliya haranukamo bya mazutu, ariko kubera umuriro ukanda ku rukuta ifu ikaza imeze neza nta kintu kinukamo.’’

Ni benshi bunga mu rya Musafiri bavuga impinduka nziza babonye kubera ivugururwa ry’imiyoboro. Abubaka bo bavuga ko kugira ngo bakoreshe inzugi byabasabaga gukora urugendo bajya mu wundi Murenge wa Rwimiyaga kuko iwabo nta washoboraga gusudira. Ubu ngo byose babibona hafi.

Ndayambaje Jean de Dieu we akora akazi ko kogosha.  Avuga ko mbere yagorwaga cyane no kutagira umuriro uhagije, bityo bikamuhenda nawe akazamura igiciro cyo kogosha.

Yagize ati: ‘’Kogosha umwana hano byabaga bigoye cyane kuko icyo gihe twogosheraga abana 300Frw urumva ko byari bihenze, ariko aho umuriro uziye ubu abana bato tubogoshera 100Frw umuntu mukuru ni 200Frw.’’

Niyonkuru Benoit, umuyobozi w’ishami rya REG mu Karere ka Nyagatare avuga ko abataragerwaho n’uyu muriro ufite imbaraga bashonje bahishiwe, kuko mu gihe kitarenze amezi 8 imiyoboro yose izaba yamaze kuvugururwa.

Yagize ati: « Uduce twari dufite imiyoboro ya monofaze mu Karere ka Nyagatare turimo Imirenge ya Rukomo, Nyagatare, Katabagemu, Mimuli, Gatunda, Mukama ndetse na Kiyombe. Ubu igikorwa cyo kubaka cyararangiye, hasigaye kugenda twongeramo imashini ziringaniza igipimo cy’amashanyarazi (transformers) kandi nacyo kigeze kure ».  

Mu Karere ka Gatsibo, imiyoboro irimo kuvugururwa iherereye mu mirenge ya Kiramuruzi, Remera, Kagyeyo na Kiziguro ku ntera y’ibilometero bigera kuri 40.

Mu Karere ka Ngoma, imiyoboro irimo kuvugururwa igeza amashanyarazi  mu mirenge ya Sake, Rukumberi na Jarama ireshya n’ibilometero 34.75km.  Naho mu karere ka Kirehe, imiyoboro ivugururwa iherereye mu mirenge ya Gatore, Gahara, Nyamugari na Mpanga ikaba ireshya n’ibilometero 40.

Muri rusange, ingo zifite amashanyarazi mu Rwanda zigeze ku ijanisha rya 68.97%. Leta y’u Rwanda yihaye intego ko bitarenze umwaka wa 2024, ingo zose mu gihugu zigomba kuba zifite amashanyarazi.

  • Imvaho Nshya
  • Werurwe 30, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE