Ubukangurambaga bwa Menya RFL bugiye gutangirira Iburasirazuba

  • NTAWITONDA JEAN CLAUDE
  • Nzeri 14, 2022
  • Hashize imyaka 2
Image

Abenshi iyo bumvise Laboratwari y’u Rwanda y’ibimenyetso bishingiye ku bumenyi n’ubuhanga bikoreshwa mu butabera RFL (Rwanda Forensic Laboratory) bahita bumva serivisi za ADN.

Ni mu gihe kuko mu muryango nyarwanda hari abahakana abana babo bikagera no mu butabera, hakiyambazwa RFL urujijo rukavaho.

Umunyarwanda ati ‘Agatinze kazaza ni amenyo ya ruguru’ undi ati ‘Utazi akaraye i Fumbwe araza ifu’ undi na we akongeraho ngo ‘Muroge magazi, amazi si ya yandi’.

Basore namwe bagabo mwihakana abo mwateye inda, abagira akaboko kagira ingusho, abahimba inyandiko ngo murashaka perimi namwe musambanya abana, murarye muri menge!

Tugaruke kuri serivisi zitangwa na RFL ndetse n’ubukangurambaga ‘Menya RFL’ bugiye guhera mu Turere twa Ngoma na Nyagatare mu Ntara y’Iburasirazuba.

Nkuko byagiye bisobanurwa n’ubuyobozi bukuru bwa RFL, ubukangurambaga Menya RFL bugamije gusobanurira abayobozi batandukanye ibijyanye na Rwanda Forensic Laboratory, RFL.

Iyo bavuze RFL uhita wumva ahatangirwa serivisi z’uturemangingo ndangasano (DNA).

Si yo serivisi yonyine iyi RFL itanga kuko hashobora kumenyekana ikishe umuntu, uwamwishe n’icyakoreshejwe yicwa.

Umuyobozi Mukuru wa RFL, Lt Col Dr Charles Karangwa, ubwo yari mu bukangurambaga bwa Menya RFL mu Mujyi wa Kigali, yavuze ko RFL itanga serivisi zirimo n’iz’uturemangingo ndangasano (ADN).

Yanavuze ko hari na serivisi zo gupima inyandiko mpimbano, gupima ibitero by’ikoranabuhanga, serivisi yo gupima abantu bapfuye uhereye ku menyo n’amagufwa, uburozi n’ibindi.

Mu kiganiro kigufi Imvaho Nshya yagiranye na Nicodeme Nzahoyankuye, umukozi ushinzwe itumanaho muri RFL, yayemereye ko ubukangurambaga ‘Menya RFL’ buzakomereza Iburasirazuba.

Ati: “Ku wa Gatanu ni mu Karere ka Ngoma naho ku wa Gatandatu ni mu Karere ka Nyagatare mu Ntara y’Iburasirazuba”.

Yirinze kugira icyo atangaza ku bahanzi bazifashishwa mu bukangurambaga kubera ko ibiganiro hagati ya RFL na bo bitaranozwa.

Ku rundi ruhande Lt Col Dr Karangwa, Umuyobozi Mukuru wa RFL, aherutse gutangariza abayobozi bo mu Ntara y’Iburasirazuba ubwo bari mu Karere ka Kayonza, ko mu bahanzi bazitabira hazaba harimo Butera Knowless.

Mu bukangurambaga bumaze iminsi bubera ku rwego rw’Intara n’Umujyi wa Kigali, umuhanzi Intore Tuyisenge ni we wifashishwaga mu gususurutsa abayobozi batandukanye.

Kuva muri 2018 RFL imaze kwakira amadosiye arenga ibihumbi 30 yiganjemo ay’abantu baba bafashwe ku ngufu, ubwicanyi n’ibindi.

  • NTAWITONDA JEAN CLAUDE
  • Nzeri 14, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE